Tunkar Thuvawn

‘Lusun ina kal a tha e, Ruaitheh ina kal ai chuan; Chu chu mi zawng zawng tawpna a ni si ; Nungdamin thinlungah an vei chu.’ (Thuhriltu - 7 :2)

Ngaihdam Dilna

Tunlaiin kan Internet Connection lamah Editorial Board-ten harsatna kan tawh avangin Issue engemaw zat chu YMA NEWS Blog kan Update thei lova, a pawi kan ti hle mai. A bik takin kan vengchhung mi, hmun danga lehkha zir leh hnathawk a awm te, tin, Internet a YMA News lo chhiar thin zawng zawng te, YMA News inlo nghakhlel em em thin a ni tih kan hria a, kar tin YMA News chhiar ve tumin kan Blog inlo en thin ani tih pawh kan hria, mahse kan tih beidawnnaah che u thinlung takin ngaihdam kan dil a, minlo hrethiam hram hram turin kan ngen tak meuh meuh che u a ni.
Editorial Board ten a rang thei ang bera Blog kan rawn Update leh theih nan theihtawp kan chhuah mek a, India ram hmun hrang hranga kan member awm te leh Mizoram hmun danga kan member awmten ITI Venga YMA News kan chhiar ruala in chhiar ve leh ngei theih nan theihtawp kan chhuah tak meuh meuh a ni tih minlo hriatsak kan duh hle a ni.

- Editorial Board, 2010

Branch YMA Thuchhuak Hrang Hrang Te

Lawmthu Sawina
1. Dt 5.4.10 (Thawhtan Zan) a SAY - te Vengchhungin hmun thum ngawt maia chhiat kan tawh laiin khawhar in kal tur awm loh hlauva Biak-In meuh khar a, khawhar lenpui tura in inpekna avangin Branch YMA chuan inchungah lawmthu a sawi tak meuh meuh a ni.
2. 3rd Batallion MAP, Mualpui Police-te I.T.I Veng khawtlangin chhiat kan tawh changa kan mamawh hunah thahnemngai takin thlanlaih te min rawn pui thin a, in inhawnna leh tlawmngaia in inpekna a vangin inchungah Branch . YMA chuan lawmthu a sawi tak meuh meuh a ni.
3. I.T.I Veng Taxi Welfare te chhiat kan tawha in inpekna a ropui kan tiin pawisa (Fare) phut miah lova a thlawna in Taxi te khawtlang tana in rawn thawhchhuahpui thin a vangin Branch YMA chuan in chungah lawmthu a sawi tak meuh meuh a ni.
Leadership Training
Nimin Dt 10.4.10 (Inrinni) khan CYMA buatsaihin Leadership Training CYMA Hall, Tuikhuahtlang-ah neih a ni a, hetah hian kan Branch aiawhin Pu J.Lalchawiliana (Br.Exe) leh
Pu K. Lalthlamuana (Br.Exe) te chu an kal a ni.
Disaster Management Training
Tun Thla chhung hian CYMA Buatsaihin Disaster Management Training neih leh a ni dawn a, hetah hian kan Branch aiawhin Nl. H. Lalchhanchhuahi tel tura ruat a ni.
Tanpuina Lut Mek Zel
Vengchhunga miharsate Br. Y.M.A hminga insak sakna tur tanpuina ( pawisa leh hmanrua) chu engemaw zah a lo lut tawh a, a lo lut mek zel a. Khawngaihna thinlung pu a thawhtu-te zawng zawng chungah Branch YMA chuan lawmthu a sawi a. Veng mipui te tang zel turin kan inngen e.
Meitei (Manipuri) Chhiarpui
Tun thla chhung 15th April ralhma hian I.T.I Vengchhunga Meitei (Manipuri) awm zawng zawng te chhiarna Branch Executive Member-ten an nei dawn a, a chhiar hna thawk tu zawng zawng ten April Ni 15 hma ngeiin heng a hnuaia mi te hnenah hian thehluh vek tur a ni.
Vanapa Section-ten Branch Treasurer, Nl Vanlaldingliani Sailo hnenah thehluh tur ani a, Taitesena Section leh Khuangchera Section ten, Branch Secretary, Pu B. Lalhmangaiha hnenah theh luh tur a ni. Tin, Chawngbawla Section ten Branch Asst. Secretary Pu Synodsanga hnenah theh luh vek tur a ni.
Ngenna leh Hriattirna
Tun lai hi Sava no neih hun a ni a, kan Vengchhunga thing leh mau-ah savaten bu an chhep leh tan ta. Sava bu te leh rannung dang Thehlei (Chepa) etc. te kan hmu a nih pawhin khawih lo leh tihhlum tuma perh emaw silaia kap lo turin mitin te kan inngen a. Tin, Thlanmual bula Rihnim (Bung Chikhat) hi a rah mek a, Sava chi hrang hrang-ten an tlan nasa thin a, heng te hi Sairawkherh leh Air-gun hmanga perh / kap thla thin kan awm a, chutiang mi kan hria emaw kan hmu a nih chuan tim hauh lova mimal pawhin lo khap tur leh a tul phawt chuan Branch YMA hruaitute hnena hriattir turin kan inngen a ni. Nungcha te laka nunrawnna hi YMA chuan a do zel dawn a, hetiang tih ching te chu man an nih chuan an chungah Dan angin thununna lek zel a ni dawn a ni.
sd/-
Secretary,
Branch YMA, ITI Veng

