Tunkar Thuvawn


Taimakna, Tumruhna, Tawngtaina leh Pathian Thlarau Thahrui hi Mihringte chakna a ni a, Hmangaihna hi Thinlung Damdawi a ni.

Tunkar Thuvawn


Taimakna, Tumruhna, Tawngtaina leh Pathian Thlarau Thahrui hi Mihringte chakna a ni a, Hmangaihna hi Thinlung Damdawi a ni.

Branch YMA News

Project Sub-Committee Thuchhuak
Dt. 7.5.10 ( Friday) Zan Dar 9:30 khan Branch YMA hnuaia Project Sub-Committee chu an thukhawm a, chuta thurel te : -
1. Miharsa te In sak sakna tur kalpui zel dan tur ngaihtuah ani a, hemi a tan hian Branch Com mittee ten mahni remchan ang zat zat thawh theuh tum nise tih a ni.
2. Miharsate In sak sakna tur hian Vengchhungah tanpuina dil awm deuh te hnenah tanbuina dil ni se tih a ni.
sd/Secretary
Project Sub-Committee
Family Land Record Survey
Central YMA atanga Family Land Record Survey nei tura Branch tin YMA te min tihna chu section tin ten mahni Section huam chhungah Survey hi lo nei tura tih kan ni.
sd/-Secretary
Br.YMA ITI Veng
Lawmthu Sawina
C.YMA Platinum Jubilee Football Tournament Dt. 4.5.’10(Tuesday) khan kan Veng leh Champhai Zotlang ‘East’ nen inkhelin, vanduaithlak takin kan hneh zo ta lo a, Tournament kan khelh chhunga min tawiawm turte zawng zawng leh tanpui kan ngaihna apianga min tanpuitu leh ei leh in min tumsaktu zawng zawngte chungah lawmthu kan sawi a, amaherawh chu vengchhung mipuite beisei ang kan thleng ta lo erawh pawi kan tiin, in mi ngaihdamna kan ngen nghal bawk a, hun lo kal zel turah vengchhung mipuite tun aia nasa lehzuala tangrual zel turin kan in sawm zui tak meuh meuh bawk a ni.
Sd/ Secretary
Sports Sub-Comtt.
Br. YMA, I.T.I Veng
Editorial Board Insiksawi
Kum 2010 chhunga YMA News ITI Veng Editorial Board chu siam rem a niin News Editor-ah Tv R.Lalmuankima s/o R.Lalbiakvela leh Tv P.Lalmawizuala s/o P. Rohnuna te ruat an ni a, Production Manager atan Nl Esther Zonunhruaii d/o H.Lalramnghaka te ruat thar an ni.
Khuangchera -Section News
Social Meeting ropui tak neih tur a ni a, Section Member zawng zawng te kim taka tel theuh turin kan insawm a ni e. Hun hlimawm leh nuam tak hman tum ani.
A hmun : 3rd Bn. Badminton Hall
A hun : Dt. 27. 5. 2010 (Thursday) Zan Dar 7 : 00
Concert !! Concert !!
A hun : Dt. 14. 05. 2010, Dar 7:00 P.M
A hmun : I.T.I YMA Hall
Concert hi Khuangchera Section Property House sakna tur tanpuina a ni, Vengchhung mi zawng zawngte Concert en turin ka sawm a che u. Ticket hi hun remchang hmasaah Vengchhungah zawrh ala ni dawn a, khawngaih leh tlawmngaia min leisak theuh turin Vengchhung mite kan ngen e.
Dt. 14.5.’10 (Friday) Chhunah Concert-na turah hnatlang neih tur a ni.
sd/-
Secretary
Khuangchera Section

Tualchhung

Tuak Thar
Lalramlawmi D/o Vanlalmawia Insp leh Lalnunzira S/o Lalchawimawia K-Sec te chuan Dt.7.5.10 khan "Tiam tlat e’’ an ti ta.
Chhuanawm
Mizoram Open Swiming 2010 LAD Picnic Spot a neih Zawh takah khan Kan veng Tlangval Samuel Vanlalnghaka
s/o S. Zodinpuia V-Sec chuan 20 m Backstroke-ah Bronze me dal a la.
Damlo

