Article

RAMNGAW-IN SIK LEH SA A NGHAWNG DAN
(GLOBAL WARMING)
James Lalthanmawia T.Section

Kan chenna khawvel hi a kum telin a dinhmun hi mithiamte chhutdanin a chhe tial tial nia hriat a ni a, chu boruak that lohna avang chuan mithiamten kum zabi 18 chho vel a tang khan kan environment hi an lo zir tan a, kan rama kan hmelhriatna chu rei pawh a la nilova, a tawngkam ‘environment’ tih pawh Zo tawngin dah chhuah chiah nilo mahse a nawlpui chuan zo tawng angin kan hmang mek a, a sawi tum leh a kawh tum pawh kan hre tlangpui a ni.
Kan hmelhriatna a la rei lutuk lo na in, mi ramah chuan an lo buaipui viau tawh a, kan ramah chuan hriat leh buaipui kan rual a ni deuh ber e. kum 1985 kum daih tawh a scientist ten Antartica chungah Ozone chu a pan tan a ni tih an puan khan khawvel ram tam zawk chuan an bengkhawn duh vak lova , kum zabi 20 naah chuan nasa takin khawvel boruak danglam tur leh natna a biktakin Virus thar lo pung tur South East Asia velah anih an rinthu 1985 kuma Scientist ten an lo puan chu atakin SARS leh Bird flu H5N1, Swine flu H1N1 ten min tuam chho mek a nih hi! American Scientist te chuan a hmun leh hun chauh nghaka a ven dan turah an inbuatsaihna zarah India pawhin an hnen atangin a damdawi leh material te cheng tam tak man an lei phah a ni. Heti taka khawvel chawkbuai thei thil a nih avangin he khawvel sik leh sa danglam ta lutuk hian tunhnaiah zir pawh a hlawh nasa a, kan sawrkar ngei pawhin Pi Indira Gandhi hun lai daih tawh khan ruahmanna han siam thin mahse a taka hmanna chu a tam lem lo a ni. Amaerawhchu, India hi khawvel ram tam tak ngaihtuah chuan tun dinhmunah chuan ramngaw humhalh kawngah chuan hma la chak pawl tak chu a ni.
Ramngaw a thing te hian kan chenna boruak vawn thianghlim kawngah hian nasa takin min puia, Carbondioxide khawvela mi hi an hiplut a, tichuan kan mamawh em em Oxygen min lo peta thin a ni.Mithiamte tiluhaitu pakhat chu kum 1900 atang khan khawvelah carbon dioxide hi apung lam zelin a thanga 1.0mg/Kg/year in apung anga chhut a ni. Zawhna awmthei chu, ‘eng-nge carbondioxide pung hi kan tana a that lohna?’ Leh, ‘eng vang a pung nge?’ Heng zawhna te hi kan ngaihtuahnaah kan dah reng chuan khawvel Sik leh Sa danglamna chu awlsam takin a hriat fiah theih a ni.
Tunhma chuan he Carbondioxide pung hian kan nun phung tibuai lutuk lo turah ngaih a ni. Mahse kan ramngaw te kan tihchereu nasat em avangin kan buaipui ber te zing a mi a lo ni ta a , hetiang ang renga kan ramngawte hi tih chhiat a nih chuan kan khawvel hi Degree 3 atanga degree 8 vel thlengin tun atanga kum100 velah pung chh o tur a ngaih a ni. Hetiang taka khawvel a lum chuan khawvel chu chenna a tan chuan a tlak vak dawn lo a ni. Tin khawvel lum chho zelah hian Khawvel chhim leh hmar a mi vur te a ti tui ang a, nasa takin tuifinriat a lo lian anga, khawvel ram tamtak hi a chim bo dawn a ni. Abik takin Holland leh Bangladesh ram tan te hian a hlauhawm em em a ni. Chubakah ruah sur dan leh kan Sik leh Sate ti danglamin nasa takin ei leh barah harsatna min thlen thei a ni.Kan India ram ngeiah pawh kumin chu ruahsur dan mumal loh avangin India economy-in a tlak hniam phah a ni. Kan chenna khawvel hi Carbon dioxide hian a tuam chhuak vek a. Ni atanga nizung lo kal hi chaktak leh frequency sang taka a lo kal vangin he carbondioxide gas thuahthip chu awlsamtakin a rawn paltlang thin a, kan chenna lei a rawn thlenin a sawhkhawk let leh thin a, mahse a chakna tha /frequency alo hniam deuh tawh mahse he Carbondioxide thuahthip chu a paltlang leh a ngai thin a ni. He carbondioxide inthuah hi tunah chuan a chhah tak em a vangin Nizung chu a chhuak thei ta thin lova, chuvang chuan kan lei chu a lo lum tual tual ta a, hei hi Sap tawngin “Green House Effect ” tiin an sawi thin a ni.
Ramngaw, Carbon dioxide titlemtu hi kan humhalh leh kan zauh a ngai tak zet a ni. Ramngaw avang hian a hun takah Sik leh Sa kan neih thin te pawh hi neih theih a ni. Tun hma kan ramngaw a la that lai chuan ruah sur thlengin hunbi kan Pi leh Pu ten an chhiar sual ngai lo, tun hnuah chuan chhiar sual pawh kan ngah ta hle mai. Kan ramngaw tha neih te chu Lo a-tan kan vah a ngai bawk nen a chhung a cheng Ramsa leh Sava te lah kan tichereu tam tawh bawk si a, ngaw tha lah kan nei mang tawh lo, hetiang tak a kan zoram ramngaw tha kan tih chereu zel chuan zoram chu chenna tlak a la nilo thuai ang tih chu hai rual a ni lo. Kan lo neih dan te hi kan bansan a ngai tawh a ni. Kan Lo hal vanga kan boruak tihchhiat zozai man te hi tam tak a ni. Heng boruak tha lo kan insiam avangin ruahtui..(phek 3-naah chhunzawmna) pawh neutral 7pH nithei tawh lovin Acidic lam a awn tan tawh a ni. He kan lo hal hian ramngaw a tih chhiat bakah kan chenna khawvel boruakah nasa takin carbondioxide te a pe chhuak a, nasa zawkin khawvel leh kan zoram ngei te pawh a lo lum phah ta a ni. Tunhma chuan Rangva In a tam chuan an khua chu a lum bik tih a ni thin a, tunah chuan rangva mai nilovin ramngaw kan neih that loh chuan khaw lum chu kan hmabak leh kan siam chhuah a ni tih kan hre tan tawh a ni. Mak angreng tak chu khawvel sawrkar lian America ang te hi he carbondioxide gas siam chhuak tam ram an ni a, ti tlem tur a ram te zawk ten an nawr pawhin a ti tlem duh hran lem lo tlat.
Japan rama Kyoto summit leh Brazil leh South Africa a Earth summit an neihah pawh, he carbondioxide chungchang hi an khel rei ber ziah a, mahse America berin a pawm theih loh avangin a la hlawhchham zel rih a ni. America-in a pawm theih loh chhan chu a ram hmasawnna leh hausakna te a tihbuai dawn vang a ni.
Khawvel pumpui ramngaw awm zinga za a 26.5 hi Brazil-ah a awm a, Zire-ah za a 9.2, Indonesia-ah za a 6.1, India, Peru, Angola leh Bolivia-ah te hian za a 3 vel a awm a, a dang zawng chu ramdangah tlem te te in a insem darh a ni. Kum 1988 khan khawvel mithiamte chhut danin ramngaw atanga sum la lut ram hi ram 40 vel awm ang a chhut a ni a, tunah erawh chuan ram 10 pawh an tling tawh lo. Brazil leh Indonesia- ah te ramngaw tha tak tak an tih chereu avangin khawvel pawh hian kan tuar mek a ni. Ramngaw atang a mamawh kan lak hi sawisen a nilova , a lian thamah chuan insakna, furniture leh thingtuah atan nimahse ram tam zawkah chuan mihring lo pung in chenna a tan kan nek ve mek bawk Ramngawin boruak thianghlim min pekna ringawt pawh hi humhalh tham a ni.Mithaimte chhutdan chuan hectare biala ramngaw hian kum khat chhungin carbondioxide 3700 Kgs a hipral thei a, Oxygen 2000 Kgs a siamchhuak a ni an ti. Thing hnathawh hi khawl hmangin tithianghlim ve dawn ila thing pakhat hnathawh ang thawk tur chuan cheng maktaduai thum leh nuaisarih zet sen a ngai dawn a ni.
Heng boruak min siamsak bakah hian lei min tur min vensak a, Mizoramah pawh kan tuar nasa hle. ‘City of Sylpolyne’ an tih fiamthu mai mai hi. Mithiamte chhutdan chuan Metre sawma hlaah hian thli leh ruahin lei 1460 Kgs a len bova, tin metre 600 a hla ah chuan 3840 Kgs zet a len bo thei a ni. Ramngaw kan neih that poh leh ‘Soil erosion’ kan nei tlem dawn tihna a ni. Ram changkang apiangin thing hlutna an hria a, phun an uar a, humhalhna chang an hria a, thildang tam tak aiin an dah chungnung thin a ni.
Kan thenawm ram China-ah te khian kum nga chhungin thing tlukleh dingawn sawmpanga zet an phun belh a ni. India ramah pawh Thingphun ni ‘Vanmahotsava’ te kan nei a. Mizoramah pawh Green Mizoram beihpui June 18, 1999 khan thlak niin, an sawidan chuan hemi ni hian thingkung sing sarih zet phun a ni. China ram angin phun tam thei lo mah ila, kumtin kan phunbelh a, kan enkawl that phawt chuan kan ram chu kan siam nuam ngei ang.
Kan thupuia a landan angin kan ram ngaw hian Sik leh Sa hi a ngawng tih chu phat rual a nil lova, mitin hian mawhphurhna kan nei vek a ni. Mizote hi changkan chu kan changkang chak khawp mai, than pawh kan thangchak. Kristian state pawh kan inti, mahse ramngaw humhalhna lamah leh nungchate humhalhna lamah hi chuan kan thang lo hle niin alang. Hei bakah hian Kristian tihawm loh tak tak ti duhin Nungchate chunga che leh duh thin mi kan han ni te hi a vanduaithlak hle niin ka hria.
He hna, ramngaw humhalh tur hian sorkar leh tlawmngai pawl kuta dah mai hi a tawk lo, keimahni ngei kan chetchhuah a ngai, hun a tlai hma hian kan harhchhuah vat loh chuan kan chenna khawvel leh Mizoram ngei pawh hi ram nuamah kan siam thei ngai lovang. Chuvang chuan mitin ramngaw humhalhna a mahni mawhphurhna kan hlen hi a tul tak zet tawh a ni.

Luiral ramah

Tv Lalrohlua s/oHrangdailova Khuangchera Section leh Lalsangpuii thla 3 leh a chanve d/o Laldinliana te chuan Ni 17.9.09 (Ningani) khan Chatuan ram min pansan ta. Khawhar chhungte kan tawrhpui a, Pathianin awmpuiin thlamuan zel rawh se.