Tualchhung

Tuak Thar
Dt. 7.4.10 khan K. Lalfakawma T-Sec chuan Lalramnghaki Kulikawn Veng chu ITI Vengchhak Presbyterian Kohhran Hall-ah Tiam tlat e a tihpui.
Dt. 9.4.10 khan Lalrinawma T-Sec chuan Lalrampari, Champhai chu dam chhung atan ITI Vengchhak Presbyterian Kohhran Biak In-ah Tiam tlat e a tihpui bawk. Nupa tuak thar te Ed. Board ten duhsakna kan hlan e.
Damlo
Pu Challianthanga Chawngbawla Section, Branch Asst. Secretary Pu Synodsanga pa chu damlohna a vangin tunah hian Civil Hospital ah enkawl mek ani.
Fa nei thar
Pu K.Lalhmuchhuaka Branch Executive member Chawngbawla Section chuan Fapa thar duhawm tak a nei a, Branch YMA-in a lawmpui e.
Chawei khawm
Dt. 17.4.10 hian World Record leh Chapchar Kut-a Branch aiawha Cheraw Kan te pualin Branch O.B ten an sum leh pai sengin chawei khawm an buatsaih sak dawn a, hemi hunah hian Certificate sem tur a ni a, Cheraw Kan na-a tel zawng zawng te kim taka kal vek tur a ni. Dar 9:00 am ah YMA Run-ah Buhfai No 1 nen kim vek tur a ni.
Tunkar Library Duty Tur te :
10.4.2010 (Inrinni )
Nl. Ezel Lalbiakremi
leh
Tv. Lalchhanhlua
(Library Duty list YMA News a chhuah hi rin tur a ni a, Library Duty tur ten mahni Duty hun i ngaipawimawh theuh ang u.