Dothangi W/o Zoramliana T-sec (Civil Hospt.)
Pu R.Lalthankima H/o Pi Thanghlupuii T-sec (Greenwood Hospt.)
Section Hnatlang
Dt 7.5.10(Fri) khan T-sec TMA te chuan vawk an talh a, Tin, Dt.8.5.10 (sat) khan K-Sec te leh
Ch-sec YMAte chuan an talh bawk a ni.
YMA Players
Vawiin tlaiah hianYMA
Football Players zawngte kan Jersey hak nen YMA Run ah Dar 3:00 pm ah kim vek tura ngen kan ni a, hetah hian thingpui in hona hun hman a ni ang.
World Cup Fixture
FIFA World Cup Fixture chu GSA te’n Rs 10/- lekin an zuar e. Pu Lalhruaitluanga Sammehna dawr ah lei theih reng a ni e.
Tunkar Library
Duty turte
Tv. Lalchhanhlua & Nl. Zoramsangi

Chhiartute Huang

Dawr kawtah te hian naupang kumtlin lo meizial zu ru an va tam thei em! Han en ve te u.. - Sesi-a
Kan V/C hmasa te khan hnatlang an koh in phatna an la tlem hle si a, engnga ti nge tuna kan V/C te hian an lak tam tak mai? NLUP sum tur an tuak em ni? Ava mak teh thut ve. - Thahnemngai-a
I.T.I Veng- Bazar Line Bus-a chuang thin sikul naupangte hian, aia upate thutna ken nachang an hre miah lo. Hmanni deuh khan Govt. Sikul naupang 10 chuang ka chuanpui a, tumahin tar kenna chang an hre lo. Tlawmngaihna tura inzirtirna thangtharte hian an dawng tlem ta em ni? Nge an zawm peih lo.
- Cancerian Boy
Veng mawng nihna hi ava lang ve, abik in Vengthar hi pheikhawk charna hnim an tam khawp mai..VDP ho hi khawnge an awm zawh tak? Thawmhnaw pawh kan zar ngam lo..Min rawn ngaihsak teh u..Pi Zami leh Pu Lakho-a te in inkar hi rawn ngaihven teh u khai!! - Vengthar Pa
Kan Veng-ah hian Band tha tak siam ila, min promote-tu tha tak an awm thei a ngem? - Da Rev ac
Tun hma zawngin kan Veng hian fainaah Pakhatna kan la ziah a, chuvangin tan ila thar leh ang u, a chhan chu kan Veng hi tuman an tluk ngai lo.
- Mr. Chapal
YMA Football players-te in tha a, in fit khawp mai, mahse mahni duh duhna line-a tlan tum player kan nei kha a luhai thlak ani. Chitih lai chuan kan hruaituten an lo pawmpui mai kha avanduaithlak bawk. Kotlang A Team lo au ve tauh tauh tan pawh Substitute siam loh kha chu a pawizia kan lo hre ve a, a na a sin....Hui..Ha.
- Rock@18
Kan Veng Futbol Fans tap chung leh ngui taka an au kha keizawng ka dem lova, thinrim aw rawl an chhuah pawh ka dem love, Man City in khatia Spurs hneh zolova UCL an khelh theih loh don chiah khan City Fans Naupang pakhat chuan a pa hnenah School chawlh a dil tawp, a chhan chu an Klaszah 95 % chu Utd fans an nih vangin.ITI Vengah hian Futbol hi kan lo hlut ve ta hle mai tih mi ngaihtuah tir ta rum rum a. - Mr. Mourinho
Hmangihna zunzamah i uai ve tawh anih pawhin zak suh miropuite pawh an chau fo a, miropuit kawng i zawh ve mai ani, mihring inih vangin i tawng ve mai a ni. Hmangaih hi inneihnaah a tawp kher lo tih hria la, i duh loh tur ilo hmangaih vangin thil ti sualah inngai suh. Hnawl leh phatsan ilo nih pawhin, i hmangaihna chu a thlawnah ngai suh. I hmangaihna chu chhan let anih loh pawhin inchhir suh, midangte hmangih tura duan i ni miau a. nagma hmangaihtu che erawh ngainep suh la, hmangaihna haidertu ni suh ang che.. - Mr. Emp da Gates
Kan Veng hi a lo thianghlim zawk theihnan tan ila tlang ila a bikin Vengthar lam hi thuneitute’n endik se a tha ang. Zurui leh Dendrite hnim thin ho hi an hnawksak tlat... - Mr. Tom Tunlai kan Veng boruak teh nuaih tak hi chu..hh! Lal lallai hun ang mai in, Phat hnatlang kan ko tluk tluk mai zawng a nih hi, Phatna lah chu a tam em em mai lehnghal nen, nitin eichawp zawnga inhlawh tan chuan ava hahthlak thin em, nilenga hahtaka kan hlawh chhuah 1/3 han pek chuan, chan ava tlem duh ve le.!! Kan khawtlang hotute hian a ruk nilovin, a langin min rawk ani ngawt a lawm le...ee..Hui ha. - Thangharsaa
Pu Editor, kan lo vei ve lawks. Ka nVeng V/C ten hnatlang phatna tling khawm an dah that khiau khiau kha YMA hmalakna atana miharsa Insakna atan han contri hlauh mai se, ava ropui dawn em...m tih chu ka lo vei ve mai mai a.. - Burkhawni Pa
Kan Mini Market Building tak hi chu..h.ava beitham tik tek ve le..Rs.Nuai 7 Senga sak si I.T.I Veng hi min va ngai nep awm em em ve, kan leng tlem awm mang e? Engtikah nge Opening Function an buatsaih dawn?? Tunge hawngtu tur ni ang aw aw?? Hetiang building hawntu nih chu kei chuan ka va duh lo e.e.e - Bakvawmte Pu
(Chhiartute huanga thu chhuah zawng zawng hi Editor ngaihdan a ni vek kher lo. Chhiartute huanga thu thawh na tur no. hi thlak a ni a, tun atang chuan 9615234556 ah thawn tawh tur a ni.)