VIVE

TK Sailo

University of Mumbai zirlai literature-ah & nula lama ka Big Boss R.Lalhriattluanga(Vavoha)& a thian ten kan chanchinbu(vive) hi hun enge maw ti atang tawh khan Internet- atangin an lo chhiar ve thin a ni tih ka hriat hian ka lawm em em rualin, mak ka ti zawk hial a, pressure erawh a nasat phah viau a ni. A bik takin vive- hi lehkhathiam rual kal khawm te lo chhiar ve atan chuan ka sit a, ka zahpui a, ka zam lek lek zawng a ni?? Mahse tan ka lak nasat phah a, ka fimkhur phah a, tih sual palh & hriat sual palh neih ka hlauh phah a, ka veng mipui & an nin chhiar tlaka in/an ngaih tur buatsaih hram hram hi ka tum ruh hle a ni.Chu mai ni lovi’n kan veng nula te hi zawng in Quality- hlawm em avang hian tumah ka beisei phak ve lo che u a, ka zuam mawlh lo che u...thu dik a nih vangin tu’n inhelh ka ring ther te lo. University of Mumbai-ah erawh literature-a tui tak, khawvel thil dang zawng zawng aia ka hmuh chak tawh & a hmelthat zia sawi kur nguai tu hian, a hmel that zia a la sawi uar tawk lo ni te’n ka hriat thin, chu mi chu ka tum tawk a ni a. Biak-in hawng ngat a, tiam tlat e,” thihna chauh lo chuan min then suh se” ka la tih pui ngei tur” a awm??
Rualpui & min rual phalo deuh te paw’n Nupui- Pasal an nei sup sup tawh a, School- kal pui thin te phei chuan min vei tuk tawh hlawm a, nei ve tawh rawh” an ti fo ta mai. Ka tan hian a hrilh hai thlak thin teh zawng a nih hi, hei hi ka chhanna che u ni teh se, kei zawng ka luck- lo chhah ve em a, tuman min duh ve lo a nih hi., i thianpa hian ka awih hlek lo: Lawmsangi pa.
Vawiinah hian I.T.I Vengchhak KTP fellowship-ah “ka kawppui duh zawng” tih thupui sawi hawnna ka nei dawn a, chumi kam keuna chu tunah hian kan nei dawn a ni. Ka lawina mipui te’n in hloh hi hlepa an chhiar ka rem ti lo. hawp ho ang u aw.
Sailo kher a ni tawh lo:- Hman deuhah khan ka hnampui kher hi neih ka tum ruh hle thin a, tunah erawh ka rilru ka thlak tawh. Renthlei hnam zawk...
Sailo hmeichhia nupuia nei tu, Pu Moses-a reng a inchhir hi maw??
Presbyterian mi ngei:- Ngaihzawng ka neih ve tawh reng reng hi kohhran dang an ni thei em em a, ka kawp-pui a tan ka duh ber erawh kan kohhran mi ngei a ni si a. KTP Sabela chhum hmin, Upa fa ve tho, mipat hmeichhiat hman chungchangah pawh keimah ang bawka mi thianghlim(virgin) a ni ngei tur a ni.Ka awih chiah lo: Pu Felkima..
Literature-ah a tui tur a ni:- Ka tuina zawng hi a tui ve loh chuan kan inngeih thei lovang, lehkhabu chhiar aia khawchhak film- a ngainat zawk tlat chuan tu’n nge min pui ta ang. Thu & hla lama tui tak ngei aw.....
Thikthu chhe lo a ni tur a ni:- Thik tur awm ngawih ngawih te chu awm bawk mahse, a tlangpui thuin thik thu chhiat hi rilru zau loh vang a ni. Lehkhathiam, zirsang tan erawh thliar hran thiam theih tak tur a ni thung lawi ngei ang.
Ka tan a rinawm bur tur a ni:- Eizawnna avangin hmun hla tak takah hun rei tak tak ka thang bo a lo ngai ang a, a hmelthain, a nalh dawn si a, chung hunah te chuan Tv Dingtea te’n min mutpui rawh” an lo ti mai ang tih a hlauhawm a, mahse tlanchhe ngam & tlan chhe thei tur Pathian neitu dik tak ni thei se.........
Ka nihna ang ang a, min pawm tu:- Ka pachhiatzia te, hmelah chhuan tur ka neih loh zia te, ka thluak burah Bawngek khawro bak a awm loh zia te, chhungte tan pawh a, makpa atan iai awm tak ni bawk, ka awmdan zawng zawng te hmuh hmaih hauh lova, a awmna hmun hla tak atang pawha min hmuchak em em tu, te han ti vel ila!!Awmzenei tak a, ka rawn tarlan ang mi hi ka kawppui duh zawng chu a ni.!!

CHAMPION ZO TA LO

RS Rosangluaia & RS.Rosangzuala Memorial Trophy (U-17) Venghnuai field a Ni 4/9 - Ni 16/9 a neih zawh takah, Junior Alpha ITI Veng te chu Final lutin Final ah hian an khingpui Bethlehem Vengthlang chu sikhat faiin an hneh ta lo. Trophy leh Cheng Sangnga (Rs.5,000/-) an dawng bawk.

LAWMPUINA

Kan Editor Pu Andy H. Lalhlunsanga leh Pi Annette Zonunpuii te chuan Dt 17/9 zan khan fanu duhawm tak an nei ta, Editorial Board ten kan lawmpui takzet e.
(Editirial Board ten a hming atan ‘Sandy Singh Hnamte’ kan phuah nghal bawk.)

SUIHTAK

Lalthlamuani (Mamuani) d/oPu LalthangaTaitesena Section & Vanlalzawma Zonuam te chuan Pathian leh a kohhrante hriatpuinain Ni 18September 2009 (Ningani) khan Zonuam Presbyterian Kohhran Biakinah tiam tlat e an ti. Nupa tuak thar te fanau maltluan chawia hlim taka awm zel turin duhsakna kan hlan e.

Chhiartute Huang

** Tunlai kan thalaite inthlahdah tak dan hi. Zonun zemawi hi kan theihnghilh ta
em ni le? YMA Section hnatlang kan ti a, hnatlang tur pawh an awm tawh lo a ni ber mai. Zonun zemawi hi Nu & Pa te’n kan fa te nunah
chhawmnun tir zel ang u hmiang...
- KIMKIMS.

** Pu Editor, in chanchinbu zahawm tak hi ka lo chhiar ve thin a, ka ngaisang bon
top che u, laikhum tuala ka inngaihtuah chang
phei hi chuan, Zonun ze mawi tap tapin ka au ding zo si lo che’ ka ti vawng vawng zel....
- CATHRINE RENTHLEI.

** Kan Veng hingatinge kan au zo chuaha a dang kan au leh a, a indawt zut thin mai veng thenawma thian te ho ITI veng ho chu
vawiin chu puan tur a awm lo tih kan rawn
puang tih thlengin in au a, MIc hi kan lawm
mah mah a ni lo maw. Hun bik neia puan dan
awm se. Entirnan, tlai dar 5, zing lamah dar 8. Chhiattwh leh tul bik thil chu thuhran nise.
- No thup

** Kan veng ramah bawlhhlawh paih kan khap mek laiin World Bamk kawngah bawlhhlawh
paih an la awm tho mai. VC ten hmalak leh
chi a ni zawk em?
- Kala

** Kan veng Bus fare(Mualpui to New Market) hi to anti velo a mi...? Zemabawk to Kulikawn hi Rs 15/- a ni a, Mualpui to
New Market hi Rs 15/- tho a ni a. A awm tawk hi fare ah la se ka va ti em..
- Bus fare veia

**Pu Editor mahni Birth day pawh hre lo, ama duh zawk zawk Ni ka birthday ti ringawt mai news editor nei nih hi kan veng nen a inhmeh em? Rawn lawmpuitute pawh kha an
khawngaihthlak ka ti e.
- Mr.No Name

**Tunlai rawlthar ho aia upa zahna neilo lutuk hi ka van kham tak em. Khawlaia insual leh ruihtheih thil tih te hi changkanaah an la ngai zui ta lehnghal. Kakham hluah hluah.
- Thasiama Nau.

I TANG FAN FAN ANG U.

by-9863329004

Kan veng thenawm a ka len naah mipakhat nena kan inkawmnaah, thil enge maw kan sawi dun a, chu tih lai in, kan vengin chhiat kan tawh nasat zia te ka sawi a, chu pa chuan "kan vengah chuan, mitthi awm zana tlaivar tur pawh kan awm tawh mang lo, veng a zau a, rorelna fel tak pawh a awm thei lo, thlan laih chungchangah pawh tlawmngaia lai tur te kan inruat a, khawhar lenpui tur pawh anawm mang tawh lo. Tin, thlan pawh hi laih tawh loh mai tur em ni ang tih te pawh kan ngaihtuah rum rum a ni" tih thu a sawi chuan ka rilru a luah khat hle mai.
Mizo te hi Pi&Pu atangin tlawmngai hnam kan ni a, he mite veng hian kan hnam nun ze-mawi tak hi an hlauh mek a ni tih ka hria a, ka rilru a na hle a ni. Tichuan, keimah ngei pawh kain en let a, mite tana ka inpek loh thin zia te ka ngaihtuah a, mimal tak pawha tan lak a ngaih zia min hriat chhuah tir a. Dikna afam mek a, zonun mawi a fam mek bawk a, thangthar ten zonun zemawi tlawmngaihna kan hnuchhawn tan mek zel a ni. 'Aw kan zonunmawi puan ang i chul mai tur hi ka phal thei lo che, par angin lo vul zel rawh kan vangkhua timawi an, hmatiang sawna pheilai min khaitirtu, thang leh thar zawng ten i chawm nung zel ang u'.
Kan veng bikah chuan, lawmna tam tak ka nei a, a bik takin chhiat tawh chungchangah, tumah inthlei bik nei lovin kan la awm a, kan intawiawmna hi a la tha hlein ka hria a, Nula & Tlangval te pawhin keimahni tih theih awm kan la hre riau mai hi a ropui ka ti. Nu & Pate paw’n an tih tur an hai bik lo.Hetianga veng tangrual hi Aizawl khawpui chhungah hian kan tlem tawh hle-in ka hria, kan thawh hona hi a tha a, khawhar In len-pui chungchangahte, tlaivar chungchangah te hian ITI Veng nih man a awm hlein ka hria.He kan tanrualna hi thlah-dul hauh lova tan la zel turin kan infuih a, zonunmawi, tlawmngaihna vawng nung zel a, a bik takin chhiat ni a, kan chet dan mawi tak, mi lian leh mi te hriat hran theih hauh loh va, khawtlang Nu & Pa, Nula & Tlangval te kan chet dan ka hmuh hian hei aia veng nuam hi a awm chuang dawn em ni aw?? Ka ti vawng vawng thin. Hun lo kal zel turah pawh hei ai hian tan han la sauh sauh ila mite tan malsawmna kan ni ngei ang. Awle, Nula & Tlangvalte zonunmawi tlawmngaihna vawng nung zel tur leh tan la zel a, veng dang entawn tlak khawpa thangmawi turin kan in sawm a, kan nunmawi tak tlawmngaihna hi vawng nung zel turin i tang fan fan ang
Aw..!! ITI Veng zonunmawi vawng him a, chhawm nung zel turin tang fan fan rawh, tichuan, i thanmawina hian Zoram hi a deng chhuak ngei ang.

hriattirna & Lawmthu sawina

Branch YMA Executive Committee Meeting

Naktuk (Thawhtan, dt.21.9.10) zing dar 6:30 hian YMA Runah, YMA Branch Executive Committee Meeting neih tur a ni a, Executive member te kim taka kal turin ngen leh hriattir kan ni e.

Lawmthu sawina

Pi Tlanghmimngthangi te chhungkua chuan an Pa Pu H. Lalmuankima boral chungchangah vengchhung mite tawiawmna ah lawmthu an sawi.

Young Star Hriattirna

Naktuk tlai dar 2:30 hian, Aizawl South Zone Football Assotiation atanga lehkha rawn kal a awm avangin Young Star member te Pu K.Lalremmawia te
Inah inhmuh khawm lawk tur a ni .

Mi rethei te tan sum khawlna remchang

Sum nei tam velo te pawhin kan nakin hun a tan a sum khawl hi a inchhir awm loh thin a, tlem te te lo tlingkhawm chu mamawh hunah a hluin awmzia a nei thin, kan vengin Dak In, sum khawlna rintlak kan neih hi i hmang tangkai ang u. Hrechiang duh tan Pi C.kapmawii(T.Sec), Branch Postmaster hnenah zawh chian theih reng a ni e. Dak in hi mi rethei zawkte tan sum khawlna remchang a ni.

ITI Veng High School Managing Board Committee

kum hnih chhung atan Adhoc Aided High School, ITI Veng, Managing Board Committee ruat thar an ni.
1) Pu H.Laldawnga (VCM) - chairman
2) Pu F.Lalkhawchhana (Headmaster) - Secretary
3) Pu Lalchungnunga (DEO representative) - Member
4) Pu P.C.Hranghnuna (Prominent Citizen) - Member
5) Nl. Laltlanthangi (Teachers representative) - Member
6) Pu F.Zochhuma (Parents representative) - Member
7) Pu F.Bawihthuama VCP - Member

sd/- R.LALTHUAMLIANA
District Education Officer
Aizawl District : Aizawl

Vawkpa Chi thlah leh Vawk note

Vawk note tha tak lak tur kan nei reng a, vawk pa chi thlah tu tur pawh kan nei reng e. Englai pawhin koh theih reng kan ni.
Phone - 9862361389

Sa Sat Society Hriattirna

Keini Sa sat society ITI Veng a member nilai te, a thar a member nih a lo hun leh reng tawh avangin member ni duh chuan Rs.150/- in member anih theih e. A hlui kha pawm ani tawh lovang.
Member ni duh chuan Pu Ch.Liankunga hnenah inhriattir tur ani. Tin, member fee pawh pek nghal tur a ni e. Member ni lo tan bazarah sa sah phal a ni lo.

sd/- CH.LIANKUNGA
Treasurer

EDITORIAL

RUKRUK HI

Kan veng chhungah tun-hnai chho hian thil bo a tam hle a. Tin, GAS ruk ching pawh an huang tau sawt-in mi thil ruk ching an hluar hle a ni. Heng rukrukna te hi eng vanga lo awm nge ni ang le? Thalai hnathawh neilo, ruihna tur duh si te zing atangin a ni ber ang em? Nge, Mi pangngai; ruih theih thil pawh ti em em lem lo, mahse eizawnna nei si lo, chhungkaw chawm nan e-maw, mahni tan e-maw a pawisa mamawh ve ngawih ngawih si..?? Nge, retheih ngawih ngawih vang a duh thlan tur dang nei lo...?? Nge, suahsual vang hrim hrim..??
A eng a pawh chu lo ni se, heng ruk rukna hi Pathian duh loh, mihring te pawhin thleng miah lo se kan duh a ni a. Hetiang ruk ruk ching te hian DAMNA an mamawh a, Kohhran leh Chhungkaw tin te hian mawh kan phur lian em em a ni. Kan veng chhunga suahsual rawngbawl thin te hi kan veng mi vek an ni kher lo ang, mahse heng mi te Natna vei RUKRUK hi a damdawi kan zawn a ngai a, khuareia lo lang palh thei pawh a ven dan kan dap sak a ngai a ni. Rukruk leh suahsualna dang pawh a tireh tur hian Mahni mai leh Pawl pakhat maiin a tihreh theih a ni lova, veng mipui kan tan tlan a, engkim kanin hrilh hriat tlan a ngai a, remruatna tha zawk ni a kan hriat te, mimal, kohhran leh Pawl hrang hrang te thurawn pek kawngah pawh inthlahrung hauh lovin hemi kawngah hian thahnem ngai leh zualin tan i han la thar teh ang u.