Chhiartute Huang

IBS Thingphun te tunlai hian duh hun hunah kan kit/zar thlak mai mai thin hi chu aw...a phun tu te an va zahawm em. Kan Veng Ro-hlu i duat ang u khai... kan tan a hnawk a nih pawhin mahni duhthu a kit ngawt lovin IBS hruaitute i rawn der hram hram thin ang u.
- Hriata
Pu Ed., hei hi min han chhang teh ...Kan Veng hian boruak sang hi kan zo lo a ni lo maw ? Football nise boruak a hot dawn chauhva tlak lam kan hnaih leh daih zel si...kha tuntum kan Muaythai lah kha uihawm tawklek-ah a chang leh si thin a, aw...kan ti vawng vawng..
- 9612568689
(Kan hun a la thleng ve lo a ni mahna.Ed.)
Gas No. chuti zat chin chuan lak theih’...tih chu kan hmang tawh.La thleng lo ho khan lak talh tumin an intlar tho. VC ten au hun nghak turin mipui an ti, Gas bur riahlo turin an ti..Gas sem dan ah mipuiin VC thu kan awih thei lova kan buai a ni zawk e...(nupui ngam lo) Jo Jo-a Pa
- 9436154957
SAY ITI Corp te lusun khawhar hnem tura inkhawm thulh thaka in inpekna kha a van ropuitak em ! In rawngbawlna lehzel turah Lalpan malsawm zel tur che u-in ka duhsakna ka hlan a che u....Midang te tana inpekna hi a Mizo a, a YMA a, a Pathian thu em em bawk ani. Chutih lai chuan Kohhran thenkhat khawhar lenpui tur awm lai a hla zir hi enge i ngaih ve dan...Pu Editor.
- No Name
ITI Venga piang leh seilian nazawng hi ITI Veng hmangaih tak tak tu an ni kher lo.
-ITI venga Piang ve lova
Vengchhung-in chhiat kan tawhin kan thlanmual Incharge thenkhatte hi an va fakawm tak em!. An tello chuan thlan kan lai thei tawh lo hial awm e..!. A tir atanga a tawp thlenga kan Incharge ten hma an hruai a hnung an dawl thin hi hmuh a van nuam em. ITI veng nih hi a ropui thin teh e. Chawimawi in phu a, kan chhuang takzet che u a ni e.
- ITI Tlangval.
Mitthi Lumen Zan hian he ITI Veng, Veng Fai ber-ah hian Inchhung a fai thin viau laiin pawn lam erawh a bal tawp hnawk thin hle mai. Kan che hnawk ve hrim hrim nge bawlhhlawh bawm te hi a tam tawk lo....!
- Pherhduai-a
YMA member ten kan hruaitute hi kan duhtak leh tha kan tih zawng kan thlan chhuah an ni a, amaherawhchu, hun a liam ta cheng a, kan Support na kawngah hian tlemin kan tha a thum deuh niin ava lang ve. Hruaitute dem ringawt hi thil tha ber ani em?. A zawng a zain kan inhmang theilo a ni thei e, amaherawhchu, member huang chhung-ah ka tel a nih chuan YMA thiltih-ah hian a awm tawk a tel ve chu ka mawhphurhna a ni. Tin, kan hruaitute hi tute pawh nise, an hnung kan dawlin kan zah thiam em em tur a ni.
- Arshavin (YSU Hotupa)
(Chhiartute huanga thu chhuah zawng zawng hi Editor ngaihdan a ni vek kher lo. Chhiartute huanga thu thawh duh tan 9615950677)

Editorial

Khua leh Tui Tha
A thupui atang khian a chiang reng mai, Khawi ramah pawh cheng ila, eng hnam pawh ni ila, mimal tinin kan tih tur chu Khua leh Tui Tha nih hi a ni. Kan nitin nunah hian YMA taka midang te tana kan inhman hian Khua leh Tui Tha nihna kawng chu awlsam tein kan zawh a lo ni reng mai. Tin, kawng dang heng- Ram leh Sawrkar-in Mipui chawikanna kawnga hma a lakna hrang hrang, khawtlang hruaitu te hmalakna hrang hrang te nen, kan theih ang tawk tawk a kan tawiawm a kan tanpuia, harsatna siam lova kan lo thlawp ve mai hian Khua leh Tui Tha kan ni mai bawk. Tin, Ram leh Khawtlangin a duh loh thil chi hrang hrang Ruihtheih Thil te zuar lo leh Vengchhunga lalut tu kan nih loh te hian, Tharum-in va Do chiam lo mah ila Khua leh Tui Tha kan ni mai thin. ‘Tunlaiah mifel leh tha nih a har tawh lo’ an ti na mek mek bawk a, Mizo nun phung pangngai hi zawh mai ila mitha, Khua Leh Tui Tha chu kan ni mai zel dawn ani.