SUNNA

Thangkhaia (58)
(1952 - 2010)

Thangkhaia, K-Sec chuan Dt. 5.5.2010 khan chatuan ram min pansan ta.
An kalsan tak an chhung leh khatte YMA member-ten kan tawrhpui a, Pathianin awmpuiin thlamuan zel se kan duh tak zet zet a ni.
"Kan thawhrimna te hi kan zawh hun chuan
Hmangaihte nen Zion Ram mawiah
Hal lo te in kan leng za dawn si
Aw ka ngahkhlel chu hun tur chu......"

Editorial

YMA hi tlawmngai Pawl a nih angin Pawl thenkhat leh Sorkar lam atangte pawhin phungbawma sawmna kan dawn thin te lo hnial emaw a remchang thin lova, chuvang te pawh chu ni fa hmiang kan Branch YMA meuh pawh hian hetianga sawmna hi a dawng ve cham chi mai. Heng hunahte hian YMA te hi a puitu kan ni mai a, thutawp zawng zawng siam thei kan ni lo tih hi kan hriat fo a ngai thin. Hmanni deuh lawkah YMA in NLUP Survey-ah Sorkarin thawhpuia min sawm angin kan thawk a, mithenkhat hrethiam lova YMA-in NLUP dawngthei tur a thlang emaw lo ti a lo phun te pawh kan awm, Sorkar hmalakna a nih ang ngeiin YMA thlan rual a ni lo. Tunah pawh BPL Survey Br.YMA chuan a thawk leh dawn a, hetah pawh hian YMA hian BPL a awm tur a thlang dawn lova, BPL List a tel tur atana tulte Chhungkaw dinhmun hrang hrang an rawn zawt chhuak dawn mai chauh a ni. Hei hi Sorkar lamin tanpui tura an sawm vang bawk a ni a YMA hian a thlang dawnlo tih hi kan hriat nawn fo a ngai ang.

Hnatlang


Tunkar Quiz

1. FIFA world Cup a Mascot neih tan kum?
2. Mizo footballer zinga " Rookie of the Year award dawng hmasa ber"
3. 2010 FIFA World Cup Theme Song leh a phuah tu ?
( Dt 14th May 2010 ral hmain a hnuaia No ah hian a chhan theih a ni.)
EPL tawp zan te a ni bawk he lam hawi hian kan han ti deuh a, Mizoram GK etc leh quiz rawn tih thin a ni dawn a ni - Chhang duh chuan SMS hmagin 9862223142 ah hian thawn theih a ni e.
Chhang dik vek pakhatna atanga pathumna lawmman tha tak pek an ni ang.