Inrinni Tuk Bazar a-lun telh telh

Truck Eng Dinna hi Mini Market/Bazar Tur sak mek chu a ni a, Chhawng thum a sak thum phawt a ni. a hmun erawh a zau tawk lo hle.

GSA Volleyball Court pawh hian mipui min zo lo thuai dawn niin alang a, Mini Market thar kan neih tur hian mipui mamawh phuhruk zo tak maw...???






GSA Volleyball Court pawn lam kawng sirah te pawh inpho an awm thluah tawh a ni.


YMA Hall kawt thlengin Thawmhnaw zuar inpho hmuh tur an awm ta fur mai..!!

Vengchhungah thil bo a hluar hle

Tun hnai thla hnih thla thum chhung lek khan kan vengchhungah thil bo a hluar thar hle a, Heng thil bo thin te hi a then chu veng dang atanga rukru rawn kal te tih ni thin mahse a tam zawk erawh hi chu kan veng chhung mi ngei te ruk a niin a hriat a. Hemi kawngah hian vengchhung mipui te tun ai a fimkhur leh zual a ngai a, a reh thuai a nghahhleh awm hle a ni. A hnuaiah hian tun thla hnih liamta lek chhunga kan vengchhung a thil bo / ruk chi hrang hrang te tarlan a ni e.

·· Dt. 8.6.09 ( Thawhtan zan) khan I.T.I Vengchhak Presbyterian Kohhran Gas bur pathum a tak awm vek chu ruk bo a ni.

·· Dt 19.6.09 ( zirtawp zan) khan Pu Lalvela Ar vulhlai Broiler pasarih zet chu ruk bo a ni a. Kan veng VDP the hmalakna a zarah a tuk zing khan Treasury Square-ah a rutu ngeiina lo zuar lai chu man a ni.

·· Dt 7.7.09 Thawhleh zan khan Pu Lalhmingliana T-sec Ar vulhlai pahnih chu ruk bo a ni bawk.

·· Pu Medala te chu an thingzai (4x3) pali chu kum laihawl vel khan ruk sak an ni a, a rutu hi a inpuanna angin ni 3.8.09 khan I.T.I Veng Middle School Office tukverh darthlalang tikehin luh a tum a, Thenawm hnai ten an lo hriat hma hlauh avangin engmah a ru hman ta lo. Tin, hepa vek hian 3.8.09 chhun khan Pu V L Ringa huan a mi Rawtuai chu a khawrh ru bawk.

·· Dt 4.8.09 ( Thawhleh zan) khan Pu H. Vanlalvena huan a thlam chung rangva chu tichhia a ruk tum a ni a, vanneihthlak takin an ru bo hman ta lo hlauh.

·· Industrial Training Institutes (ITI) Office a an Computer hman lai chu a set kimin August thla khan ruk bo a ni bawk.

·· I.T.I Veng Salvation Army gas bur hnih chu August thla vek khan ruk bo a ni leh bawk.

·· Dt 11.8.09 (Thawhleh zan) khan Pi Duhi dawr ( below IKK Church) a mi gas bur sarih zet chu ruk chhuah a ni leh bawk.

·· 30.8.09 (Pathianni) inkhawm hlan khan Pu R. Laldingliana In Ch-sec a mi chu rawk a ni a, hetah hian Nokia Cellphone Rs 5,500 /- man leh pawisaruk bo a ni. A rutu hi man a ni a, Police hnenah hlan nghal a ni.

·· Mini market sak lai mek a mi, insakna bungrua Iron Rod 16mm-3-nos, 12mm-4-nos te chu ruk bo a ni leh ta bawk. Heng te hi 29 & 30 August zan a ruk ni a hriat a ni.

Aw le, khi khi kan veng dinhmun chu a ni ta, veng mipui ten he mi kawngah hian kan tanrual a tul zia chu a lang thei awm e. Kan vengchhunga VDP leh tlawmngai pawl hrang hrang te pawh kan theihtawp a kan tawiawm a tul tak meuh meuh a ni.

Tual chhung

Naute Nei thar

Pu Lalnunmawia (Mawitea) leh Zapari T.Sec te chuan fapa thar duhawm tak an nei.

Damlo Kan Hriat theih te
· Lucy Lalawmpuii d/o C.Lalbiakmawia
· Rebecca Lalnuntluangi c/o Rochungnunga
· HCVL.Chhuanga Ch.Sec

Lawmthu Sawina
Pu K Lalhnaia te chhung Khuangchera Section chuan an fapa Lalramsanga boral chungchangah leh Tv Malsawmzuala (
Maltea) Vanapa Section te chhung chuan an pa Pu Dohuaia Boral chungchangah veng chhung nu leh pa te leh nula leh tlangval te tlawmngaihna leh khawngaihna an dawn avangin lawmthu an sawi.

YMA hnena thilpek
Pu CVL Siama Fin Secy T-Sec / Br. Executive chuan thlanmual a hman turin Bitumen Tray YMA a pe. Tin, Pu Sangtea retailer II pawhin Buara 5 nos. A tul a pianga hman turin a pe bawk. Thilpek petu te chungah Br.YMA chuan lawmthu a sawi

Lawmthu Sawina(Phone tih bo-ah)
Pu R.Lalthankunga te chhung chuan an phone thlauh chhara an mahni zawng chhuaka an hnena pekir leh tu Driver rinawm tak Lalhriattluanga College Veng (MZ-01 E - 8919) chungah lawmthu an sawi tak meuh meuh a ni.

Jersey Thehluh tur
Arang thei angberin YMA Jersey, GSA Volleyball Team ten an hawh kha Pu Maenga Hall hnenah thehluh vat tur a ni e. Hawhtute hming list chhinchhiah vek ani. Tin Jersey hawh man hi pek ala ni lo bawk.

GAS Bur Diklo Lakah fimkhur ngai

He GAS Bur hi chiang taka en chuan ban pali a nei a (Tunlai GAS hian ban 3 anei), hetiang GAS bur hi Sorkar leh Agent ten an duh tawh loh avangin kan veng atangin he GAS bur hi kan venga rawn sem thin ten an dawng a, a dawngtu te hian Agent hnenah pawisa (Rs.3,000/-) an chawi bakah, hun rei tak an eizawnna ber GAS phur thei lo a suspend an ni bawk. He GAS bur hi a neituin thleng leh hram se an ti hle a, he No. ah hian a zawh fiah theih e. (Ph- 9612080779).

Chhiartute Huang

** Kan veng chhunga GAS lo kal thin hi mipui ten GAS bur buk nachang i hre tawh ang u. Mipui ten kan hre lo a nih pawhin VC lam emaw, NGO lam tal hian kan chanvo leh Bukna dik hi chu i thlahthlam lo hram ang u. GAS chungchangah phei chuan mi harsa tak tak kan ni hlawmin Sorkar thu hi i ngai pawimawh hram ang u.
Tin, Veng inlungrual kan nih theihna kawng pawimawh ber chu a mi cheng te ah a innghat tih hi i hre thar leh teh ang u.
- Mr.Onry


** Chibai Editor hei kan veng chhungah thil bo a hluar hle mai a, a hmaa tihdan ang khan Kawnah Savawm-bawm (Misual khungna) siam leh ta ila, thil ruk ching ho dah khawm nan, kan ziaawm phah deuh ka beisei.
- Utd-a.iti.

** Kan veng Y.M.A News enkawltute inpekna
leh taihmakna zarah, Vengchhung chanchinte Website hmangin kan lo chhiar ve thin a, a bengvarthlakin, lunglente pawh a hnem a, a lawmawm kan ti hle, Veng mipuite leh Editorial Board te chibai vek ule.
- Tpa Vangchhia, Mumbai.

** YMA News Chhiartute huanga thu ziak thin thenkhat hian mi tih dan sawisel leh mi tih a tana thu tha pui pui ziak rignawt lo hian an sawi ang hi nunpui ve se kavan ti em..!!
- Sentei Pa.

** Mr Falkland i la hre tlem a ni. Bakah fel taka inrema awmze nei taka thlan laih hi inchuh rup rup ai chuan a hna a sawtin hnuhma a mam zawk a sin. Thatchhiat vang lam a ni lo, kan him tlanna zawk a ni.
- No Name.

** Mualpui Road leh Mini market chhukthla metal road an siam tha hi kan lawm teh lul nen, mahse fur alo ni a, chirhdiak chhangkang hmun an siam ani ringawt alawm. Metal Road chiau thei alo awm ngai a ni maw..!! Kan veng chhunga kawng siam ngai an siam tha leh dawn te ala nih chuan hetiang anga chhia hi chuan kan VC te hian siam phal lo ta law law se atha zawk hial ta ve ang. Tin, GSA Volley Ball Court sir V.Sec panna lam Metal chhe tawh hi
siam ava phu tawh em..!!
- James Dio, Flamboyant & Mr Rio Bento.

** Play Station kan vengin a neih thar hi kum bithliah nei leh kal hmang fel taka tih ni se ava tha awm ve..?? Kei ngei pawhin ka fang tawh a, kum 10 / 15 hnuai lam a tam zawk an ni tlat mai. Darkar 3 te (Darkar khatah Rs.30/-) seat an la a, khawi ami nge pawisa an neih naupang te hian?? An pawisa duhin rukrukna athlen thei tlat. Chu lam chu thuhran pawh lo ni se, tih tur neilova an leng reng ringawt pawh hi a tha ber em..?? Nu leh pa dang te pawhin han
tlawh ve mah teh u..!!
- Fate thatna duh-a.

Chhiartu te huanga thu thawh duh tan, 9862322272 ah sms in a thon theih e, YMA Library Kawngka bul a Letter Box-ah a thlak theih bawk e. Tin, Chhiartute huanga thu chhuah te hi Editorial Board ngaihdan a ni vek kher lo.

PARTNERSHIP TAILORING.

Khaile, tute nge kan nih in la hre lo pawh a ni thei a, a belchiang tawh te erawh an inchhir ngai lo, an pan a, an pan nawn leh thin.An thawmhnaw kan thui zawh sak tawh chinah hi chuan lungawiloh chu khawilamah hlim hmel pu sangin kan dawr an chhuah san a, a man min pek belh hial an chak thin. Vengdang pan ngai lovin kan veng chhungah ngei hmeichhia leh mipa silhfen leh thawmhnaw kan thui thei ta e.Rate hlui hmangin tunah la la pawh hian i duh ang tak a mawi leh nalhin i pian ti mawi thei tur khawpin, kan thuisak thei reng che a ni a, min rawn pan ve teh khai. a inchhirawm loh viau ang. Contact: Ph: 9863222744

CEC MEETING

Nimin (Inrinni) khan Central YMA Executive Meeting neih a ni a hetah hian YMA General Conference Agenda te thlit fimna neih a ni a, tin, Central YMA Staff Service Rules chu ennawn that leh a ni bawk.
Tin, August ni 14, 2009 a CEC Meeting neih takah khan YMA dan bu Siam that rawtna thlir ho a ni a, hei hi Dan Bu ennawn committee in alo ngaihtuah that tura tih a ni. Central Co-ordination Committee (CCC) thlirlawkna neih a ni a, YMA General Conference 2009 chungchangah committee in ruahhmanna a lo duan chhin te enho a ni a, tin, Annual fee pe lo chungchang leh SBI hnuaia Bamk Clerk lal tur chungchang sawiho a ni bawk.