SUNNA

Darneihkimi, V-Sec (Thih ni : 3.4.10, Dar 9:55 am), Lawmsangzuali, Ch-Sec (Thih ni : 3.4.10, Dar 3:30 pm) leh K. Vanlalzauva, T-Sec (Thih ni : 8.4.10, Dar 8:40 am) te chuan chatuan ram min pansan ta.
An kalsan tak an chhung leh khatte YMA member-ten kan tawrhpui a, Pathianin awmpuiin thlamuan zel se kan duh tak zet zet a ni.
"Kan thawhrimna te hi kan zawh hun chuan
Hmangaihte nen Zion Ram mawiah
Hal lo te in kan leng za dawn si
Aw ka ngahkhlel chu hun tur chu......"

Kan Hruaitute Hrechiang Rawh

Vanlaldingliani Sailo
Treasurer
Nl Vanlaldingliani Sailo kan Branch Treasurer hi a thian te chuan Dingpui tiin an ko thin. Kum 19.. khan Pu S. Lianchhuma leh
Pi Hmingkhumi te fa pathum zinga upa ber niin Kanan Veng-ah a lo pianga unau hmeichhia pakhat leh mipa pakhat a nei.
Tun-ah hian Zawnlai niin Unau zinga Upa ber tih takah a buai thei hle nachungin YMA-ah tih tak zetin a inhmang mek a, a nu leh pa leh unau te nen Vanapa Section ah an cheng mek a ni.
Dingpuii hi thiamna lamah M.A ( Mizo) niin eizawnna lamah chuan Durtlang Higher Secondary School-ah PG Teacher-in a thawk mek a ni. Vanapa Section Committee Member te lo ni tawh thinin tunah hian Branch YMA tangka vawngtu a ni mek a ni.
Dingpuii hi Nula hlim thei tak niin a mi ngainat zawng pawh - mi rilru tha, Pathian tih mi leh midang te tana inphal te hi an ni. Chutih laiin chapona, hmasialna leh mahni chauh inngaipawimawhna te hi a huat ber te an ni.
A mah Contact duh leh mamawh tana inhawng rengin a phone No. 9436361786-ah hian englai pawhin a phone theih reng e.

Chhiattawh Chunga Lawmthu

Pi Lalnunmawii leh a fate T-Section chuan Dt. 01.04.2010 (Ningani)a an pa, Vanlalrema’n a boralsan chungchangah I.T.I Veng nu leh pa, nula leh tlangval a ruang thlenhma a tanga khawngaih leh lainata buaipui tu te, Lengpui thlenga a ruang hmuaktu te, a ruang Phai lama tanga rawn zui tu zawng zawng te chungah lawm thu an sawi.

