Kan tui in thin hi a thianghlim em...??

MS-a (T.Sec)

Aizawl khawpui area a awm mipuiin ei leh in atana kan hman ber tui chu PHE tui sem hi a ni theuh tawh mai a, ruahtui leh tuikhur tui ai pawha thianghlim tura kan ngaih vang ani. Hetianga ngaihdan nghet tak kan neihna chhan pawh hi thildang nilovin, Tlawng tui an pump na hmunah Damdawi(Chemical) nen uluk taka PHE Engineer ten an tih thianghlim kan rin vang leh Tuikhuahtlangah kan tui in tur hi a thianghlim leh thianghlim loh PHE Laboratory a an test zel kan rin vang ani ber mai.
Mahse PHE tui sem thin hi a thianghlim em..?? tih ilo en dawn teh ang. Hmanni lawk mai khan Central Sorkar lam chuan tui in tlak anih leh nihloh awlsam taka test-na Health & Family Welfare Dept.ah a rawn thawn teuh mai a, he test-na bur hi lian vak lo niin, a chhungah Filter Paper damdawi pawlhsa diam a awm bawk. He bur hi saranga uluk taka tuam chhuah vek, tui test dawn chauhva hawn tura tih a ni nghe nghe. A bur pawn lamah hian sap tawngin DRDO Technology tih te (India Scientist tam takte fuan khawmna hmun-DRDO), HIMEDIA Laboratory Pvt.Ltd Mumbai, H2S(Hydrogen Sulphide Test) tih te a in ziak a, a awmzia chu he Test-na bur hi India mi thiamte kut chhuak ngei a ni tihna a ni a, a test dan tur a in ziak lang bawk.
Test dan tur chu, bur chhungah hian tui tlem leih anih hnuah nghet taka chhin a, dim te a thin(shake) tur a ni. Tichuan darkar 24-48 chhung khawih chet lova dah vang vang tur ani a, hetia kan dah lai hian bur chhunga kan tui leih luh kha a tirah chuan dettol tui ang deuhin a eng deuh riai a nga, a hnuah hei hi a dum(black) a a rawn inthlak danglam a nih chuan chu tui chu intlak loh(thianghlim lo) tihna a ni. Amaherawhchu darkar 48 chhung khan dettol tui anga eng deuh riai a a awm zui reng(rawng inthlak lo) anih chuan tui chu a intlak/a thianghlim tawk tihna a ni. He test-na hmang hian kan tui in thin tlangpui hi kan test ta a; chu ta kan thil hmuh dan chu hetiang hi a ni.

1. PHE Tui: Connection atanga kan hmuh thin PHE tui chu test ani a, rei vak lo chhung chu dettol tui ang deuh khan a rawn eng deuh riai a, darkar 24 hnuah erawh chuan a rawng chu inthlak danglamin a dum(black) vek alo ni ta a, hei hian PHE Connection tui hi intlak a ni lo tih a entir.

2. Ruah Tui: Ruah tui pawh hi darkar 48 chhung a chung ami ang hian test ani leh a, darkar 8 chhung dettol tui ang in a rawng chu a awm ve ngei a, mahse hei hi a hnu reiloteah a rawng inthlak danglamin a rawn dum ta vek mai a, a bur chhin han hawng ila a uih rimchhe hle bawk. Hei hian ruahtui pawh hi in atan chuan a hrisel lo ani tih a entir.

3. Filter Tui: Tun lai filter kan in tih hmuh leh hman lar tak, a bang darthlalang ang mai a lang tlang thei, Korea siam (Noka, Aqua Guard,etc..) filter-in a filter sa tui chu test ani leh a, a hma mite ang bawkin dettol tui ang rawng a nih hnu reiloteah lo danglamin rawng dumin a rawn inthlak leh nghal vek a, hei hian hetiang ang chi filter in a filter hnu tui chu intlak ani lo tih a entir a, a tui pawh a rimchhe hle bawk. Hei hian heting filter chhunga damdawi ni awm tak awmsa, tui tih thianghlimna tur ni awm tak te hi a lem mai ani a ngem tih ngaihtuahna min siamsak hial a ni.