Fuihna Thu

By : Lanthara Ch.Sec

Ka Cellphone thawm alo ri a, ka benga awrawl chuan, "Vive-ah itan hmunruak a awm e" tiin. ka va'n lawm tak em!! Ka mi ngaihsan leh thawnthu ami amaw ka lo tih leh hial thin khawpa ropuiin min han sawm chu’h... Ka khawhmuhte chu a fiahlo tan riau a ka hriat laiin ka harhchhuak leh ta hloh mai. Ka lawm lutuk ani ange. Amaherawh chu ka lawm viau rualin, a lo luahlum thintute ka thlirin ka zam khawp mai. He Arbawm lian tha tak mai hi kei Vate satliah ve tak mai hian ka luah lum zo hian ka ring mawlh lo. He sawmna hi ka tan chuan Nieng ang a ni a, a tel lo chuan Parfung chawi chu sawi loh, thu leh hla lamah hian thang pawh ka thangduang thei lo ang. Ka tana a hlutzia chhut hian “Nunna Thu” ti ta ila, kan Kohhran hruaitute hian min talh-nek em lo ang chumaw..!
Zaikungpui an tih mai Sir Walter Scot-a kha a Naupang laia Khawsikpuia anat vak avangin a chawrche em em a. Tumahin miropui anih chu sawiloh a damrei pawh an ring lo a. Mahse, thi mai ta biklo chu, vawikhat chu Thuziak mite intawhkhawmnaah Tuisik semtu-ah atang a, Robert Burn-a’n Paper a present a. Burn-a chuan Banga Milem intar hnuai a, Hla thu tawite inziak chu tuphuah nge tih leh a chhunzawm a zawt a, tuma’n an hre lo a. Chutia Pindan a rehthiap takah chuan Bangkil a, an tirh hun changrengtu Scot-a chuan a Hla hming, a phuahtu leh a chhunzawm chu a rawn sawi ta mai a. Burn-a chuan Scot-a hnenah chuan, “Vala, Engtikah emaw chuan Scotland Pa-ropui ila ni dawn khawp. I hmakhua thlirthiam ang che,” a ti a. Chu Fuihna tawite avang chuan Scot-a chuan Miropui tak niin Sir nihna hial pek alo ni ta a ni. Keipawh Scot-a iangin leh Vive lam atanga fuihna ka dawn avangin ka Ziakbu inthlep chu ka kaipharh leh ta e. Miin Miropui minti mah suhse, Vive-a Substitution-a ka awm theih avang zawkin, a Miropuite rim nampha tlatin ka inhria.
Khawl tar-lam ang mai a, ngaihtuahna tuiek leh ekchhe chhuah hnem satliah, ngaihtuahna khawro zet zet nei thin thinlung hi enge tuaihnum ang a? Engin nge ka Khupzawi tak hi chakna pe ang? Anih-loh-leh Nun ka dawngdah dawnin engin nge Thahrui min pe thei? Chu thil chu, hringmi lengtinten kan tih theih Fuihna hi alo ni. Tirhkoh Paul-a lehkhathawn pawh kha Fuihna Lehkhathawn ti ta ila, ka thaikawi ziahtial hi min helhsak lem lo ang chu maw. naupangin Fuihtu an mamawh a, Tar lah bang bik hek suh, Thalai lahin kan mamawh hlei hlei bawk si nen, Fuihna thu hi Parfung chawitu anih loh pawhin, Parfung chawi tur a Chawtha petu tal ani ngei ang.
Thu leh Hla lama Ruai buatsaihtu lar Thuamtea Khawlhring chuan, “ Thlalera mi vakvaite chuan Hmar Arsi mai nilovin Tuisik an mamawh tel thin” a ti a. Keini pawh hian kan tum ram thleng tur hian tumruhna leh Hmathlir (Vision) tha tak neiin thawkrim teh mah ila, Kawnglakah kan Danghnawn tur Fuihna Tuisik kan hmuh loh chuan hmabak atawi viau thei awm e. Fuihna Thu kan chhakchhuah hian kan Chil kan sehperthlawn niloin Khualzin dangte Chawtha eltiang leh Damna Tui kan fah zawk alo ni.
Keini ang duang Zofate hi kan a thin. Pawl li pass-chhuak hlim hi a Nu-in heti hian afuih a, “I zir nasat a ngai hle ang, Middle School chu a har tawh teh a nia, i zir that loh chuan i fail a ni mai, an Zirlai a tam tawh nasa mai si a”, tiin. Hetiang a nih chuan engvanginnge Naupangin a zirlai a huphurh lohvang? Huphurhna nena kan cho anih chuan kan hneh ngai dawn silo. “E... huphurh reng reng suh. a harbikna vak a awmlo. tlemin atam deuh a ni mai, tha takin i zir anga, i pass em em ang?” tih zawk tur a ni. Achhanchu, an huphurhna avangin Naupangin mahni inring tawkna (Self-Confidence) an hloh tam tial tial a, an Nunpumin a lo tuar a, an puitlin hnu pawhin Hna zawn kawngahte leh Rualpawlna kawngah an nunin atuar thin. Chumai bakah, i zir that peih loh chuan Hna i thawk ang ti a sawithaihte kan ching thin. Hlauhawmah an ngai nghet tlat a, an puitlin hnu pawhin Kut hnathawh ai chuan dik lo tak a sum hai luh dan an ngaihtuah a, kan Hnam leh kan Ram-in alo tuar ta thin. Chutah hnathawk turin hnamdang (Kawl/vai) rawih anlo ngai ta thin a, min chimral tep tawh chu anih hi. Chuvangin i Inchhung atang khan kan Ram leh kan Hnam hi a chhiat leh that chungchangah i Fate i fuihdan atangin mawh iphur a ni.
FootBaller lar thin tak mai ZICO-a thiltawn hi intarlang teh ang. 1986 World Cup Quarter Final-a an Ram chakna Goal ningei tur a khawvel rin, Penalty Zico-a’n anpet chu’h. (France Goal-Keeper) J.Bats-a chuan alo bengper ta daih mai. An Ram haw chu hreh teh mahse adang hawna tur nei ta biklo chu an ram pan chuan Thlawhna-in a thlawk ta a. Thlawhna atanga an chhuakchiah mai chu’h enge ahmuh. ‘Zico, i vawikhat Penalty petsual avangin kan hmuh hniam phah lo che, nang tluk reng khawvelah an la piang lo’ tih Banner an lo tarkhum a nih kha. Zico a tan chuan a na lo teih teih ngawt ang chu. Beidawnna chu Beiseinain a lo thlak ta a, Lungngaia chu Lunglawma’n alo thlak ta a ni.
Tupawh hian Tisa leh Thlarauvah Fuihna thami kan mamawh theuh a, nang leh kei hian kan bul amite theuh hi an hmalam hun atan a Chawtha nitur Fuihna Thu hi inhan infah tlang tak tak teh ang u hmiang.
(He Article hi VIVE atana ziah a ni a, remchan zawkna avangin Article huang lamah tihchhuah ani ta zawk. Editor)

Village Sensus

Branch YMA Executive hmalakna a, Village Census neih tur kha, a form thar hman tur a nih a vangin lo la nghak leh lawk ila,
office lam a tangin rawn sem thuai tum a ni e.

VIVE

TK Sailo

America president Barak Obama tawngkam zulzui deuhin aw... ka veng mipui te u in 'aw' ka ngaithla ang a, kan thu a in hmuh loh/ in kalh hunah phei chuan in 'aw' ka ngaithla uluk lehzual ang. Issue remchangah kuang siam lawk & siam lawk loh chungchang ziah a ni ang ka tih kha nghakhlel taka lo thlir tu ten in hmuh mai lohna chhan chu, in pawi sawi ka hlauh em avangin uluk leh zuala zirchian ka duh na lamah ka rem tihna/ ka thu pawh la hmasa lovin Kb Renthleia’n nawi takin ka huang hi a rawn hnawh khat ve rawk a nih kha. Valupa...a nen hun chep tak karah veng mipuiin kan khel luih luih hi kan sawi dun a..Kuang..... Hi kan Branch YMA hian thawh phut luhai an sawi ang deuh a, vawileh khata, a thawka phit a ti ngawt a ni lo va, kum engemaw zah veng dang/ khaw dang tih dan hi a lo zirchiang tawh a, ngaihtuahna fim tak hmanga vantlang chunglam kal khawm ten khawtlang tana tha tura an rin leh nakin lawka kan la tih hmabak tho & kan la tih ngei tur nia an rin hi mipui sawiselna tam tak karah an ring ti khawngluiin an thu rel thluk an kal tlangpui hi an huaisen a, kan la tangkai/thatpui viau zawk ngei ka ring. Kan YMA hruiatute hi chhungkuaah & thil dangah pawh mi tul tak tak vek an ni a, mihring ve bawk an ni a, damlohna & harsatna dang dangin a tlakbuak thei ve reng a, an tan chhan hi a awm ve veng vawng viau lo maw...` Entirnan: khawimaw laiah chhiat tawk, mitthi an awm a, a then chu lumen ngai te a lo ni a,tlaivar a lo ngai a, zingah kan mut hmiah theih laiin kuang i/c te hi an mu ve hman ngai lo a, chauh pawh sawi lovin kuang siam a ngai thin. An khawngaihthlak tak zet.Tin, an tlawmngaih loh vang lam ni lovin zan rei tawh lama kuang siam tura han chhuah khawm te kha a buaithlak em em a, a inthlahrunawm na chen a awm bawk, a chhan chu (Electric Randa) Thing nawh mamna han nawr rik chiam te kha a rem ber lo, chhungkaw thenkhat tan harsatna thlentu a nih theih.Ruang chhuak tur a awm chang phei chuan kuang siam chawp ngai a nih chuan hun a duh rei a, an khaw tlai phah duai thei a, chuta chhapah kuang siam chawp tute kha an va che muang ve ti a dem mai an awl dawn ni in a lang. Chhuna thi, boral pawh ni sela kuang siam thin tute kha hnathawkin an kal chhuah a lo ngai a, an dinhmun hi hriat thiampui a tha viau lo maw? Nangmahah han inchan ve mah teh khai..Kuang siam te hi tih na mai a ni lo, a siam thiam bik tan lo chuan khawih ve ngawt chi a ni reng reng lo..Veng thenkhatah te phei chuan Thlan laih lawk an rel tawh zawk. khawvel inher danglam chho zelah a tul a nih chuan kan in her danglam chhoh ve zel a ngaih na chen a awm thin. Hmana kan lo tih tawh dan thin a nia ti a, kalphung tenghneng te te kal pui reng fo hi a fuh ber loh chang a awm ve thin..Dik tak chuan, chhiat tawk an awm ni khuain member mi engemaw zah tlawmngaih a, an hah piah lamah a che hah ber ber te chu kan hruaitute tho hi an ni ti ila kan sawi sual awm love.. Mizo upa in kuang siam lawk an duh ngai lo kan ti teh fo a, hei hi thu belh chian dawl a ni chiah em? Veng dang/ khawdangah chuan eng tin pawhin lo kal pui raw sek sek kan veng bikah chuan tun hnaiah thihna a tam avangin kuang siam lawk vang a ni, a ni lo, Pathian thu thu a ni kan ti a, kan in hnial bang thei ta lo.
Hmehbel tur tinga kuang siam lawk a nih hnu a thihna awm chho zut zut thin hi a bik takin thalai rual tan phei chuan hriatthiam a har ang a, a thinur thlak ngawt ang. A chhan chu hetiang hun a lo thlen hian nangni tel lo chuan pen khat pawh kal ngam na chi a ni lo va, in tel lo chuan khawtlang a mawi zo lova, in awm loh lahin in mualpho a ni deuh der a, in hah a, in chauh thin zia te hi kan hmuh hmaih reng reng lo, nangni kan veng thalai rual te hi 'hel' ula, thinur ula ‘Red Indian’ thalai rual ang mai khan he in veng chhung hi tlan bosan vek ta ula I.T.I veng hi chimralin a awm mai dawn tihna a ni a, i phal em? in hlut zia & in pawimawh zia te hi inchhut ve ngai a maw chu..Nangmahni vang hian Nu & Pa an in chhuang a sin.In phunna & in lungawilohna te hi ka hriat thiampui che u a, in lamah ka tang lo chuang miah lo a nia, mahse kan ti teh ang, naupang zawk kan ni a, thlirna pawh a lo tawi deuh tlangpui a, aia upa te thu awihin lungrual takin an hnung zui tum zawk ta ila a tha zawk ang em?
Mi thenkhatin kuang siam lawk an duh lo hi an mawl vang, an khawhawi hniam bik vang & an tlawmngaih loh vang lam nilovin veng/khawtlang an hmangaihna, lainatna au aw a nih a rinawm.Hruaitu in kuang siam lawk a rel thlu pawh hi eng dang vang ni lovin veng hmakhua an ngaih zawk vang a nih ngei a rinawm.He thil thleng thinah hian tumah in dem tur chuang kan awmin a lang lo, kan that tlanna tur vek a ti kan niin a lang.. Naupangin puitling thlirdan kan hrethiam phak lo a ni thei, U zawkin naute phunna mai mai tia namnul mai lovin a chhan & vang chiang takin aw nem zaidamin a hrilh hriat a tha hle awm e.YMA hruiatute & mipuite tan tur bik pawh ka hre lo.. A laiah ka ding. (Next issue- ni 13- hi ka Birth Day- a ni a, he mi pual hian hun hman tum a ni a, ka Article ziah hmasak ber rawn hlui che u ka tum ang.)

