MHIP Day Vawi 35-na

Naktuk Ni 6.7.09 (Thawhtan) hi MHIP Day Vawi 35-na anih angin Kan Veng Branch pawhin a tangkai zawng leh hlimawm takin hun hman an tum a. Day ah hian mi harsa tanpui ngai thlang chhuakin chung mite hnenah chuan tanpuina an pe thin a, chhun ah nilengin YMA Community Hallah Proramme hlimawm tak hman an tum a ni.
M.H.I.P, I.T.I Veng Branch hi kum 1984-ah din a ni a, chuta O/B hmasaber te chu :
President : Pi Lalchhâwni(L) Vice President : Pi Lianmawii
Secretary : Pi R.Lalneihkûngi Asst.Secy. : Pi Chhunkimi
Treasurer : Pi Lalngêni Fin. Secy. : Khawvêlthangi

Kum 1985 khân MHIP In hmasa ber chu tûna an In hmun ngaiah hian an sa a, State Social Welfare Advisory Board atanga Cretche Centre (Nauawmna) an hmuh pawh hetah hian dt.1.7.1985 ah an hawng a, diltu awm chhun, Pi Chhunkimi chu Cretche a thawk tur hian lâk a ni. Pu Hipheia’n tanpuina sum a pêkin MHIP In 1996 khan sak that a ni a, chumi hnuah Dr.C.Silvera MP-in Hall sakna a pe ve leh a, chu chu dt. 22.12.1997 khân a hawng a ni.

Mizo Hmeichhe Insuihkhawm Pawl (MHIP) hi Registration No. 5 of 1977, Society Act 1860 (Act XXI of 1960) hnuaiah 6th July 174 khan din a ni a, Mizoram a Voluntary Organization lianber te zing a mi an ni a. Kum 14 (sawmpali) chin chunglam tan membership fee pein member anih theih a ni. Treasury Square, Aizawl-ah (Tel- 0389 323 464) Hqr neiin Sub Hqrs Lunglei Sub-Headquarter, Saiha Sub-Headquarter, Lawngtlai Sub-Headquarter, Serchhip Sub-Headquarter, Champhai Sub-Headquarter, Kolasib Sub-Headquarter, Mamit Sub-Headquarter ah te an awm bawk a ni.

M.H.I.P DAY - 35-na PROGRAMME

A hun           : Ni 6.7.2009 (Thawhtanni) Dar 10:30 a.m
A hmun       : YMA Community Hall
Chairman    : Pi Rokungi Br. President
Hunserh      : Pi R.Lalneihkungi Commt. Member
Hqrs Thuchah Chhiarchhuahna :
Pi Lalengkimi Secretary
Mizo Tlawmngaihna  : Pi Dokhumi Fin.Secretary
Thusawi tawi              : V.C / NGOs atangin.
Lawmthu sawina        : PiVanlalhchuangi Br.Treasurer

REFRESHMENT

MHIP OUT DOOR PROGRAMME

1. Football             : section tin atangin
2. Volleyball          : VC/MUP/YMA Vs MHIP Members
3. Musical Chair   : Senior members
and Junior members

Member Zawng Zawng te kim taka kal theuh turin kanin sawm e.

A tawpah member zawng zawng te a bo a bang awm lovin CHHEIH LAM tur a ni.

Tual Chhung

# Lawmthu sawina : Pu Hrangdawla T Sec te chhung chuan an fapa Vanlalfela boral chung changah YMA leh khawtlang nula tlangval, nu leh pa te thlamuanna hlu tak an chan a vangin lawm thu an sawi.

#  Vengchhung damlo kan hriat theih te : 1) Lallawmkima k -14 S/o Reuben Lalnunthara K- Sec, 2) Ngurropari K - 54, 3) Lalrihlui D/o Biakhmingliana, 7 months, 4) Engmawii k- 64, w/o Lunghnema CH-Sec.

#  Chhiat tawk : Pi Dokungi k-82 Pu B Lalhmangaiha Br. Secy Nu Bethlehem Vengthlang a cheng chu ni 2.7.2009 khan TB natnain a borala ni 3.7.2009 khan vui aliam a ni. Khawhar chhungte Editorial Board-in kan tawrhpui a, Pathianin thlamuana awmpui turin kan duhsak e.