Article

INDAH HNIAM BIK SUH!!
- Lalthlengkima Sailo.
Jt.Editor
Pa ropui tak a ni chung hian, a khaw mipui thliarkar (rilru zim) pu ho deuh in an eilo hluah hluah a, miten fak lo mahsela lunghlu tha mi ang a ni a, ka tan erawh a hlu chuang e!! Ka thianpa, ka pu te pawh ti ila thu kan sep sual awm lo ve. Hun chep tak karah pawh nise a ni nena kan inkawm tawh hi chuan thu fahrah enge maw tak hi kan rai tir leh nge nge thin a, tunah pawh hei azar kan zo leh ta.. Ti daih ila mi thenkhat tu tih hriat hleih loh, article-engemaw zah khawrpum tawh ni awm tak takte hian, "Mi hian mahni chanchin, fiamthu hi kan hne, kalphung thar duang rawh" tih thute hi msg- min lo thawn leh nulh nulh thin a, khatianga min han selte kha ka lawm zawng tak a ni.Thu-hla-zam velah hian induh duha inkawih thleh theih khawpa khalh nuam ka ni roh bawk a tin ni ti raw? ha ha!!. Thinrima inchhang ni lovin thahnemngaih vang zawkin hei hi ka sawilang duh, msg- ni lovin, article- hmanga min rawn khak sak sak ngam tur mi ka hmu duh. Mi puitling zawkte chin dan thin a ni ngai.
Nie, mahni chanchin ka phawrh fo thinte hi insawimawi ka tum vang lam nilovin, midangte’n keimah atanga hlawkna an lo neihbelh beisei vanga ti ka ni thin a. Fiamthu ka telh zauh thin hi a awmzia chu, chhiar ti nuam tura telh a ni thin a, thenkhatin inhrethiam lo (mi puitling chin lo hian).,."Buaithlak..!!".
Lalu-a’n a thian kawm :- Mi thenkhat Israel ram kal tumin World Map an han en vang vang a, "khap pawh a tling lo, chawhma chhungin kan thleng thei ang" an tih luklak vel kha kan han sep rotui chho va, hlim takin kan nui hak hak a.. Khang ho rual kha tunah chuan mi pangai tak vek an ni tawh chung hian, an thawnthu hlui han sawi chhuahte kha a hlimawm ve riau.Tak tak-ah thu belhchian dawl lo a nih chu.. Thu tam kan sawi hnuin ka pu chuan, "Lalu Prasad Yadav-a, Bihar Chief Minister-a nih lai khan, America President nilai ve tho, Bill Clinton-a kha India ramah a rawn zin a, Lalu-a chuan, Clinton-a kha a lo thian kawm vel mai mai a, a chung en bik reng reng lo" tih thu min hrilh melh melh a, a khabeliam ka ngaihthlak fe hnuah, kan inkawmna pawh chu kan ti tawp zui a, kan in mangtha ta a. A thu min hrilh chhawn hian ka ‘ngengpui’a nghawrnghing ta lawih a, heng thute hi a lo piang ta ruau a.......
An inzahpui mawlh lo:- Tute maw? Mi hang (Negro) hmelchhe pui pui, rethei berh ve ngawih ngawih, mi eng nge maw zah khuan, kei chu ka hmelchhe em a, kan rethei bawk si, tiin insitin, indah hniamin, inkiltawih ta tlat hlawm sela zawng, khawvelah hian kawng tin reng deuh thaw-ah, mi chungnung fal bik leh thil ti thei chungchuang bik an ni bik hauh lovang le. An hmelchhiatna te, sal an lo nih tawhnaten an hringnun a ti buai ve lo va, chakna petu zawk a ni hlauh thung . America President meuh pawh a ngo zo ta lo a nih hi. "Mizo hnam Renthlei? Zingah pawh hian mahni indah sang bik riau an awm a, mi dangte aiin an thil tih velnaah an hlawhtling hma bik" an ti.