FREE CLINIC

College Veng C.R.C Hall-ah free Clinic

Tahrik 12 September 09 Saturday hian Indian Dental Association(IDA)Mizoram Branch chuan, World Oral Healt Day denchhenin College Veng C.R.C Hall-ah free Clinic a nei dawn a, hetah hian ha phawi leh ha hnawh theih a ni ang.
Tin, in entir hun hi Dar 10:am - 2 pm inkarah neih tur a ni a, a duh leh mamawh a piang te chu inthlahrung hauh
lovin pan mai theih a ni e.

EDITORIAL

Kuang siam lawk chungchang.

Tun hnaiah kan vengah vanduaithlak takin chhiat kan tawk zing hle a, nula leh tlangval, nu leh pate bakah min uap mawi tu, kan upa ho thlengin a tumai pawh thawl hul lova chet chhuah a ngai a ni ber mai. Heti taka chhiat kan tawh zin avang hian YMA-in Kuang kan siam lawk chuan sawi a hlawh phah hle a, chhiat kan tawh zin viauna chhanah thenkhat chuan kan puh a ni awm e. Kan pi leh pute khan serh leh sang, thiang leh thiang lo, dan leh hrai eng eng emaw ziaka dah kher lova kalpui an nei tlat a, an ngaihdan pawh a nghetin sawh sawn a har khawp mai. Hetiang ngaihdan atanga thlir chuan kuang kan siam lawk pawh hi a pawmawm lova, thlanmual sam fai te pawh hi thenkhat chuan an duh vak lova, ruang a chhuak duh niin an ngai a ni. Heng bak pawh hi kan pi leh pute Puithuna thil hrang hrang sawi tur a awm teuh a ni.

Hetih lai hian khawvel changkang leh hun inher danglam zelah thangtharin ngaihdan dang an rawn nei ve ta a, Kristiante inzirtirna leh Science lama hmasawnna-in thangtharte ngaihdan hi a kaihruai nasa a, kan pi leh pute Puithuna thenkhat chu Puithuna Atthlak niin an hre ta a ni. Kan pi leh pute hun laia tlawmngaihna lan chhuah dan leh tuna tlawmngaihna lanchhuah dan hi a inang tawh lova, khawsak dan a danglam nasa lutuk a, khaikhin thiam pawh a harsa tawh a ni. Chutiang bawk chuan kan pi leh pute puithuna leh thangthar ngaihdan pawh hi chuktuah rem thiam a harsa a, inhnialna tawp hlei thei lo ti ila a dik mai awm e.
Ruang chhuak tur kuang siam vanga khawtlai te, fimkhur vanga kuanga dah ran ngai chungchang te, nunphung, eizawnna leh khawsak a danglam chho zel te, hun neih dan leh hna tul dan te a inchen lova, chhiatni thatni hmandan thlengin siam rem a lo ngai ta a, chutiangin hnah hlui an til a, hnahthar an lo chawr a, hranghlui an liama thangthar an lo chhuak zel a, tihdan thar leh thazawk, remchang leh awlsam zawk dap a nit a zel a, chumi zingah chuan Kuang siam lawkte pawh hi a lo tel ta a ni. Puithuna atanga thlir chuan sawihnawmna tur a awm kumkhua mai thei, amaherawhchu thangtharte khawvel-ah hian thil tam tak kan hnuchhawn a ngai dawn, tuna kan kalphung pawh hi thangthar zawk te’n an la rawn kalsan leh zel dawn a ni. Kristian/Mizo ruang kan hal ngai lo. Nimahsela Zirtawpni kaltaa Pune-a vaanduaithlak taka Mizo tlangval Swine Flu vei boral kha hal ral a ngai tlat. Rilru zau tak pua hma lam hunk an thlir thiam a ngai deuh deuh dawn a ni.

VC Thuchhuak hriattirna

· GAS Comsumer Card chungchang : Tunah hian MIZOFED Card ITI Veng hminga la neilo Veng dang hminga nei te chuan ITI Veng hminga thlak turin kan han ngen che u a, a chhan chu ITI Veng Quata ah inla tel ve lo tihna a ni a, ITI Veng Quata dik tak kan chhut theih nan ITI Veng hming ngeia neih vek tur a ni. ITI Veng hminga dah turin Hming thlak a theih lova, veng insawn (Pem) ang a insawiin awmna veng thlak Sawn dil mai tur a ni. Veng dang hminga MIZOFED Card neite chuan a rang thei ang bera vengchhung hming ngei a Card neih theuh tum tur a ni e.

· Rawngbawlna GAS a lo thlen a sem leh hunah chuan GAS Consumer Card bakah VC Card kan hman thin ang kha kan hmang tel tawh dawn a, VC Card keng tel lo chu kan pek ve theih dawn loh avangin sem leh hunah chuan Consumer Card leh VC Card siam kha ken theuh tawh tur a ni e.

· VC atanga thu (Information) hmu lo chuan mahni thu thu a GAS changa intlar hi tih tawh lo ni se a tha ang. Hei hian hun leh tha tam tak kanin sen thlawn tir thin a, chuvangin VC thuchhuak ngei chang thiam tawh turin khawtlang mite kan han inngen e.

MINI Market

veng tan VC hmalaknain mimi market / bazar tur sak hna tan a ni ta. (Near YMA Hall)

Veng chhung tihfai hnatlang neih a ni

tunkar chho (Zingkar) khan Veng chhung tihfai hnatlang neih a ni a, YMA Section tin te an thawk chhuak tha hle a, YMA Chhang an tangkai hle.

Tunlai hian Ruahtui a tlak rei tawh avangin vengchhung a thianghlim tawk lo hle a. Hnawmhnawk a tamin kawngpui leh a vel pawh a bal hle a ni.

Tualchhung

Lawmthu sawina

Khawtlangin chhiat a tawh chungchangah 3rd MAP te leh ITI Veng High School te thlan laiin an thawk chhuak tha hle a, Branch YMA a lawm hle a ni.

Naute Nei thar

Pu Jeho M.S.Dawngliana te Nupa Vanapa Section chuan fapa thar duhawm tak an nei a, tin, Pu VL.Chhuanpuia te Nupa pawhin Fanu thar duhawm tak an nei bawk.

Damlo Kan Hriat theih te

UHC a awm te :
· T Vanlalhmangaihi K-29
· Pu Biaksailova K-57
· Pi Lalhmingthangi K-44
· Lalthlanmawii K-19
· K.Lalrammawii K-8

Durtlang Hospital :
· Reuben Lalruatsanga
s/o Robert Lalhmangaizuala
· Lalrinawmi K-32

Civil Hospital :
· Tv Lalpianmawia K-31
· Pi Thanghlupuii K-49

Lawmthu Sawina

Pu CVL.Nghakmawia te chhung chuan an nu Lalnunmawii boral chungchangah a damloh tantirh atanga veng chhung mite tlawmngaihna leh khawngaihna an dawn avangin lawmthu an sawi.

Chahbi ti bo leh Chhar

Pu Lalnuntluanga Pachuau V.Sec te In leh Taxi Stand inkar (Nia hriat) ah Chabi bawr tih bo a ni a, a hmu chuan Pu R.Thanghluna (9862926502) hnenah khawngaih pe turin kanin ngen e.
Tin, Chahbi mal (Samrat Gold) Chhar a ni a,YMA News Editor hnenah a lam theih e.

Kohhran hrang hrang hruaitute leh Branch YMA Executive member te inkawmkhawm

(A Hmun : ITI Veng YMA Hall, A Hun : Ni 25 .8. 2009 (Thawhleh) Zan Dar 7:15, Member kal zat :55)

He Inkawmkhawm/ Sawihona hun hi Pu P Zoliana President ITI Veng Branch YMA in a kaihruai a, Nl Ezel Lalbiakremi Branch YMA Executive committee member in Bible chhiarin meeting hi Pathian hnenah Tawngtaia hlanin Meeting hi tan a ni.

ITI veng chhung a Kohhran hrang hrang Thalai Hruaitu(OB) zawng leh ITI Veng Branch YMA Executive Committee member chin kalkhawm te’n kan khawtlang a rawngbawlna pawimawh tak pahnih, Kohhran a kan rawngbawlna leh khawtlang a kan rawngbawlna ah tun ai a tha lehzual a kan hmasawnna a kal zel theih nana sawihona kan neih atangin a hnuai a tarlan ang hian Chairman kaihhruainain Joint Resolution siam ani.

1. COMMITTEE HUN INSIAMREM : Kohhran hrang hrang Thalai committee hun hman dan atangin Br.YMA committee hun nghet( Thlatin chawlhkar 3(thumna) zirtawp zan nen in subuai a awm lo a,Section YMA tin te’n Chawlhkar 4(li-na) zirtawp zan committee hun nghet atan hmang thin se,(Emergency chu thudang ni se) kan indip buailo turah kan ngai.

2. HUNBI NGHET KAN NEIHTE INSERHPUI : A thupui a lo lang ang hian a theih chen chenah kan hunbi nghet neihte inserhpui a kal hi chhunzawm zel ni se.

3. KHAWHAR IN KAL/ KHAWHAR LENPUI : Kohhran tin a Programme nghet kan neih e.g Kohhran Inkhawm hun pangngai bak a kan hma lakna hrang hrangte khawtlanga chhiat kan tawh lai a nih chuan, Lumen tlaivar /Khawhar lenpui chung changah tan lak thar ngai ni a kan hriatna lai apiangte mahni kohhranah remchang kan tih ang a hma lak zel ni se.

4. MIZO NUN ZE MAWI : Mahni Kohhran theuhah uar zawk a inzirtir zel ni se,YMA Branch lam atang pawhin tha thlah lova tan lak chhunzawm zel ni se.

5. YMA HMALAKNA NGAIH PAWIMAWH : Mahni awmna Kohhran theuhah YMA hmalakna kawng hrang hrang ngaipawimawh tur a kan memberte zirtir kan kalpui mek hi nasa leh zual a tan lak thar tum theuh ni se. (Phek 2-naah chhunzawmna)

Join meeting kal zel ..

Kohhran Thalai lam atanga thlir a YMA kalphung kan hmuh dan (Eng haw zawng pawhin) :

Kawng hrang hrang a hmasawn a tulna ngaihthlak / sawiho a ni a, heng a hnuai a tarlante atang hian YMA inenfiah a tulna a lang.
Development chung changah, khawtlang tan athil tha ngaihtuah chhuah a hma lak ngaite :
· Khawtlang Hruaitu/ Village Council nen a thawh ho-na tha neih tum zel ni se.
· Lumen tlaivar zanah YMA khawih Inzirtirna uar zawk a neih ni se.
· Veng chhung faina tur a hma lakna tun ai a uar zawk a kalpui ni se.
· Chhiatni bikah Branch YMA Executive committee memberte tun aia nasal eh zual a tan lak ni se.
· Section tinte kut a Branch YMA in Chhiatni a mawhphurhna a pek hi uluk zawk a enfiah ni se.
· Khawhar chhungte riahpui tur tlangval tlawmngai rawn inpu lut lo nghakin,Branch YMA hruaitu remchang apiang te’n hunserh hmanpui thin se.
· Khawhar lenpui/ Lumen na-ah nula pawn a awm reng hi a mawi lo a, uluk zawk a inenfiah ni se; Tin, kan kal chhan hre reng a zai hun a taima tak a zai theuh tur a tan lak ni se.
· Information Mike hi mipui/khawtlang huap thil pawimawh ah lo chuan hman loh ni se.

Kohhran hrang hrang Thalai hruaitute aiawh pakhat zel atanga Joint Resolution nemnghehna tur a Signature pek theuh an nih hnu-in Chairman sawm angin, YMA Br. Senior Adviser Pu R Lalthankunga tawngtaiin meeting hi tih tawp a ni.