M.H.I.P Day Pual Thuchah

President
M.H.I.P, I.T.I Veng Branch

Pathian kaihhruainain MHIP Day vawi 35-na kan lo tleng dawn ta reng mai. A hmasa berin he hun min hruai thlengtu Pathian fakin awm sela. MHIP branch member zawng zawngte chibai ka buk rualin, he hun hlim taka hmang turin duhsakna sang ber ka hlan e. kum 1984-ah ITI Venga MHIP din alo nih atanga vawiin ni thleng a hruaitu lo ni tawh zwng zawngte chungah lawmthu ka sawi a. An thawh rimna leh inpekna hlu tak avangin tun dinhmun hi hruai thleng a awmin, Silver Jubilee te pawh kan lo law tawh a . An thawhrimna leh thahnemngaihna te hre rengin inpekna leh thahnemngaihna thuk zawk nen kan kova innghat, tanpui ngaite tanpui te, chhawmdawl ngaite chhawmdawl chung zelin, kan ram leh khawtlang hmasawn nan i thawk zel ang u.
Kan kumpuan 'Women Empowerment' ( Hmeichhia te tih chak) tih kalpui mek tu te kan nih hriain, INDIA ramah hmeichhia te dinhmun chaw sanin a awm mek zel a. He mi ruala ke pen ve thei turin tan la ila. Zirna lamah kan sang lo ani mai thei, mahse tuh theih kan nei ve a ni tih hriain inngaihniam lo ila Mi te ti chak tur te, kawng dik kawhhmuh tur te, tanpui tur leh kaihruai tu kan ni thei a ni. Kan ram kan hnam, kan kohhran leh kan chhungkua a dam theihnan hmeichhia ten pawimawhna leh tih tur tamtak kan nei ani tih hre thar lehin, Pathian rawn chung zela hmalam pana kal zel turin member tin te ka sawmin ka ngen a ni. Tanpui ngai ten min ko a, min nghak reng a, ti thuanawp tu leh hnar tu nilovin ti chak tu ni theuh turin member tin te ka ngen e. ' MHIP vul reng rawh se' KA LAWM E.

Editorial

PEM KHAWM VENG

INDIA ram mawina, kan chhuan em em, Pangpar huana pangpar chi hrang hrang indip dal miah lova mawi tak a an vul kan tehkhin thin angin, kan I.T.I Veng ngei mai pawh hi vengdang chuan pemkhawm veng min ti thin mahse hei tak hi kan mawina, khaw hrang hrang a tanga Zonunmawi kan chhawm nun mek kan chhun khawmna hmun, kan hman thiam phei chuan Khawpui chhung Veng dang te entawn tlak kan nih theihna hmanraw pawimawh tak a ni thei tih hi, veng mipui te hian hre i hre thar ang u. Khawpui chhung Branch changkang zawk te kan thlir chuan Mizo tlawmngaihna an changkan san mek tih kan hmuin kan hre thei ang. Ka sawi leh pek dawn, Culture hi changkan san chi ani lo, Hnam changkang apiangin an humhalh nasa..He mi kawngah hian kan veng hian Zonun ze mawi, tlawmngaihna chhawmnun kawngah hmahruai theihna leh pawimawhna kan nei a ni tih hi hria ila. Thingtlang atanga pemlut thar kan neih te hi Mizo nun zia kan chhawm nun zelna tur a tan an pawimawh asin. A chhan chu kan hriat angin Khawpui laili atangin Mizo nun hlui chhawm zel kawngah entawn tur Branch an awm lem lo tih kan hri.,Chutih laiin Thingtlang lamah erawh tlawmngaihna leh Mizo Culture an la vawng nung viau. Chung atanga pem te lo dawng hnem pawl tak kan veng hian khawpui chhunga veng dang te aiin vanneihna kan la ngahin i hre ve lo maw?? Nge pemkhawm veng kan nia, kan thing bik i lo ti thin le ?? Chutiang rilru i lo pu a nih chuan Zonun humhalhna kawngah i bo ve tan mek a ni mai thei a sin.

ChhiarTuTe Huang

**  Kohhran leh pawl dang bungrua zawng ramri kham china hawh chauh theih a ni. Y.M.A bubngrua erawh mi zawng zawng huap a ni,
Heng Y.M.A enkawl Thalnmual, Hall leh bungrua dangte tih changtlun nana kan neih thilte kan thawh thei anih loh chuan, Y.M.A
sum tuakna hi ati thuamawp tuah I tang lo ang u Veng dang hmuha Y.M.A bungrua zahpuiawm lo kan duh ve si a. Kan chhiat kan
thata kan mamawhte kan hmanna chu Y.M.A thil a ni si a.