4. Filter tui(Stainless Steel) : Tun lai chuan filter changkang vak lova kan ngaih tawh, a bang pawh rangva ang maia tle deuh vir ver(aluuminium & Stainless steel) filter in a thlit fim(filter tawh) tui chu a test-na bur hranah bawk kan han test leh a, a chung a mite ang bawk hian test hnu rei vak lovah bur chhunga tuisik chu dettol rawng angin a inthlak danglama, darkar 48 hnuah pawh a tui chu inthlak danglam tawh chuang lovin tun thleng hian dettol tui rawng angin ala awm reng ani. Hei hian hetiang chi filter in tui a thlit fim chu tui in tlak(tui thianglim) a nihzia a entir.

5. Tui chhuan so : Hemi atan hian PHE tui leh ruahtui chu chhuan so hmasak a ni a, test-na bur hran ve ve-ah test ani nghal bawk a. A chung a mite ang bawk khian tui rawng chu dettol rawng angin a inthlak danglam a, darkar 48 hnuah pawh a tui chu rawng inthlak danglam tawh chuang lovin dettol tui rawng ang kha ani ta reng a, han hnim pawh in a rimchhe lem lo. Hei hian tui chhuan so hi in tlaka thianghlim a nihzia tih a entir.
Tichuan Mizote hi kan tui in thin a thianghlim loh vang nge ni hun eng emaw chen atang tawh khan a bikin Aizawl mipui zingah zun kawng tha lo, zun kawnga hnai awm, thisen awm tih te a hluar ta em em mai a, kal(kidney) a lungte awm leh kal tha lo te kan tam ta hle bawk. Hengte avang hian tui thianghlim tura kan ngaih heng PHE tui leh Filter tui te thlenga alo thianghlim lo anih si chuan kan tui in tur chhuan so mai hi a fin thlak ber dawn alo ni.