Chhiartute huang

** Kan veng in Bazar kan neih tur ah hian, ‘ngatinge veng pawn lam hian an thawh daih?? Vengchhung mite tan a thawh theih loh em ni??!!! Anih loh pawn kan veng VC te paw’n thawh awm tak!! Khawnge kan VC te??
- Mojo JoJo

** VC te in fakawm thlawt e, mahse Gas sem dan chungchang ah erawh selna che u kan nei. Gas Card insiam leh Mizofed Card hmang in Gas hi sem ta ula rual khai tak leh hahdam takin kan chang tlang thei awm si a. Tan han la deuh ula kan va em.
- Ka Ni Dari

** Kan hruaitu ten Kuang siam lawk an rel a, zan rei tak takah kan awlsam zawk nan ti in. Mahse, sawisel a hlawh tlat;s.....a sawisel tute hian zan rei tak takah Kuang siam turin an thawkchhuak tawh em?? Zan rei a Mitthi puan hre khat tak a ni em? Hei aia tha leh rem zawk hria chuan kan hotu te hi tha takin i hrilh zawk ang u...Khawtlang tan pawh a tha zawk ngei ang. Ngaihtuahna fim tak kan hman pui lo anih rau rau chuan a sawiseltu ni lo hram ang u.
- J.E.R.S

** Thlan laihna a luh inchuh rap rap hi Mizo hnam zia a ni. Intih tunlai a, fel taka inrem tih vel hi thlan laihna ah hian i rawt fo lo ang u. A thatchhe aw tlat. Ka hriatchinah tumah khumbet a nat phah an la awm lo.
- Mr. Falkland

Article

P.Mawia

Kan han ti ve tan chu a ni a.thenkhat mit tikham tu nih pawh ka hlau hle ma nge? Mahse ka pen hmawr leh ziahloh puan te chuan a rukin hlimna min pe ve tlat..kuang siam lawk chungchang ka sawi lo,Rel kawng luh that leh that lo lam pawh a ni hek lova,MLTP Act pawh a ni hek lo.
Old Trafford leh Emirates Stadium lo tui pui a lo hre bel ve laklawh tan chuan Lammual-a chhir khuk luih luih leh mahni veng field-a ball liam um luah luah chu a zia lo deuh tlat tawh.Vai ram a cinema hall lianpui puia Holltwood film chhuak thar en paha Badam lo hmawm ve hmak hmak tawh tan cinema en tur neih ve loh chu a khawharthlak lo thei lo.India ram khawpui hrang hrang lo te lo dai kual a,lo chuan bel ve tawh tan chuan tlang chhip,rel kawng luh leh luh lo a la buai tawk na ram leh zu khap hlih leh hlih loh chung changa la buai tawk na ram,tlang chhipa han hawi thawven vuk vuk ringawt pawh a satisfaction a sang vak tawh lo maithei a ni. Zorock Nite meuh pawn dang a hnawn si lo ...!!!
Miin Disney Land leh Five Star Hotel an tih laia City Park zimtea chhas te nen a lo tei nulh nulh chu tunlai chhanah a nice tawh lovin a lang si a,khawpui dai pawn lam panin lirthei an han tlan chhuak vut vut a,khawtlang hruiatute mit an ti kham a,an lo hrawk leh hrep a..an la check zui!!Kan nula hote’n Fashion TV leh Korean Serial Film an lo tui pui ve laklawh tawh si,Paris leh Seoul khawpuia an thuam in bel dan te an hre bel ve lak lawh tawh si,an han en tawn ve thuai a mahse Fur a lo nia, an khawpui lamlian tawt em em ahte chuan tui a tling piu piau a,Central Minister pawimawh tak lo kal dawn a thawmthat tawk thin chuan rei a daih si lo,Stadium lungphum phum ni kan hriar ang chu..chutah tak kan nulate nalh tak a an inthuam tih hre lo pa tumlum leh hawihawmna awmzia hre miah lo in lirthei an rawn khalh sup sup a,tuihhawk an han chil per tlawrh mai a,ram danga han inpenparh daih chakna rilruin a fan rem rem thin awm e.Hman deuhah Internet hman tangkai leh inbiak tawn na’na hman an han ching chhuak a,pulpit tlang chum bur bur paha lo sel tawk an awm a,sual hnathawh a lo puh sak tlat lah an bo bawk si si...kan ram zawng,mahni fate a awm tawk zirtirna pek mai awm!!chutah Pool an kan han ching chhuak a,min la khap sak zui...thiante inah Tape thawm ring deuh hlekin an han ngaithla a,chu pawh kan ti zen zen lo..thenawm nu/pa phunchhiar deuh chuan inhrilh that a hnekin a tuk zingah chuan sawi nuam a ti phian a,tu fa te nge?an va han mawl ve an tih khum leh hrep a..hei hi maw kan chan!!zan tin chu nise a awm e.mahse a nih ka ring tlat lo kei hian!!
“Lehkha i zir that loh chuan hlo i tlo ang/ i in hlawh mai ang”ti a nu leh pate lo tihthaih fo tawng tu,vantlang inkhawm leh chhung inkhawm na a zilhna lo dawng ve laklawh te chu an han zir chhuak a,chuti ngawt in Officer a lo nih theih ngawt bawk si loh !!A officer hna ber kha a vang ta phauh mai,Graduate val pawh a tai nulh nulh a,kawng zawh a nuam hmai chhan a in au khum bawrh bawrh..“Tunlai thalai mut nachang hre lo,thawh nachang hre lo” tiin kam chhe tleuh nan a sawi thei apui hian an la tih khum hrep a,hlo tlo tur leh bawngtu thlawh kengin chhuak dawn se,hetiang lam hawi zawnga kal lo turin an thluak suk thlek sak vek an ni tawh si..!!Officer lian ni tur a fuih na lo dawng ve lak lawh tawh tan chuan “Van a duai mange” tih a tah vawng vawng na tham a va tling dawn tak em!!Nu leh pa eiru ve thei lo nei phei chu a hahthlak duhkhawp ang,mamawh a lo tam si,nu pui pasal neih te a lo hun a,inneih hlimah nupute’n thenawm khawvengah second hand/Tupperware tih vel zawrh kual a lo ngai a!!nu leh pa te pawisa dil duk duk a lo hrehawm bawk si, chan a va chau duh dawn em!!Khawtlang in an ngaihhlut sorkar hna lah chu tute emaw chuan an hmu thei bil riauvin an hria a,beiseina lo nei ve lak lawh tawh tan chuan thin rim na hlir!!Thalai lunglian beidawng chuan rukru leh thil dang a lo ching phah ta thin!!a va pawi em!!
Sorkar thar a piang a,sorkarah innghat tlat a that loh zia zirtir na an dawng mawlh mawlh,kuthnathawh uar turin an ti...an tan,mahse eng nge? Thenkhat chuan an sawi mawi ngei mai ! Mahse chu pawh ti thei fa nih leh bawk a ngai.sorkar a hna lian chelh ho lah hian thil engkim tih dawn hian BPL a mi te hi an tawktar thin, a rah erawh an seng khalh thung..Thalai hna thawk pei lo an ti a,hna chhe te te thawk turin an pen chhuak..chutah eiru thei fa deuh chuan chal delh takin a lo tawng khum a, Mi hausa nu leh pa thenkhat lahin an la hmusit zui,an fate chu an dinhmun leh khawsak pui te nen a,tualchai ho turin an la ti zui..thalai mahni a intodelh tum ngaihsang ai a,mihausa fate par huam na ramah hi chuan,thalai awm ve tawk tawk tan chuan he hringnun hi zawng a va beihvai dawn tak em!!thalai pachhe deuh chhungkua atanga rawn sei lian leh eiru thei fate kan en dan lah la bo hek lo!!zangkhua bung bu tak maw?
Zaithiam thlan a lo her chhuak leh a,an ngaihsak hum hum a,TV -ah thil dang a lo chhuak a, an buaipui dul dul.europe khawmualpuiah leh khawel pumah inkhel emaw ennawm dang awm a buaipui leh dul dul thin..lirthei te lah chu an nun za tih reh nan chauh an hmang ta nih hian a lang....mobile phone leh computer thlengin,heti khawp a mizo thalaiten nun innghahna an nei lo hi vei tham a tling.Hman deuh a Sex poster, Sex Video te lo lar ak pawh kha,kan ram culture nen chuan a in hmeh lo khawp mai, sawi mawi pawh ka tum lo,amaherawh chu Mizo thalaite tan an thisen lum tihrehna tur hi an ramah a vang em a,nula tlangval leng khawthawng duhte torchlight nen um zui kan chinga,Valentino Rossi leh Michael Schumacher lo ngaisang ve lak lawh tan khawpui chhunga an tih dan han entawn a,han ching chhuah ve ringawt lah ,thil tih chi a ni aw zawng si lo,party leh picnic lah a nawlpui kan hnualsuat bawk si,thiante nena Cinema en dal dalna tur leh han len za hona tur park nuam ve deuh takte lah a awm bawk si lo,BPL leh chhungkaw rethei deuh han intihlim dawn se,an tan picnic spot leh huan lian ve tawk tak chu van a rah ang a ni si.Thalaite tha za lutuk hi,man nei lo hlmna lam pang an pan a ni mai lo maw?A ruk a rala mipat hmeichhiat na hmang turn sum leh pai a ngai tam der mai si lo va, porn movie leh Hollywood film-a an khawsak dan zawng zawng hre ve vek thalaite hi kan um chep phak tawh lohnaah an hmuh leh hriat ang hi an practice tan ta a ni mai lo maw ? Thalaite hi khawtlang leh kohhrana inhmang turin kan fuih tlut tlut a,hetih lai hian hei chauh hi a tawk em? tih hi kan in zawh nawn a va tul tawh ve!!Anmahni kokhawm a zilh hau leh hauh chiam ai chuan an thisen lum tih reh vena tur hi kan zawnpui ve pawh a ngai tawh lo maw?zilhauna dawng a,thu awi thei tak pawn a pawm ka ring tlat..A zil hau tu apiangn tunlai thalaite laktlak loh zia leh an hmantlak loh zia sawi vak vak te,dem na thu hlir chhak chhuak khum te,an thatlai hun te nen tunlai thalai te nun dan khai khin vak vak te,an sual zia sermon vak vak te hian rah tha a chhuah a ngem?Thalaite hian khawvel hmasawn dan mila hmasawn puitu leh zirtirna tha tak ziktluak pe theitu ram hruiatu,khawtlang hruiatu, nu leh pa an mamawh ngawih a,chu chu an au hla ber pawh a ni.
Thalaite hi fuihpawrh theih tawk ringawt ah ngai an awm a,khelmual tha hmanga tlem lungawi theih an ni vek bawk si lo,Youth Commisson leh thil dang hmang a hruai dik tum chi an ni tawh lo!!Mizo thalaite hian an hmuh leh an benga an hriat khawvel changkang chho zel mil a an ram hi a kal ve an mamawh tawpkhawk tawh a ,mahse chutiang ti tur chuan a la harsa bawk si....zangkhua bung bu tur ah ngai i la,khua a la var mial mahna.Thalaite hian ram hmasawn na kan mawmawh tawh tak zet a ni.
Kawngdangah peng lawk teh ang, tunlai Aizawl khawpuiah a bik takin thalaite zingah mahni intihhlum mai duhna (suicidal spirit) leh mahni inzawrh mai duhna thinlung kan tleirawl te zingah a hluar chho mek a, indan ngawt theih ani si lo,hemi kawngah hian nu leh pate paw’n kan fate,tunhmaa an khawsak dan ringawt sawipui lovin, tun lai thangthar khawvel (Moder n World)hman chho mek Cyber World mila kan rilru put hmang,kan ngaituahna kan sut thlek thiam sak thin a pawimawh a, kan inchhung khur harsatna, thian kawmnaah,an hmangaihte chung chang thlengin,an harsatna an sawi ngamna Nu leh pa nih a pawimawh tawh hle a ni!! Khawvel changkanna hian min chim zel dawn a,kan fate he mi kawngah hian kan Economics dinhmun leh kan Society mil tawk a changkanna kawng zawh thin tur a fuih thar sauh sauh hi kan rawngbawlna pawimawh tak a ni...Sermon thlak nen a danglam chuan ka ring lo!!
Heng hi kan thalai dinhmun a nih mek lai hian,nu leh pa,khawtlang hruaitute pawn kan khawtlang thalaite,kan fate kan kaihhruai thiam te pawh a tul tak zet a ni.Khawvel tukverh changkannaah an dak lak lawh tawh si,kan zo si lo, chuan kan fate pawh kan ram mil tawka her rem tir thiam turin kan zirtir nawn fo a tul takzet ang.Thalaite paw’n kan ram dinhmun kan hria a,lung a awi lo,mahse siamthat a harsa,chuvang chuan kan ram kalphung mila kan inher ve zel a ngai a,kan ram kalphung pela kan kal chuan ,changkanna kan lak dan a dik lo a nga,beidawnna ruamah kan lut palh hlauh dah a ang?A dik kan ram hian hmasawn a mamawh a,thalaite hmasawnna tur kawng pawh hi ram hruaitute tihmak mawh a ni..kan then awm State te hi.....