Lalchhuana ITI

**   Kohhran thalai Pathian rawngbawlna lama active tak tak te hian khawtlang rawngbawlna hi kan dah hniam deuh a ni lo maw? khawtlang leh kohhran hi kan thliar hran lutuk chuan kan society hian a la tuar ngei ang.. YMA hruaitute’n tihtur hmachhawp an neih member pumhuap ang a tih tur a awm hi chuan, hun te pawh hi kan insiam hran thiam a pawimawh a ni.

Arshavin a nau

**   Vawkhniakzawn thla kan thleng a, khua pawh a lo diak leh ta, lirthei khalh thin te’n kawng a ke a Kal te kan dim thiam deuh ka
beisei tlat e.

Lirthei nei-a

**   Tv . Lalrammawia Vodafone MFA Cup
khelh hmasak ber a inchak zo lo ka tuarpui che a,mahse i khel chhe lo..hma sawn zel rawh, He Veng tan mai nilo,kan ram tan a rohlu nithei ngei turin I talent Football khelhthiamna han hmang zel teh . All Da Best 4 u.

Hotupa YSU Fabregas M

**  Tuna YMA-in ruahmanna thar a siam ‘Kuang Siam-sa a dah’ hian kan Mizo tlawmngaihna tun hma atanga kan lo chhawm; chhiatni a tlawmngaihna lantir tura Kuang siama lungrual taka chhuah khawm thin te kha ati bovin a awm dawn talo niin a lang a, henghi kan mizo tlawmngaihna tibotu ani thei mai lo maw. Rual U zawk ten han ngaihtuah chiang deuh teh ang u.

Veng Hmangaihi.

Branch News

· Buatsaih mek : Hall Siam thatna tur Detailed Report , Central Doner Ministry a thehluh tur chu buatsaih/siam mek a ni.

· Budget Pe : Ni 1.7.09 (Nilai) khan Branch chuan Budget Rs.3,900/- Central YMA ah a pe fel ta.

· Information hnatlang : Information hnatlang naktuk thawhtanni hian neih tur a ni a, iformation ic ho te thahnem ngaitaka thawk chhuak turin ngen kan ni e.

· KUANG SIAM HNATLANG : Branch Ruahmanna angin Kuang Siamsa a neih tur anih angin nimin nileng khan Kuang siam hnatlang hi neih a ni.

VIVE

TK.Sailo

Ka thianpa hi chuan vawi tam article-la ziak lo mahsela faktu a nei nghal mai a, fak lawm lo mihring kan awm ngai si lo. Engemaw chang chuan mite fak hlawh loh lutuk han nih te chu hreawm ka ti ve lek lek thin a, nimahsela tunah erawh ka pu zarah kil pha leh a hlutna pawh pha te hi chu mipuitling thiau, chanchinbu lama hming lem invuah a mi fak ve ngai lo an ni tih a rukin min hrilh ta, ka hlim ngei mai..