Article

THE FOOTBALL ASSOCIATION OF ENGLAND &
Mizote leh Football
- P. Mawia
News Editor
Tun tum chu ni dang ang lo takin hun i han hmang dawn teh ang, zanin hian EPL chuan a vawrtawp zan alo thleng dawn ta reng mai a, khua a har dawn hle mai.Chutih lai chuan nang leh keiin a, zan khaw tairek thlenga kan meng na hi a tobul leh engtikah chiah nge Mizote’n a Football hi kan khelh ve tan tih hi a tam zawk chuan Vaivakawn Field a tang taka kan au dum dum lai hian?? hriatna tlem i han ti zau ang aw !!!
Kum 1942 vel khan Indopui avangin Mizoram sipai an rawn tam hle a, heng sipai lo awm hian Hockey aiin Football khelh an uar zawk a, Lammuala inkhel entu tam tak pawh Football a ni ta mah a.1944-ah High School hmasa ber kan nei tan a, an ni hian Football an khel uar hle,1945 chhovah Shield / Cup inchuhte a lo awm ta a ni.1940-1945 chho hi Mizoten Football kan khelh tanna niin a lang. Pheikhawk pum bun tur kan neih that tawk loh vangin Sipai ho kan hneh hlei thei lova. Kum 1947 khan Pachhunga Football Cup inchuhna ah High School team-in Sipai an hneh a, hei hi Mizoten Football intihsiaknaah kan hneh hmasak ber tum a ni.
]THE FOOTBALL ASSOCIATION OF ENGLAND : Mizote’n a EPL kan tih te, FA Cup kan ti a kan lo tui pui ve em em ho khaikhawmtu Association hi i han bihchiang teh ang.The Football Association Of England hi Football Association ding hmasa ber leh Football tungnungtu pawimawh ber pakhat a ni.
Din a nih dan : Football thlipuiin England ram chu a nuai reh thei tak tak lova, an inkhelh dan chu a rumra thin em avang leh Games dang pawh ngaihtuah hlei thei lova, football khela an innuai fo avangin an Lalten inkhelh an khap fova, chuti chung pawhin football khelh chu an tuipui reh thei chuang lo.Oct 1863 khan infiamna lama hruaitu,football tuipui zual deuhte chu Freemanson Tavern,Great Queen Street, London ah kalkhawmin "The Football Association of England" an din ta a.President-ah A.Pember an ruat a, Honary Secrectary ah EC Morley an ruat bawk.
A hnu rei loteah Harrow, Charter House a meeting chuan Football dan mumal tak siam an rawt zui nghal a. An vawithum thutkhawmna chuan JC Thring of Upping Public School Asst Master a dan siam chu an pawm a. Dec.1.1863 ah an vawi ruk meeting na chuan an tichhuak ta a. Hei hi Football dan mumal tak an tihchhuah hmasak ber ani ta a ni. He meeting hian Mr.Cambell (Blackheath) chu Treasurer ah ruat a ni a.Kum 1868 atangin President leh Treasurer an thlang a ni.
Kum 1880 khan Football Association chuan FA Cup leh International Fixture a ti chhuak a, Professional player hmasa ber an nei ta. Membership te siamin Association ah in affliated a ngai ta a.Club 128 an in affliated nghal nghe nghe a ni. Team number zat pawh 10 atanga 15-ah an siam a, Kum1882 ah number khel tur zat 16 ah an belh leh a, FA Cup chu 1883-84 khan mumal takin an tan chho ta ni.
Tichuan, hun a lo kal zel a, Football chuan Zuitu ngah telh telhin tunah chuan khawvel pumpuiah infiamna larber lawrlak a lo ni ta. English Premiere League hi Kum 1991-1992 Season a tang khan tan a ni ta bawk.

Open Letter To Editor

To,
The Editor
Y.M.A News
Ka Pu,
Ka thu rawn ziah hi i chanchinbu zahawm takah min lo chhuah sak turin ka ngen a che.
Mualpui to New Market Service Bus kan nei a, kan Vengin nasa takin hma pawh a sawn phah khawp mai, a lawmawm khawp mai. Amaherawhchu Passenger seat chungchangah hian tlem sawi ka duh deuh chu naupang zawkin aia upa-te seat ken nachang an hre lo nge, an kian duh lo? Pitar putarte an din reng laia tleirawl te te thu reng mai han hmuh hian ka ngaihtuahna a thui khawp mai. Kan Mizo nunmawite pawh hi a chuai zo mai dawn ta em ni te ka ti thin.
Hemi chungchangah hian YMA leh chungkaw tinte hian inzirtir thar leh ila, kan khawtlang atang ngei hian Zonunmawi bul i tan tha leh ang u hmiang.
Zotea Pa
I.T.I Vengwl, Aizawl