VIVE

KB.Renthlei

ITI Veng Aizawl ngei maia awm manah ti in thawveng tawk.....in ka leng ziai ziai a. Kal tumna bik leh len tumna bik pawh ka nei hran lo. Keini ang tlangval ni tawh lo tan chuan nula han rim ut ut arem tawh lo bawk lo nen, Volleyball Court sir a IBS thutthleng siam changkang zetah ka thu ta vang vang a. Kan nunhlui, kum 10 chuang zet liam ta ka chhuikir a, ka lung aleng khawp mai. Rilru ah thu leh hla arawn nghal. Kan VIVE kaltlang hian kan luangliam zawih zawih teh ang.
Chutih lai chuan he kan vengah hian In ala tlem ve hle a, kan inhre vek. Tunlai anga kan intihhlimna ang hi awm ve hek lo inGaaia, inkahthlak, in um, vengchhak leh vengthlang indo, Inrinni a Home Guard lui emaw Chite a tui theh kang tih vel bak kha hunawl hnawhkhahna leh han intihhlimna tur a awmlo hrim hrim. Mahse, ahunlai na na na kha chuan nuam ve mai mai reuh thin tak chu a ni. Chite a kala, hawlam a Pu Nienga Quarry bul atanga motor beh tur a awm hlauh tum phei chuan tihchi veng veng tak a ni. Tunah chuan World Bank Road an ti ta daih mai. Heng hunlai vel hian alawm Mualpui Road an rawn lai mai chuh...hmanrua an rawn chhawp rup, kan la hmuh ngai reng reng loh hlir mai kha. Keini naupang mai nilo patling nutling, nula tlangval khan kan bawr luih luih mai a. A lo nuam ve mai mai thin teh e...Bull Dozer leh JCB Operator te hmelhriat nih leh an duhsak zawng nih kha nuam ve deuh ania aw. Hetiang vel hi ka ngaihtuah kual vak vak a, ka sawisen loh nunhlui chuan minti nui a, minti lungchhe bawk. Pi Sangmawii kan hlauh thin zia leh Home Guard tlanga chet that kan chak theih zia te. TV nei kan ngaihsan thin zia leh mi enthlak kan chinlai te, Krismas Bawng kan thlah a U KMA leh U Marosanga te Bawng chungchuan thiamzia te, Broken Heart leh Ajahup Era....huiha....ziah sen a ni lo. Vawiin ah zet zawng hrethiam pha a nuihpui tlawrh tlawrh awm mah ila, kan tam ve tan tawh a kan nuih arual tawh lo ang. Khing hunlaia veng te takte, mi ten “veng mawng” an tih kha veng nuam leh fai, veng in lungrual leh veng CHANGKANG a ni ve tlat tawh. Ka thutna atang chuan ka tho chhuak a, rawlthar rual an rawn kal dam dam a. A then in Liverpool Jersey an rawn ha a, athen in Man U. Thenkhat chuan anmahni hming inziahna Jersey ngei mai an rawn ha bawk a. An vanneih zia an inhria angem le...naupan lai hun kan hman ve dan te nen chuan lei leh van ang a ni.
Sikul kan kal a, aim in life & ambition te min zawt a. Kan nih chak zawng leh kan duhthusam vel mai mai khan kan chhang ta thin a. Kan heti teh ta nuaih a nih hi. Naupang leh tleirawlte u, in vanneihzia hi hria ula. Kan khawvel changkang tawh tak ah hian khawlai a inbiruksiak miahlo in in intihlim thei a, zan a pawn to miahlo in in inkawm hlim thei tawh. Tum mumal tak neia hmalam hun thlir in, in khawvel hmang rawh u.
Tichuan, Papu-a te dawr a thil lei pahin field ka hel a, Sente-i thingpui lum ka inzawh chuan nunhlui ngaihtuah chhunzawm chung zel in ka haw a. Achangin ka nui a, achang leh ka tum vei thul.....!!! Tv Dingte-a te thianho lo zai lah chuan a kel rawl a kel rawl in “Aw khawnge in awm ka lenrualte, Mahriakin engan mi lo siam le.......” an lo ti raih raih bawk a.

Luiralramah

Lalramsanga kum 3, c/o K.Lalhnaia Khuangchera Section chuan Ni. 17.8.09(Thawhtan) zing khan Chatuan ram min pansan ta. Khawhar chhungte kan tawrhpui a, Pathianin awmpuiin thlamuan zel rawh se.

Pu Dohuaia kum 70, f/o Malsawmzuala (Maltea) Vanapa Section leh
Vanlalawmpuia kum 20 c/o Tlangbawia Sailo Taitesena Section
te chuan Ni. 26th August 2009(Nilaini) khan Chatuan ram min pansan ta. Khawhar chhungte kan tawrhpui a, Pathianin awmpuiin thlamuan zel rawh se.

Pu Muankima h/o Tlanghmingi (Sweat-Pea-a Pa) Taitesena section chu 2nd September 2009 leh
Pu Lalbiaknunga h/o Vanlalkungi (Rawna leh Beck-i te Pa) Taitesena Section chu 1st September 2009 khan chatuan ram min pan san ta. Khawhar chhungte kan tawrhpui a, Pathianin awmpuiin thlamuan zel rawh se.

In-Hmun Lei Duh

Inhmun ITI VEngchhungah kawng an, (insaksa emaw, la sakloh pawh) leitur neite chuan a hnuia phone no ah hian min rawn be teh u. Rs. Nuai 10-15 inkar, duh a ni.

Ph - Cnt : 9862836573

Hriattirna leh Ngenna

YMA THINGPUI NO CHUNGCHANG

· Chhiatni thatnia thingpui semna YMA Thingpui No-te chu a fai tawk thin lova, hei hian kan Veng hmai a tibal pha hiala ngaih a ni.Chuvangin tunchinah chuan chhiatni thatnia nula leh tlangval thingpui lum leh sem buaipuitu apiangin thingpui sem hmain uluk taka No leh Tray silfai hmasak thin tawh tur a ni. Hetianga tithei tur hian inhmakhua lawkna chang pawh hriattur a ni e.

· YMA thingpui No leh bungbel dangte vawnfai hi Nula leh tlangval zawng zawngin kan mawhphurhna ani tih hriain CHET FAI leh THIANGHLIMNA kawngah tan lak thar theuh tur a ni.

· Chhiatni thatnia No leh Bungbel dang hawhtu apiangin tuia tleuh satliah mai lovin, a silfaina bawlhlo ngeia FAI taka silin dahkir thin tawh tur a ni.

Nurse kohna Rate

The Trained Nurses Association of India; Mizoram Branch
(Mipui te hriat tur)

In koh man / Rate chi hrang hrang te :
1. Injection -
Intramuscular Rs 20/-
Intravenous Rs 50 /-
Sub-Cuteneneous Rs 50 /-

2. Intraveneous Fluid Infusion nghahin First Bottle Rs 200 /-
Second Bottle atangin Rs 100 /-
3. Naupai en man Rs 50 /-
4. BP check man Rs 10 /-
5. Dressing
(i) major Rs 100 /-
(ii) Minor Rs 50 /-
6. Stitch Remove :
(i) Damloin Nurse a panin Rs 20 /-
(ii) Nursein a pan in Rs 50 /-
7. Nau chhar :
(i) Zanah Rs 500 /-
(ii) Chhunah Rs 300 /-
8. Nurse Koh man :
(i) Zanah(9pm-5am) Rs 200/-
(ii) Chhunah Rs 100/-

ARTICLE

FAK-na !!

By - Lalnunthara Ch.Sec

Kei Ralte Siakeng Tlangval hian Mawlhtu ka nei anihloh paw’n eng rau emaw min pawltu ka dawng ani ta ve tal ang. Mawnghlapba zat khawp a kalo enkawl ve ‘Ralhrat’ tana ka lo serhhran, Ka Ziakbu chungah chuan kan Vangkhaw Runtin fangtu (YMA News) tan-ka Ziakfung chu chawiin ka nawr kal ta zet zet mai le!!! Kristiante chu Chatuana zai tur kan ni bawk a, Hlathu Pu El-Bethela phuah “Chatuanin, aw ka fakning law’ng” tih hian bul han tan phawt teh ang.
A mawi a ni. ‘FAK’ he thu hian tu pawi nge asawi ang aw... Mitin tan lawmna ani ringawt mai a ni. Pu PL Liandinga pawh Zaithiam Pi Vanlalruati-te Nupa nen an inhmu a, Pi Ruati hnenah anpa chuan, “Hei, Ruati i hmuhchak em em, Pu PL-A chu anih hi,” a’nti mai chu’h. PL-a’n a tia lawm ‘Thangvan ka kai ta emni, Ka chung lur lur” tih tak mai anap anih kha. Fakna hi ahlu a, tu’n haw suh. A mawiin analh a, Fakna thu chhakchhuak hnemtu chu Mithi Khaw lamlianah pawh Pawla sailoh khawp hial a mawi niin ka hria.
Vawikhat chu, Khenga, Sela leh Faka hi Pialral pan turin an kal a, chutia an kal zel lai chuan Faka chu Lungpawngah hian a inchhuihpalh hlauh mai a. Khenga chuan, “ I chawh, i kalna tur en ta che, Thlanlaihnaah hian Hmawnghnuaiah thu mai mai tawh suh, Thatchhepa,” a ti hrep mai a. Sela ve thung chuan, “ Kalna tur enna chang pawh hrelote chu Tlu sil-awng se ni mai a lawm, Mithiinahte hian tlaivar nachangte hi hre ve rawh, Mia pa,” ati leh a. Faka ve thung chuan, “ ka va vannei em, ka harhphah sawt mai. ITI Veng YMA Member-te hi an tha ngawt mai, hetiang hian an Veng hi vawngfai reng hram se aw...” ati a. Kan Ram pawh hian Khenga leh Sela ai chuan Faka hi kan mamawh zawk niin ka hria. Kan Zawlkhawpuiah pawh hian Faki leh Faka hlir hi leng ta suau suau mai ta ila. Tumah inhua leh inngei awm dawn heklo. ‘Nuamsingkhaw’ mai pawh niloin, Nuamnuaikhaw a ni hial ta awm e. Mahse, Famta Pu BD-A’n “Duhaisama’n ka samlua emni” alo tih ang kha ka ni mai awm zawk e.
Mizo tawng hnehsawhtute zing ami Pu Mafa-a meuh pawhin, “Fakna awrawl hi achhuahtute tan heuna awm miah silo, a dawngtu tan chawtha eltiang nisi a ni. Ader tih hi ka Thluak hian hre kur mahse ka hne ngai chuanglo a, chutih ahnekin painuam ka tiin, ka chek hian amil hliah hliah zawk a ni,” ati a ni. Keipawh hian nuam ka ti thin khawp mai. Senlai atanga ahnung kalo zui hnak hnak thin leh Pumpui hnawhpuar tura Thleng khata hma kalo lakpui tawh thin MPA’n, Biakina Track pawh mil hleilo leh Kekawr Ipte zen tut chunga ka solo zo, i zaitha min tih chuan ka lawm lutuk hian Pu KBa leh Nl C.Mami-te pawh ka intehkhin ve ta hial awm e. Sawiselna hian, thinurnate, Beidawnnate, rilru natnate maibakah Mittui thlengin akochhuak a, fakna erawh chu achhe berah pawh nuih vur vurna a ni.
Diklohna lai inhrilh fak fakna hian rahtha chhuah chang awm mahse, a aichuan fakna hian engtiklai pawhin alet tam takin thil tithei zawk a ni. Thu leh Hla lama kan miril Pu A Thanglura meuh pawhin, “Pu Thanga min fakna khan min tih lawm em avangin nizan chu, ka Mizo Pawnpui til-uai khawpa kan tal chu’h,” ati a, alawm ngang aniang. (Chawlhni zing min nghahhlelh tirtu Ka Thianpa TK Sailo-a thiampuipa) Pu Shakespeare-a chuan, “ Miin ka hmingthasa min tih hliausak hian, an tana Hausakna nisilo, ka tana pachhiatna nisi athlen ani,” ati. Rau deuh ang maiin Bible chang ka’n han thailang ve lawk teh ang. ‘Thupai nuam chu Khawithlar ang a ni a, Nunna atan athlum a, ruh tan hriselna a ni.’
Ti hian suangtuahna ka nei a, tahchuan ka thian kawmngeih em em, Sena hi ka hmu a, ani chuan, “ Thianpa Khawpui din ka tum a, ahmingah Fakna khawpui ka ti anga, Selna leh elrelna reng a awm tawh law’ng, fakna chauhlo chu,” alo ti a. Thutamin ka chhang theilo....
“Awi... keizawng ka tuar mawlhlo ang, a nuam dawn em mai, fam tate pawh an tho leh lo phal hian ka ring mawlhlo. Thasiama meuh pawh a Sepui nen arawn inkhalh lut leh ta ve awm e...