VIVE

TK SAILO

Thangthar 80's hnu lam a piangah chuan a ni kha zawng kan veng chhungah na na na hi chuan naupang te a nih lai a tang reng khan a chik chhoh dan a fuh a, a ziktluak tha pawl tak a nih kha. Keini aiin a u deuh nachungin Veng te na na chu kan in hmelhriat tha a, a bulah han awm ila nui hmel a pu thei mai zel a, kawm nuam tak pawh a ni. Mihring ve tho a ni a, ke han phet chang pawh a nei ve ngei ang, amaherawhchu vantlang tana a inpekna kha chu thang lo la thar leh zel tur te tan entawntlak a ni ngei ang.
Khawvel infiammi te zing a ka ngaihsan ber Thierry Henry'an amah heti tiat a nih theihna tura siamlian tu Arsene Wenger hi 'Miropui a ni' a tih ang deuhin, naupang zakzum leh inkiltawih mi ka nih thin avangin, chutiang mi ka nih lohna tur & he ti tiat ka lo nih ve theihna tur a ka kawng min kaihruaitu ka idol Pu Lalnuntluanga Pachuau-in 'Miropui enge maw zat kan thlahliam tawh a, a ni lehzel kan thlahliam hi zawng tawrhthiam a har a ni' a tih hian a khaikhawm kim ber awm e. Atan a kan tihtheih hnuhnung a chhungte rilru-na khawhar hnem tura an ina kan punkhawm zan, a zankhatna ah khan chanchinbu fatu thenkhat te nen kan kal ve a, khami zan a Pu Dinga Varte rawn ding chhuak kha, val-upa dang te ang bawkin kalkhawm te thu tha min fah leh ngei ang tih ka lo ring sa reng a, ka chang fuh thlawt....( Tak takah min rawn hau teng chhuai chhuai turah ka lo ngai hman a!!!) A thusawi ti fiah tura a hunlai a tar lan te kha aw... khang hun lai a thalai te khawhar in a kal khawm te'n mei an zuk khuk tulh tulh thin & an thil eina nawi phiah khawm a 'Tinpui khat hnawk " tling thin ni a a sawi te kha. Kan tun lai thalai te khawhar in a kan awm dan nen chuan inthlau tak a ni ta. Ni e, amah Pu Dinga ngei khan a sawi " Tunlai thalai te hi zawng chutiang reng in ni ta lo, kan Veng hian hma a sawn a, a changkang tawh viau a ni' a tih kha. Thalai rual te chet danin a mit a tlung thawkhat ni ngei turah ngai ta ila...A hrim hrimah kha tiang a in fakna te kha chu tunge lawm lo lem ang le ?? Benga han thun luh te kha zawng nuam ve tak zawng a ni. A duh tawk a au chhuah pui ta maw tihah, a thu a, khuang a vua a,ka tel lovin an zai dual dual kan ti teh ang, kei hi chuan, mi pangai ka nih loh zia kan lantir leh pek a, ka melh ngai ka melh run run reng a, zaina chang pawh ka hre ve lo..ngatinge??? Vive in hmu lo ang tih mawlh ka hlau a ni mahna? Chumi tur chu ka thluak sawngnawi tak hi ka lo vaivir pek alawm le.. Mahse kan ti teh ang, Scientist hmingthang Thomas Alva Edison-a pawh kha mi chhaw ang hiala an ngaih thin kha maw!! A thawh rah sengtute hian an hriat chian nak chuan a lo chhaw awzawng lo kan ti thung si..
Hmana Pu C.Lalrinkima te'n an buatsaih 'Chhinlung Aw' chanchinbu kha naupang dangte nen copy- engemawzah kha kan lo sem ve tawh thin a, cheng hnih lawih ka hlep ruk ve thu te ka hre chhuak a, chutia bing taka ka in ngaihtuah lai chuan ka bula thu chuan min rawn nghawk harh zawk a..E khai a ni dawn tak maw" ka ti a!! Ka thu ngaihtuah mek hi a in kahpukchaw (punch line) a dik lo tawp tih ka hre chhuak thut a..Ti hian phuailuai takin a tawp ka khar mai dawn ka ti ta ringawt a. Kan veng nawm em em-na kawngkhat ka hmu chhuak a, Thalai pungkhawm ho chu kan melh kual thuak thuak a, lawm avangin ka nui khi suk! ka bula thu chuan ngatinge i khik vur vur a? min rawn ti. ka hmuh ang a hmu ve miau lo a lawm. kan vengah hian thalai ruk ruk ching, kawh mawh bawl ching hriat tur an awm ngai meuh lo. Mahni in pawh thlamuang taka kalsan ngam kan ni hlawm a, tun hnaia thil bo ve zeuh thin pawh hi kan veng mi an nih ngai a rinawm loh hle. veng fai ber a cheng kan nih ang hian kan thinlung te hi a thianghlim a,mi pawi sawi kan hlau a, kan duh lo a, khawtlang tana mi hnawksak nih hi kan duh lova,a zahthlak kan ti a,hmuhsitawm nih hi kan duh lo theuh a nih dawn hi, he tiang tih ching te hi chu kan diriam ngam tur a ni dawn lawm ni?Ti daih teh ang, hmanni deuhah veng pakhatah hian an veng naupang pakhat hian thil ruk a chin thute an sawi a, an thusawi lai chu pawtchatin "Kan veng naupang,te chu an fel bik lutuk, heng thil ruk leh eng ilo velah te hi chuan an fihlim em em a sin", ka ti a. Kha naupang an sawi kha mi'n inlengah & an fate kawmah pawh an duh lo, kan veng naupang fel tak tak te khan in lo chhinchhiah maw? kan veng hian thenawmte angin ropuina & hmingthanna langsar tak nei ve le lu lo mah ila, a chhunga chengte hi kan lungruala kan in pawh tlan phawt chuan chu tluka hlimawm, nuam chu a awm dawm chuang em ni?? Vawikhat hming hliau pawh a pawi theih zia te ngaihtuah chhunzawm ka tum leh mek lai chuan khawhar in ban a lo hun der ta si. (next issue lamah lo chang chhin teh khai!!A nih loh vek paw'n Nurse & a chheh vel mipui te'n kan hriat tur tangkai tak pho chhuah tum a ni ang)

BRANCH YMA & SAY Hnatlang

Ni 14.8.09 (Zirtawpni) Khan Branch YMA Executive member te chuan Thlanmual Step siam leh Pillar phun hnatlang an nei a, thawk chhuak an tha hle. Tin, ITI Corps SAY pawh Zirtawp zingkar vek hian Veng chhung tihfai hnatlang neiin Branch YMA-in Dustbin vengchhunga a dah thar te an paih ruak nghal bawk.