To,
The Editor
YMA News
Subj : Sport Fund
Pu Editor,
Vengchhung engemaw tul bikah thawhlawm khawn a nihin, Receipt hman a ni thin a, Receipt tel lova khawnah YMA News-ah thawhlawm thawhtu leh a thawhzat chhuah thin a ni. Tun tum YMA-in Y.M.A Football khelhna tur senso phuhruk nan vengchhungah thawhlawm khawn a ni a, a then Receipt pe in, a thenah Receipt tel lova khawn a ni a. A khawntute rinhlelh vang ni lovin, kan thawh ang zat a thenglut em? Tih leh engzat nge tlingkhawm tih hriat theih nana YMA News-ah chhuahawm tak, tun thlengin chhuah mumal a la ni si lo. Receipt tel lova khawn phei chu chhuah ngei awm tak hi a ni a. Pu Editor hemi chungchangah hian YMA hruaitute nge mawhphur a, Sport lam hruaitute? Khawngaihin min hrilh teh. Receipt tel si lova YMA News-ah tarlan ni bawk si lo. A thawhtute hi min ngainep tlat niin ka hria. Hetiangte chuan a lehpek awm sela, thawh an ti chakawm lo vek a lawm le!!
From L.T. Mawia
I.T.I Veng, Aizawl
( Kan Tla fel chauh a ni a, lo nghak hram hram rawh, karleh lamah rawn tarlan hram tum a ni e)

V/C HRIATTIRNA

India ram Chhiarpui thawh khatna House Listing Operation leh NPR (National Population Register) chu May ni 15 atanga tanin June ni 30 thleng neih tur a ni a. Hemi chhung hian Chhiarpui hnathawk tute intinah lutin zawhna pawimawh tak tak an rawn zawt dawn che u a, anmahni lo tawiawma, a tul anga lo tanpui tur leh an zawhna te dik taka lo chhang turin mitinte hriattir leh ngen kan ni, an zawhnate diklo taka chhangtute leh ngai pawimawh lotute chu Dan anga man leh chawitir theih an ni ang.
RAN KHUAHKHIRH CHUNGCHANG
Tunlai hian Ran khuahkhirh chungchangah mi thenkhat kan in thlahdah hle ani tih hriat ani a, tun atang chuan Ran , Ui, Ar pawn chhuak V/C ten kan hmuha, a nei tute kan hriat bawk chuan Dan bawhchhiat man leh thu awih loh man an phu tawk hremna Rs.500/- thleng chawitir an ni tawh dawn a, in ngaihdamna a awm tawh dawn lo ani tih khawtlang mipui hnenah kan han puang ani.
V/C Hnatlang koh kal mekah , Venchhung-a chhiattawhna avangin thulh rih ani a. Tunkar lo awm turah neih leh ani dawn
Dt.11.5.2010 Thawhleh niah Vanapa Section huam chhung hnatlan ani ang, Innghahkhawmna : Biak In kawn
Dt.12.5.2010 Nilai niah Khuangchera Section thawh tur ani ang, Inghahkhawmna : Pu Ramngaihzuala Kawt
DONATION KHAWN CHUNGCHANG
I.T.I Veng Village Council/Court thuchhuak angin, tun atang chuan I.T.I Veng V/C huamchhungah V/C phalna leh hriatpuina tello chuan Donation khawn khap tlat ani tih kan khawtlang mipuiah kan han puang a, he khapna thupek hian Pawl, Association leh Organisation hrang hrangte a huam ang.
sd/-
Secretary
V/C, I.T.I Veng

VDP NEWS

Remruata s/o Lalvela leh Lalrinzauva s/o Zarzokima(L) Dilkawn khua te chu Remchhungate mobile phone-an ruk avangin, I.T.I V.D.P Duty-ten an man a, an pahnih hian Police- hnenah hlan nghal an ni.
Secretary
V.D.P Unit
I.T.I Veng, Aizawl

LAWMTHU SAWINA

Dt. 5.5.2010(Wed) tlaia ka nupuiin accident/vanduaina a tawh chungchangah ahmuna lo hmu hmasa tute, a tul ang apianga lo buaipuitu zawn zawngte chungah lawmthu kan sawi a, a bik takin Taxi a phur chho a, a tul ang apiang, ahmuna tlawmngai taka min buaipuitu Dawla (Rep. Veng) te leh ahmuna kalpui tute, ahnua in lama min rawn kantu zawng zawngte chungah lawmthu kan sawi tak meuh meuh a, Chanchinbu a lawmthu kan sawi hi mimal tin hnenah lawmthu kan sawi naa min lo ngaihsak hram turin kan ngen a, in mi khawngaihna leh tawngtaipuina avangin that lam kan pan ve zel e.
In khawngaihna dawngtu
Zoramlianate chhungkua
I.T.I Veng

Subscribe to: Posts (Atom)