Chhiartute huang

** 14th August 2009 zan dar 7 vel khan ka phone J210 (Samsung) chu Taxi-ah ka thlauh a, ka mangang chuan hmelhriat Treasury ah ka zawng vak a, kan veng taxi Driver ka hmuh chhuh lah chuan ‘I hmu tawh chuang lovang tih pahin min tlansan daih a. Mahse vanneihthlak takin College Veng taxi Driver pakhatin hemi zan vek hian min zawn chhuah pui a, a phone ka hman sak char char a, chumi bakah pawisa pawh phut miah lovin (hlawh lovin), min hruai kual char char a, ka mangan zia a hria a, Aizawl khaw fang chhuak zak zak khawp a min tanpui tu hi Lalpan malsawm lul rawh se.
- Cancerian Boy MRB.

** Goal Ruk thuna bul tantu te kha kan ni e. Tun Season chu Sir Alex a Chewing Gum nih ava huphurh awm dawn em!
- GunPui
** Lalrinchhana (RCa) Mizoram Wushu Championship a Bronze Medal i la hi kan chhuang tak zet che, tang zel rawh aw..! Kan tan che a nia, Lam mai ilo thiam lo a nih hi. Tin, ITI Veng lamthiam ho kha in va reh ve, Wonder Forever te pawh kha .. Michael Jackson Tribute Concert Vanapa Hall a Rebec-i han che zet kha chu.. Ka tim ur ur thei a lawm. Kan veng chhung a talent tha tak tak nei te hi promote kawngah hian a veng te hian mawh kan phur em? Kan veng hmingin an chhuak leh tho thin si a.
- Roxette

** A bul tan nan Community Shield kan han la vel mai mai phawt a.. Tun Season chu kan hui fai vek dawn.
- Mr.Blues

TUALCHHUNG

Pem Lehkha
· Pu VL.Chhuanawmpuia te chhung, Edenthar atangin. {T.Sec Pu Rosiama (L) Colony}
· Pu K.Lianhnuna te chhung. Neihdawn atangin {V.Sec Pu Lunglawma (L) Inchung}

YMA-ah Puan Pe
Pu Ramliana (L) Vanapa Section chhungte atangin an pa Borala an puan dawn te atangin puan 3 YMA ah an rawn pe.

Cyber Crime & Mizo Society Seminar
Ni 21.8.09 Dar 10:30 Am a tan CYMA Hall a
Cyber Crime & Mizo Society Seminar neih ah kan Branch aiawhin Pu Lalniliana Hauhnar Br. Astt.Secretary leh Tv Zathangliana Br.Executive Member te an tel.

SUIHTAK
K.Lalfakawma S/o Pi Chalkimi Taitesena Section & Joney Lalnunpuii D/o Chhandami Lunglei Theiriat te chuan Pathian leh a kohhrante hriatpuinain Ni 20 August 2009 (Nilaithawhtan) khan Lunglei Theiriat UPC (NEI) Biakinah tiam tlat e an ti. Nupa tuak thar te fanau maltluan chawia hlim taka awm zel turin duhsakna kan hlan e.

Lawmthu Sawina
Pu K.Lalhnaia te chhung (K.Sec) chuan an tupa Lalramsanga Boral chungchangah Veng chhung mite tlawmngaihna leh khawngaihna an dawn avangin lawmthu an sawi.

Bag Chhar (a neitu La hriat loh)
Pu K.Vanlalchhuanga Dawr PCO (ITI Kawn) ah han lam teh u. A chhungah thil tangkai tak tak a awm e. Tun thla chhung a neituin a lam loh chuan tih-ral anih pawhin tuman an sawi buai thei lovang.

VIVE

TK Sailo

Gentleman promise- tiin bul kan tan ve hmiah teh ang.A mak teh zawng a nih hi, helh tu mi engemawzah awm mah ula ka hming Charles Dickens- tih hi eng ti kawng mahin ka thlak danglam dawn chuang lo.ka thu thu a ni.ha!ha! Tun hma atang tawhin Nurse thenkhat nen hian kan in tlanchhiatsan tak tak thei dawn lo a nih hi maw, tlai lam a ni a,ka pindan fianrial lamah keimah te chauha awmin, weekend- a lo thlen tawh hi chuan, ka tih dan thin pangaiin ka thingrem chhunga ka ziaklohpuan chu ka phawrh chhuak a, sir kil khat a thlalak lo let nget chu ka lainat em avangin kan en a, Nurse...i thlalak chu lo ni rengin, he thlalak hian nun hlui min ngaih tir a, kan sulhnu mitthlaah a lo lang uar uar a,auh kir theih nisela aw... ti a suangtuahna awmze nei tawh miah lo tur ramah ka lo cheng mek a, ka lunglen vangin ka mittui a tla lo chauh a,ka in hnit fuih fuih tawh, siamtu pawh hian min lainat a, ka mittui tlak a phal tawh lo a ni chek a niang chu, rin loh takin ka nu in Tekim Dal kan siam dawn em" a rawn ti teh phut a, ka chawhmeh duh ber a ni bwk si a, a tel lo chuan chaw ei a tui zo dawn bawk si lo, aw lai tuau chung hian “Aw, siam ta che" ka ti thei hram a. Tun hun thleng mai a ka hringnun sawisa hrep reng tu hi tu nge maw a nih le? Chhiartute huangah tu nge a nih rawn in rinsiak luih luih lo hram ang che u aw, chu ti lo zawng in pu hi ka mualpho chhe dah a nge.. A mak khawp a sin ka thiantha zual bik reng reng te hi Nurse an ni fur hlawm.Chhungpuinu tura i hual lawk mek pawh hi Nurse tho a ni lawm ni? Zawt tu: Kb Renthlei. An zingah ka awm tam a, an dinhmun te hi chu ka hre ve viau turah min lo ngai ta ula in ti sual hauh lovang. Mi induh & nelawm lo tak ni thin pawh hi an training chhuah meuh chuan, tumah be chhe ngai lo, hlim hmel pu thei reng, tawngkam pawh fel tak, an hmel hmuh ringawt pawh a damna tling thei tur an ni ta thin. Thuziak mi ngaina tak an ni tlangpui bawk em khah? Zawt tu:P.Mawia.

Nurse ho hi ka fak a, ka ngaihsan em em na chhan chu,tu te mai pawh hian kan mamawh hun a piangin kan thu thuin kan ko phar lawp lawp a,an nih dan tur ve reng nia kan lo ngaih lai hian a lo ni bik awzawng lo, lawmthu sawi nana kan lawm lutuk aw' tih liam puat hi a lo tawk ngawt lo,hlawh nei a koh a, pan an lo ngai ve reng chu ni in..Duh duh a koh phar a, chhiahhlawh ang mai a chengkhat pawh hlawh lova kan siam thin hi an ni chuan sawi lang lem lo mah sela, a tlawm thlak a, an zahawm loh phah tih kan hriat a tha hle awm e, he ti chunga phun nawi aia ngawih an chuh thin hi chu a mak zawk hial.kan koh a, kan pan hian khawi ka hlawh tur chu an ti ngawt lovang, keimah nin bengvar chhuah a, an thawh hlawh kan pek a tha thin hle dawn a ni.Tu fa mah hian mi thuhnuai a awm ngawt hi kan duh loh zia te hi nang & kei hi a hre chiang tu kan nih kha.Kum tamtak hah em em in an lo zir ve a, an thawh rah te hi chu an seng ve ngei tur a ni.Sawitu:Doctor...Ka damloh ve tum a, inthlahrunna nei hauh lova ka thiannu Nurse...kha kan ko ve thawr a,ka tana a tha, sum & inchhung tihtur pawimawh a kalsan tih ka hriat hian ka zak hnuhnawh mange.ka dam fel ta maw tihah lawmthu te chu kan hrilh ve bawk a, a tirah te phei chuan a chungah hian ka vui lek lek zawk hial nia, a finvar thlak loh thin teh e.Nurse zahawm tak tak te hi kan mamawh a vanga kan pan a, kan ko dawn a nih pawhin Order ni lovin Request zawng in le. entirnan: E khai hei kan damlo na ang reng viau mai a,kan mangang a nih hi lo kal nghal rawh...ti thawr lo deuhin, E khai khawnge i awm? i hman chuan min lo tanpui thei ang em? i lo kal theih chuan kan lawm ngawt ang,i lo kal theih loh pawn kan vui chuang reng reng lo, kan lo pan thei che ang em? Ilo kal theih dawn chuan motor in kan hruai, thlah leh thlap ang che aw. te han ti ila a dawngsawng tu tan chuan ngaihthlak a va hreawm dawn lo rua em!!Hmeichhia an ni a,an duty- piah lamah in chhungah tih tur an ngah ve thin zia te hi kan hriat tel a tha viau ang.An tuar chhel zia & an nu chan zia te hi fak loh phal chi an ni mawlh lo.kan veng bikah kan la hman ngai loh Nurse hovin Koh man & pan man an neih dawn tak avang hian in thlahrun phah nan hmang chuang lovang u, mi pangai tak vek an ni hlawm a, chhungkaw harsa zawk & dinhmun hniam zawk te chu an hrethiam em em turah ngai ila,hlawh chhete kan lo pek ve tur hi an beisei ber & an phut ber a ni hauh lo, an tlawmngaih loh vang a lo puh ngawt chi lah a ni hek lo. An zahawmna humhim an duh vang chauh niin a lang. Mi thenkhat tan hriat thiam harsa a ni thei a, mahse kan ti teh ang, hlawh nei lova koh phar duai duai reng ho hi kan zah ngai lova, kan ngaihsan ngai loh hi maw..Nurse ho hian an in ven ve a ngai a ni.

SUNNA

Pu.Lalthangpuia (28)
Secretary Vanapa Section YMA.

Pu. Lalthangpuia hi kum 1980 February ni 8 khan Pu. H.Lalduhawma leh Pi. Masthangi te fa u ber ni turin a lo piang a. Amah hi mi tawng tam lo tak, mi pawisawi hlau tak mi a ni. Tin, mi tlawmngai tak, khawtlang tan pawh a theih ang tawkah chuan mi tangkai tak a ni. Section YMA tan phei chuan innghahna tling tham a ni. YMA hminga hnatlang leh thil tih tur tul hrang hrangah tlan chhe ngai lo, a tawp thlenga tel thin mi a ni. Kumin January ni 16 khan Mary Lalawmpuii nen inneiin fanu duhawm tak an nei a. Chhungkhat laina, thenrual te leh Vanapa Section YMA ten kan ngaih a, kan la thlakhlelh ngawih ngawih leh keinin a hun lo kan la tih em em, kan ui ngawih ngawih laiin Dt. 7.8.09 zan dar 8 :00 pm khan a chatuan hmun tur min lo pansan ta a ni. A bik takin Vanapa Section YMA phei chuan kan tuarin, kan ui tak zet a, a kalsan tak a nupui leh fanu, a chhungkhat te, thenrual tha te, Lalpan awmpui in thlamuan mawlh rawh se.
Heng kumah te hian Section ah O.B nihna a lo chelh tawh a ni. 1) 2004-Asst. secy 2) 2005Fin. secy 3) 2007-Fin.Secy 4) 2008-Asst. Secy 5) 2009-Secretary.

sd/-( LALLAWMTHANGA ) SECRETARY --------- Sd/- (LALBIAKNGURA) LEADER,

Y.M.A Vanapa Section, I.T.I Veng

Branch Executive Committee Meeting Vawi 9-na neih a ni

Ni 21.8.09 (Zirtawp) zan khan YMA Runah Branch Executive Committee Meeting neih a ni a, Branch hmalak zel dan tur te rel a ni. Thurel tlangpui te :

Chief Minister Running Trophy : Chief Minister Running Trophy Cultural Dance kum tina neih thin, kumin a tel tura sawmna kan dawn angin Kan Branch pawhin tel tha a ti a, Social & Cultural Sub Committee te hma lo la tura tih an ni. hemi lama tuite lo inbuatsaih a hruaitute hnenah inhriattir tur a ni e.

Thlanmual tihfai hnatlang : Thlanmual chu a tul anga tihfai hnatlang neih tur a rel a ni a. Hun remchang hmasaberah hnatlang hi koh tum a ni. kan YMA No/ Tray etc tihfai hnatlang chu neih a ni.

VILLAGE CENCUS : LAD atanga Village Census neih tur VC hnena lo thleng chu VC ten YMA kutah an hlan a, YMA Executive member ten mahni bial theuhah census an rawn nei dawn a ni.

EK PAIH : ITI Veng mipui tan a hnawksak leh pawi thei tur zawng a motor hmanga ek paih thin ten ek an rawn paih thin avangin, khawtlang mipui ten harsatna kan tawk ta hi, chingfel/ tihreh a nih theih nan, khawtlang hruaitu VC berawna a arang lama hma lak nise tih a ni.