Tualchhung

mipui te hnena ngenna
Vengchhungah eng emaw thil thleng / rikrum, chhiat tawh nikhuaah mi tinin mahni duhthu leh bengvar chhuah a chet lo la mai lovin khawtlang hruaitute zai ngaiin, an thu i ngaihchang hran hram thin ang u.

VDP- in MAN SAK
Dt. 9.8.09(Sunday) tlai lam khan Vanlalhruaia s/o Rualzachhinga(L) hnen atangin Ruihhlo - Proxyvon (Mum 142), Parvon Spas (Mum 104), Nitosun (Mum 55) lah Ganja tlem a kut atang hian I.T.I Veng V.D.P ten an man sak a, amah hi Narcotic Cell-ah hlan nghal a ni.

GAS Bur 7 Zet Bo
Pi Duhi (T.Sec) Dawr atangin kar kalta khan Gas Bur 7 lai ruk bo a ni. (Tunlai hian thil bo a hluar hle a, mitinte i fimkhur tlang ang u.)

Lawmthu Sawina
Pu H.Lalduhawma te chhung (V.Sec) chuan an fapa H.Lalthangpuia Boral chungchangah Veng chhung mite tlawmngaihna leh khawngaihna an dawn avangin lawmthu an sawi.

Joint Meeting
Ni 25. August 2009 (Thawhleh) Zan Dar 7:15 hian Branch YMA chuan ITI Veng chhung a Kohhran hrang hrang thalai hruaitute khawtlang rawngbawlna kawng a hma kan sawn theih nan leh thawh hona tha zawk kan neih theih nan YMA Community Hall ah Joint Meeting a ko a. He meeting a tel tur ten ngai pawimawh a mahni thil tul dang te kal san a tel ngei turin kanin ngenin kanin hriattir a ni e.

ARTICLE

Heti Hian Ka Ngaihtuah a..!

By: Sang-SangiPa.(T.Sec) (T(T.Sec)