Tunge ni ka thianpa chu? Amah chu naupang te kan nih lai atang tawha thian inkawm ngeih tak kan ni reng a, dawhsan ah mipui thahnem tak hmaah vawi duai lo 'Drama' kan lo chang dun tawh thin a, hmuhnawm ti taka lo thlir thin tu mipuiin ka chungah an len tir a, kei aia thiam zawkah an ngai a, Volleyball tui khuahah kan zuang lut a, a ni zawng rual u zawk te duhsak tur khawpin hma a sawn chaka, mi hriat a hlawh hmasa zawk thin.. Zirna lamah nise ka umphak rual lohin a tlan chak fal bik a, a thluak a tha a, lehkha chhiar manglo pawhin pawlsang zawkah a in hlangkai leh mai thin. A nungchang lah a mawi thawkhat a, ruihtheih thilin a ti buai phak ve lo, mize zawi tak a ni a, mi pawi a sawi ve ngai lo, a thinrim thei lo amaw tih mai tur a ni thin, khawsak phungah lah kei aiin a sang fal a, khawtlang leh lohhran rawngbawlna lamah lah hma hruai tu a ni lehzel a, solfa leh thusawi a thiam kawpa mi ngainat a hlawh viau zel. Chhas lamah nise a duai bik hauh lo a pian a tha a, a hmel a tha roh bawk si a, a luck-riau a, tun hun thleng mai a, khawlai fa a la neilo reng te hi kei a mah hre chiang bertu hi chuan mak ka tizawk hial thin. A ngaihzawng hmun thuma thena hmun chanve pawh hi ka la nei pha awm si lo, a ni nen hian naupang te kan nih lai a tang tawhin kan mizia in an na lai tam tak a awm a, chhas lam erawh kan hmel duh zawng a inang lo hlauh hi ka vanneihna a va ni kher em ! A mah hi pa uang ve thei tak a ni a, a fiamthu hi a chang chuan a ngeiawm ve lek lek thin, keini tan dawhthei taka tawrh a finthlak zawk thin. Ka thian pa a hming ka thup tlat hi ka tluk lohna lai sawi tur tam tak awm zingah a langsar zual kan thur chhuak a, a chanchin ka tarlang vak hi a chhan tha tawk a awm ngei ang.
Naupang te ka nihlai a tanga tun thlenga ka kawng tam taka ka tluk thei reng reng lo mai hi hreawm ka tih chang a tam thin a, a chang chuan ka thinlung a na a, a chang leh ka thin a rim ul thinin ka inhum sek thlawn leh thin. Mi thenkhat ten i thianpa hi chu i tluk lo deuh a ni an tih chang phei hi chuan hreawm ka ti a, an thu sawi pawh ngaihthlak nuam ka ti ngai awzawng lo. Thenkhat te chu ni sela a ni ang mi langsar thian neih chu nuam an tiin an in chhuan phah hial mai thei. Kei vethung erawh chu chutiang mi ka nilova, ka aia a hming langsar thin te hi ka ngaithei thlawt lo a, engemaw chang phei chuan rilru chhia te hi ka pu lek lek thin....Mahse a ni nen hi chuan thian kan ni a, kan inpawh a kan innela kan nui dun a, thu a chhia a tha kan in hrilh hreh lova, chanvo kan neih kawngah kan inlawmpui a kan inhau hreh hek lo. Kohhran & Khawtlang hmasawnna tur zawk a nih beisei a her danglam kan duh dan thlengin kan ngaihdan a inang thin. A ni hi chuan ka el tih a in hre hauh lo, ka kawm rual ka umphak loh tur a a awm ve hrimhrim hi ka tan vanneihna a ni. Hman atang tawh khan elpui neilo ila ka hringnun hi a hovin a tlaw ngawt ta ve ang. Chhiartu...nang engkawng nge i zawh ...nang aia thiam / tithei zawk an awm em ? Hmasawnna rahbi pawimawh tawpkhawk chu elpui neih hi a ni.

YMA Leihlawn/Pliers a bo e

YMA Leihlawn (Thing leihlawn) (YMA Day pual, Veng chhung thenfai hnatlang neih laiin) leh thuthleng siam neih laiin pliers a bo va, hmu leh kawl kan awm chuan YMA Hall ah
(Pu Maenga (Hall) ah) tlawmngai a dah mai turin kan ingngen a ni.

Taitesena Section

· Branch-in min ngen angin T-Sec huam chhunga bawlhhlawh bawm Branch-in a dah chu, mahni In bul theuh a mi, T-Sec Commitee member ten lo enkawl maise tih a ni.

· YMA Day thlir let a ni a, YMA Day Miss leh Mister kan chang ve chu lawmawm kan ti hle.

· Items kan hman thin te hi mizo infiamna lam leh a phawk chhuak theih zawnga hman thin nise kan ti.

· Banner min tum saktu Pu C.V.L.Siama Sec.Fin.Secy hnenah Section chuan lawmthu a sawi a ni.

· YMA Day intihsiakna kan neih a section pum huap a pahnihna kan nih chu lawmawm kan ti hle a ni.

· Section sum tuak nan hna thawhtur min siam saktu Pu C.V.L.Siama Sec.Fin.Secy chungah lawmthu kan sawi bawk a, Rs.2500/- kan hlawha kan lawm hle.

· Dt.30.6.09 Section Committee chuan Committee member atan heng mite hia aruat belh 1) Tv.Lalthakima Pautu. 2) Nl. Mimi Lalchhuanmawii

· Kan Section a mithi lumen ngai an awmin Executive Committee member te chu sawhchiar siamnaah kim thap thin nise tih a ni.

sd/- Secretary
Taitesena Section, YMA.