Keimah bawk hi :- A harhchhuak tlai zingah ka tang leh ta pek a, ka "girl friend" in min hauh tamna ber chu, ka indah hniam lutuk thin hi a ni. "Khatianga i awm zelte chuan min an hmusit ang che, indah chungnung la, tuna i nihna ang ang khan huaisen takin awm la, ke pen rawh" min ti thin. Nia, kei aia milian pui pui hmaah hian ka khur fo a, ka inkiltawih chang a tam em em a, mahse tunah zet zawng ka harh chhuak ve ta.... "Mizo history-her danglam rawk thei Sailam Lal-Bengkhuaia Sailo thlah dik tak ka nih vang hrim hrim pawh hian indah chungnung a, indahsang hle tur ka lo ni" ka ti ta.Tumah ka chungen dawn tawh bik lo reng reng, mi tu pawh ka zawl tawkah ka ngai vek tawh a, ka thian kawm ve mawp mawp zel tawh a, tu hma-ah mah ka zam tawh ngai bik lo...
Keini veng ve hi :- Ziakmi thenkhatin kan veng hi veng dang aiin kan duai bik tawh loh zia an ziak kur ngei nguai tawh lai hian, kei chu a letling zawnga piang ang hlauh ka ni lehpek. Kan hriat German mi kawlhsen Michael Ballack-a kha, tumkhat chu, a thianpa Ivorian pa hrohramna Drogba’n thinrimin a kawk sawk sawk a, Ballack-a’n ui bauh tluk lekah a ngai a, a khinglet lo, a bauh tir vel mai mai. Kan veng hi pawnlammin an sel changin kan thinin a tuar lo fo va, kan ter at nghal a, inkhuainuai nghal hmiah kan duh thin, hei hian kan veng kan chhan vang hrim hrim nge, kan moral-hniam em avanga khinglet kan ni zawk? Tu kan ti bik nilovin, tlangvalin sawn a thlak a, nulain sawn a pai a, a khaw pumpui ti ti a tling a, hei hian kan veng moral-la hniam zia a phawk chhuak? Kan khawtlang hruaitute pawh hi a nihna takah chuan an sukthlek hi a la sang lem lo!. An khabeliam ngaihthlak changin a lang. A mipui nawlpui ang zawng pawn kan khukpui hlut thin thil hi a la ho lam deuh zawng a ni.. Kei ni veng mi leh sa hi zawng a tlangpui thuin hmundangah han chuangkai ila, kan kimki zui zel. Eng nge a chhan? Kan hnuai en tur thil hi a vang bawk em a tin ni.Thu-leh-hla nise kan hniam fal bik zia chu sawi hian a siak mawlh lo, kei phei chu khawdang/ veng dang thu-leh-hla a tui bulah ka ti ti ve ngam lo, kei aiin an ril fe zawk zel a, ka zak ngawih ngawih zel... Hetiang lamah hian ka tui pawh ka ti ngam ngai lo. Kan veng kan la sawngnawina lai hi phawrh tur awm nghek nghuk mahsela phawrh vek a tha ber lo thei, hei erawh, kan veng hi kawng tamtak-ah chuan kan la hniam deuh lo maw?
Pawi ti suh :- Mawng inhlim mualpho sak hrim hrim hi kan tum a ni hranpa lo, thahnem ngaih vang zawk a ni. Han inkher neuh neuh hi chuan, ropui ve tawh viau nia kan inngaih lai hian, kan la theuneu bik zia leh kan la hnufual bik ziate hi hre thar ila, mahse kan indah hniam chuang tur a ni lo, tuna kan nihna ang ang hi zahpui mai lovin, indah chungnung ve hrim hrim ang u, kan indah hniam bik a nih chuan kan hnufual tulh tulh ang. Kan nihna hniam bik vanga kan in kiltawih-a, kan indah hniam zel dawn a nih ngai chuan miten min hmusit ang a, thil tih velna-ah kan hlawhtling har bik ang a, mi zah kan phur lo bawk ang a, a tuartu chu tu dang nilovin keimahni tho kan ni thin. Tuna kan dinhmun luah mek hi engpawh ni se la, pawi tihna nei miah lo ila, indah chungnungin, indah sang ve thawr mai ila, a mi ropui zia a ni. Tumah hi han chung en tur bik an awm mawlh lo, zahlo ni miah si lovin, kan hlau tur a ni bik lo, keini aiin an lo lian deuh a nih pawn thian kawm ve miah miah ngam ang u. Kan hlauh a, kan tit dui hian hmuhsitawm kan lo ni zawk!!