Mitin mai hian keimahni tawkah hlutna leh zahawmna kan nei theuh a. Chu chu kan zia leh nungchang hian a tihmasawnin a tihniam thei thin. Tin, kan nitin nun hi inzir chho zel tur kan nih angin kan zia leh nungchang tihmasawn zel tur pawh hian kan inzir thar zel a ngai a ni.
Khawvel mihring hei zozai zingah hian kut phah beng lek kan hmel/hmai in ang chiah chiah pakhatmah a awm loh danah hian kan zia leh nungchang anpui chiah chu an awm lovang tih a hriat theih sa awm e. A bikin mizo te hi nunho nun ngaina mi kan ni bawk a, heti zawng hian in ngaihtuah teh ang.
1) Chhungkaw nunah : Mizo te hi chhungkua a cheng ho tel tel chi kan ni a. Hemi kawngah hian chhungkaw inngeih tlang leh inhmangaih tlang tak a khawsak ho a tul thin. Chumi tur chuan chhungkua a mimal tin hian mawhphurhna kan nei theuh a ni.
Chutih laiin chhungkua ah hian mal-tlat nun a awm thei niin a lang. Hetiang mi, chhungte thu leh hla pawh ngaihsak lem lo, mahni tal tal a tal ve mawp mawp te hian chhungkua inlungrualna a pawlh dal thei a ni.
Chuvangin chhungkaw inlungrual tlanna leh inngaihsak tawnna nei a, sum leh pai thawhchhuah leh hmanral kawngah pawh chhungte ngaihchan thiam hi a pawimawh hle.
2) Inbiangbiakna chungchang ah : Inbiangbiakna leh thenrual kawm dan hi kan mize hriat theihna awlsam tak pakhat a ni awm e. Hemi kawngah pawh hian thil dang sawi tel lo pawhin, tun lai tawng taka ‘inbawl’ kan ching thin hi thil tangkai lo tak niin a lang. Bawl hlawh tak mi chuan a tawpah midangte phak lohna langsar tak a neih phah thei tih hi hriat a pawimawh hle.
Chuvangin, a hun leh hmun hrethiam chung leh midangte dikna chanvo bawhbuai lo zawng a thenrual kawm thiam a pawimawh. Fiamthu pawh hi midangte zahawmna diriam zawng ni lo leh chin tawk nei ni thei se a duhawm hle.
3) Thawhho-na kawngah : Mizo te hi huho nun ngaina hnam kan ni tih chu kan khawtlang nun a pawl chi hrang tam tak awm hian a tarlang thei awm e. Sakhuana lamah pawh hei hi chu phat rual a ni lovang. Hemi kawnga thawhhona ah pawh hian chanvo neih leh neih loh hi zahawmna intehna atana hman a fuh ber lo thei a ni. Kan chanvo chelh kha midangte laka intihvei pui chi a ni lova, chanvo kan chelh loh avanga inkiltawih lutuk tur pawh a ni hek lo. kan sawi vek sen dawn loh avangin heti hian a hmawr in bawk ngawt mai teh ang. 'The real Dignity of a man is not in what he has, but in what he is', tih leh Red Indian tawngtaina - "Aw Pathian midangte dinhmuna kum 4 tal ka din ve phawt hma chuan anmahni sawisel lo turin min pui ang che" tih hian.
(Nun kawng tinreng min kawhhmuh thintu ka nu Lalthannguri, Ni 12-8-2006 a boral ta, nghilh loh nan)

18th Mizoram Wushu Championship

18th Mizoram Wushu Championship Dt. 11th-14th Aug. 2009 Tuikhuahtlang Central Y.M.A Hall-a neih zawh takah kan veng ai awhin heng mi te hian medal an la a ni.

1. Vanlalremruata -Gold Medal - below 24 kgs
2. Lalremruata -Gold Medal - below 28 kgs
3. Lalnunsiami -Gold Medal - below 28 kgs
4. Israel Lalfela -Gold Medal - below 56 kgs
5. Janet Lalrinmawii -Gold Medal - below 48 kgs
6. Amon Lalhruiatluanga- Gold Medal - below 52 kgs
7. Lalthafela - Silver Medal - below 24 kgs
8. Vanlalringzela -Silver Medal - below 36 kgs
9. David Malsawmkima -Silver Medal - below 48 kgs
10. Lalrochhara- Bronze Medal - below 28 kgs
11. Lalnunthara -Bronze Medal - below 32 kgs
12. Lalrinchhana -Bronze Medal - below 44 kgs
13. Ruthi Laldampuia -Bronze Medal - below 24 kgs
14. Samuel Vanlalnghaka -Bronze Medal - below 56 kgs
Kan veng ai awha Medal la te hi Editorial Board chuan kan lawmpui tak zet a ni.

Editorial

CHAWHCHAWRAWI

Nizan a tang mai khan thalai ten kan tuipui em em English Premiere League chu tan a lo ni leh ta reng mai. Football infiamna hi mizo mipui te hian kan tuipui tak zet a, tin a khel ve lemlo te pawhin a en lam tal chu kan peih hle. Tuipui ral hote chuan heng hi kartluana rim leh hah taka an hnathawh te atang a in relax nan an Club tan em em te inkhel an en thin a. Keini lam pawhin kartawpah kan lo thlir ve thei bawk a nih hi. Amaherawh chu heng inkhel TV a kan hmuh theih te hian khawtlang leh Kohhrana kan inhmanna leh rawngbawlna te hi ti buai thin lo se chu thil tha ni mai tur hi a nia leh ! Mahse heng te hian min tibuaiin harsatna min siam thin tih chu inkhel hmuhnawm tur deuh a awm chang leh chhiattawh, tlaivar ngai, inkhawm, hlazir, hnatlang etc a inrual chang hian a chiang thei awm e. Tin, zan rei tak tak thlengin inkhel kan en a, zing lamah kan tho leh thei miah lo te hi kan inenfiah deuh chu a ngai a ni. Hei bakah zirlai kan nih phei chuan heng mit chakna te laka a hun leh hmun a zira kan inthiarfihlim theih hi a pawimawh em em a ni.
Chawhchawrawi a ni bawk a- Tunlai kan Vengchhungah ruihhlo, ruk-ruk a hluar leh ta hle mai. Heng a inhnamhnawih te hi mitlemte an niin a lang a, Veng mipui te kan tanrual phawt chuan heng thil hi hmehmit theih mai niin a lang. Hna thawk peihlo ruitheihthil duh ve si, mahni ruihna tur takngial pawh thawkchhuak peih bawk si lo, ruihna tur pawisa dila nu leh pa leh chhung te vau khur khur ching leh ruih nan a mi thil ruk mai hreh lo thalai kan awm nual mai hian vengchhung nun a tih raltit mai bakah chhungkua leh khawtlang hmasawnna a ti thuanawp tih kan hriat a kan harh chhuah a va hun tawh em.
Heng bakah- Kan kal pelh tawh ni a lang ‘Sairawkherh’ hmanga indo leh Sava veh ching kan la awm fo mai te hi, kan changkan loh zia tilang tu an va ni em. Tin kan Veng kawn lun lai takah chhun pachang lehnghal a Taxi Driver thenkhat leh mitlawngawl thenkhat kan la inlehkhaden luih luih thin mai te hi, ngaihtuah chian chuan Veng timawi tu ai chuan ti hminghliau tu kan ni tih te hi hre thar zel ila a va duhawm em .

Chhiartute Huang

** Tunlai khawhar In abikin YMA Hun a pawn atanga hla thlan ching thin pa kha arang lamin i sim thei lawm ni. Mi chhiat tawh lai a khatiang a rui chung lehnghala rawn tih fo kha thil mawilo anih mai piah lamah, ka la mawl tluang zel e i tihnaah kan ngai. YMA Hruaitu te pawh hian dawh chin nei se a that hmel khawp mai.
- YMA Ze mawi ngaina tu.

** Tunlaiin kan veng chhungah rukruk a hluar leh ta hle mai, heng rukru te hi veng pawn mi ni bawk mahsela tam tak hi chu veng chhung mi ruihtheithil a fihlim lo te ni in an lang.Hna thawk peih silo ruih duh ve si ho hi eng tia tih tur nge maw in nih le? Zahna chang lah chu in hre der bawk si lo. An la ti muapho duh lo mai mai cheu a, an hre ru kiau tho che u a nia aw, phung in a keuh dawp hma che u hian in siam tha vat teh u.
- Nesta.

**Chhun pachang a hmeichhia tuikhura inbual kung kung hmuh tur kan la awm fo hi a va thing tawh ve ! A bikin Nu-ho in la ching , sim teh u a mawi lo em mai
- Tuikhura Tui chawi thin te.

** Kuang siam lawk hi tha kan ti em?
- Undertaker.

**Sairawhkhawrh hmanga indo leh sava veh ching ho kha in-Nu leh Pa ten an zilh ngai lo che u em ni?? In thil chin thalo tak hi sim vat rawh u.
- In Sava Perh lai hmutu.

**Bazar Sakna tur hmun an reserve hi vengchhung mipuiten kan duh leh duhloh Opinion Poll rawn siam chhin teh u a.. Pu Editor..
- Venghmangaia.

Disaster Management Committee

Dated 17th july 2009 VC sitting chuan: ITI Veng Village Level Disater management Committee kum 2009- 2010 chu a din.
Hetiangin:
Chairman : Pu F Bawithuama VCP
Vice chairman : Pu H Vanlalrawna
Member Secretary : Pu H Roenga, Head master MES ITI Veng.