V.C Hriattirna

Tunlai hian kan veng chhungah RAN khuahkhirhna Dan kan hman mek te pawi sa lova Ran, Ui leh Ar chhuah zalen mai mai kan awm tih hriat a ni a, tun atang chuan mahni Ran vulh theuh te dan anga enkawl theuh turin khawtlang mipui te kan han in hriattir nawn leh a ni.
Tunlai hun hi mahni In bul chuktuah Huana, Thlai Chi, chin hun a ni a, kan ran te kan chhuah zalen hian kan thenawm te leh Vengchhung tan harsatna kan thlen ani tih kan in hriatchhuah a tul tawh hle a ni.
Tun atang chuan khauh zawkin V/C ten hma kan la dawn a, khawtlang mipui te tana harsatna siam tute khawtlang DAN zawm tha duhlo tute chu, na taka hrem zel an ni ang. Ran pawn chhuak, tuallai tla kan hmuh chu a ran neitu hriatchian anih chuan V/C Court-in a chawitir zel tawh ang.
sd/-
(F. BIAKSANGA)
Secretary
V.C, ITI Veng

V.D.P News

1. Dt. 4.4.2010 (Sunday) zing khan Lalrinenga S/o
P.B. Lalduhawma leh Vanlalliana S/o Lalrinliana. I.T.I Vengthar a mite chuan Pu Lianchia te Cement 1 Bag an ru a, an mahni hi VDP Duty ten an man.
2. Dt. 4.4.2010 (Sunday) tlai khan Lalhriattira S/o K. Lalhmuaka leh Rosanglian S/o V. Rokhawla te chuan VDP Duty te zahpahna nei miah lova an chet avang leh an hnen atang hian zu man tel bawk anih avangin Village Council Court I.T.I Veng chuan an chungah Lei chawi turin thu a rel tlu a, Lei chawi tura an tih ang hian Rs. 500/- Lei chawitir an ni.
3. Dt. 5.4.2010 (Monday) Dar 8:50 pm khan Biakropuia S/o Lalfakzuala Mualpui Complex hian ama Taxi (Mz-01-C, 9612) in Pi Malsawmi Zu 20 litre a phur man a ni a, a Zu neitu leh a phurtu Taxi chawp hian thunei tute hnenah pek an ni.
Tin, Vengchhungah Zu leh Ruihtheih thil keng lut leh Motor/Lirthei a Zu phur man an nih chuan a Motor/Lirthei chawpa thuneitu te hnenah pek zel an ni ang.
sd/-
(R. LALENGLIANA)
Secretary
VDP Unit, ITI Veng.

GSA News

Dt. 19-24 April khian 2nd K. Liantlinga, MLA Aizawl South I, Local Volley Ball Tournament Running Trophy ( Men & Women) chu GSA Volleyball Court-ah tan ani dawn ta.
Entry Fee: Rs 100 /- per Team ( Dt. 12-17 April)
A Hmun : Nl. B. Lalmuankimi, Tv P.Lalmawizuala, 4Brothers VCD Library
Tournament Organising Committee
Chairman Pu Vanlalthara
Secretary P. Lalmawizuala
Treasurer B. Lalmuankimi
Members :
Pu C.Lianzama, Lalnunfela, Lalrinmawia, Lalkhawngaiha, Lalhmingliana, Lalhruaitluanga, Lalthachianga, Yankee MS Tluanga, MS Dawngliana, Lalsangzuala
( Thawhleh zan Dar 7- ah Organising Committee te
Pu B. Lalhmangaiha inah inhmuhkhawm tur a ni e.)
* BASKET BALL-a tuimi te Affiliation tih tum ani a a tui mi zawng zawng te Practice turin kan in sawm e. Court puitling buatsaih tum a ni.
* Bazar Fee Inrinni zing tin khawn tur a ni a, khawn tura ruat ten mahni hun theuh-ah khawn tur a ni e.