Committee member-te:
1.Pu R Laltanpuia VFA Vety Dept.
2.Pi Lalramliani Nurse
3.Pu G Chawngthuama VLW
4.Pu B Lalhmangaiha Secy YMA Br.
5.Pu R Lalrinawma Head Master, Aizawl H/S
6.Pu Lalnunfela RS, S.A, ITI Corps.
7.Upa Hrangdailova Bapt. kohhran.
8.Upa R Lalthankunga Presby,Vengchhak kohhran
9.Upa R Manliana Presby. kohhran ITI Veng
10.Pi Rokungi President MHIP
11. Pu R Lalengmawia Ex Service
12. Pu Dohlira President MUP
13. All VC Members

Bihchianna

Tlang Damdawi-In i belchiang teh ang hmiang..!!

‘Tlang Damdawi In’ kan ti teh fo a, ‘Maternity Center Cum Urban Health Centre, ITI’; veng chhung mipui ten kan chhawr tang kai chhoh mek hi i han bel chiang teh ang.
14th August 2007 khan kha tih hunlaia Minister zahawm tak Pu R.Tlanghmingthanga (Health & F.W Dept. etc) chuan a hawng a, tunah hian hnathawk (Staff) 11 an awm a ni:

Medical Officer (MO) :
Helen Lalnunpuii (Ramhlun South)
Nurse :
1) Lalhriatpuii SN
2) Rochuangliana SN
3) Remlalliani SN
4) R.Zalawmi SN
Health Worker :
1) Mimi Lalmuanpuii
2) Lalramnghaki
3) Lalrinchhana
4th Grade :
1) Lalnunzami
2) Zoramchhuani
3) BL.Duhawma
Lab. Tech. : Lalliantluangi.

Duty timing: Zan 4:30pm - 8:00am, Chawhma 8:00am - 12:30pm, chawhnu - 12:30pm - 4:30pm. niin chhun lamah Mo leh a staff te 2/3 duty an awm reng a, zan lamah pawh duty hi 2/3 an awm reng a, OPD card hi chawhma 9:00am - 11:00am chhungin a lak theih a, casualty hi engtik lai pawn a tlawh theih reng a ni. Tlang damdawi In hi seat - 10 beded (khum 10 awmna) a ni a, hetah hian General ah khum 6 awmin, post-natal ward (naunei) ah khum 4 a awm a ni. Veng chhung leh pawn atangin damlo admit an awm ve reng tawh a, casualty hian tlawh a hlawh hle tawh a ni. Tin, nau nei hi an awm ve deuh reng bawk a, veng chhung mai ni lo veng thenawm atang te pawhin an awm ve reng a. Naupiang awm tawh zat chu : 2005 ah Mipa-35, Hmeichhia-23, total-58. 2006 ah Mipa-35, hmeichhia-29, total-64. 2007 ah mipa-36, Hmeichhia-35, total-71. 2008 ah Mipa-40, Hmeichhia-33, total- 73. 2009 (july thla thleng) Mipa-13, Hmeichhia-14, total-27, an awm a ni.

Nikum 2008 lam khan (Minister & VC te hmalakna zarah) Specialist (Naupang & Hmeichhia) ni bik (Thawhlehni & Zirtawpni) ah Tlang damdawi In ah hian an rawn kal thin a, tun kum (sorkar inthlak atangin) ah erawh an rawn kal ngai ta lo. Damdawi supply an dawng tha lo hle a, hei hi khawtlang hruaitute nawrpuina / hmalakna atangin he harsatna hi a kian theih an rin thu hnathawk te hian an sawi. Power Supply hi Veng chhungin kan dawn bak VIP line an nei bik chuang lova, inverter a awm bawk si loh avangin General ward a awmte hi a chang chuan Bati chhit tur an intum a ngai thin a ni.

Mipui te tan a hriat tur leh zawm tur : Damlo kan hun lova kal lui an tam thin hle a, emergency thil a awm emaw, Room tih-fai leh thil dang ilo thawh tul a awm changin duh anga hna thawh leh a hun taka thil tih an harsat phah thin a ni.
Damlo kan chung changah an dan hi zawm sak thin ila a tha hle mai. .Damlo kan chungchanga mipuite hriattur hi building bangah chiang takin an tar.

Donation (thutthleng) petu te :

1) ITI Veng Branch YMA (Silver Jubilee pual) : 5 (panga)

2) KTP Republic Pastor bial - 5 (panga)

3) Bethlehem bial PYD - 4 (pali)

4) ITI Corps -2(Pahnih)

5) ITI BPL -1 (pakhat)

6) Ch. Section YMA -1 (pakhat)

7) MHIP - 2 (pahnih)

8) ITI Veng MNF Unit -1 (pakhat)

9) Damdawiin tlang Welfare - 2 (pahnih)

Visiting Hour (Damlo kan hun)
Thawhtan - Inrinni : 7am - 9am &
13pm - 5pm.
Chawlhni ah
2pm - 5pm .

Naute buk ni :
7am - 8am &
1pm - 4pm
A hun loah Naute buk leh dressing a theih loh.

Hospital Compound chhunga meizial /cigarette zu hi dan bawhchhiatna lian tak a ni. Dan anga hrem theih an ni.

VIVE

TK.Sailo

board- tawngkam hawh ang, T-park kawngsir thut hahchawlhna awmah chuan VIVE super substitute- kan la khekkhal ka pu Chhanhlua nen zan reh tawh takah thu sepsel te te kan sep dun a....

Khawvel mi hmingthang tak tak entirnan "Shakespear-a'n, John keats-a'n....a ti" tih thlakzen aiin, keimana ka tawn hriat lo pal ve hrep tawh in nuih pui a, inchai nak nak hi ka duh a, ka ngai hlu zawk. Khai le!!

Naupangte ka nih lai atang tawhin infiamna ngaina tak mi ka ni a. Sipai Lammualah pawh hian tumkhat chu Under 16-ah Summer club- hming invuahin kan tel ve a, kei hi Primary School- ah te khan ka skill san vang lam ni lovi'n ka pumrawlen vang & ka petnat thin em avang khan defender kan la ti ngai lo, 'stoper' kan tih loh vek pawhin 'back' kan ti thin. khatiang stoper tha te kha chu kan coach- khan min khelh tir ve ka rin tehreng nen khan, Jersey hak tur pawh ka'n chang phalo a nih kha. Substitute bench-ah kawr phelh tungin ka awm a, ngaihtuahna avak vel ruai a.In a ka chhuah dawn a ka pa in fapa Lammuala inkhel thei ka nei ve dawn ta maw' a tih te kha a lo lang uar uar a, a ruk tak chuan thin a ur tung tawh, tih theih dang ka nei der bawk si lo, hun a tawp hnai tawh a kan coach- lah chuan ka hming a lam ve duh der bawk si lo, chak loh chuan tlak vang vang, chutah le ka ding chhuak thut a, ka lam hnaiha ball khalh a rawn tlan phei tuang tuang Lalthafala chu ring leng lawnga auvi'n. Fala rawn chhuak tawh rawh ka khel ve duh tawh'kan ti leng leng pek a nih kha. khelmualah khan tlan lut ve ta ila chakna goal ka thun ang em?? kha thil thleng avang khan a pet lam hi chu Kukui te tawng takin ka Maphasy(mangtha) ta nghal a. ka lo tum lawk reng tawh v... chu kan khel chho ve leh ta a, tunge ka nih sawi tam a ngai in ka ring lo, mizoramah hian min hre tu an awm ve nawk, hman deuh a ka tawngkam kha han hawh leh ta ila, a chiang ber awm e. min beng zawk ... Hming ka chher a, mi hriat rawn ka ni a, mi mit fukna ber pawl ka ni a, awmdan ka thiam lo hial zawk thin. chapo na tlangah ka din phah a, kawng tamtakah erawh confidance- ka neih phah hial thung. E khai! puitling ka ni ve ta pawh a ni mahna, kha hun hlimawm liam ta kha ngaihtuah kir chang hian ka zak ngawih ngawih ta zawk thin, enga ti maw? a nuam viau lawm ni? I hre lo a nih kha, ka tan bik hian chaw a haw lo em a lawm. Mahse i ti teh ang, ka hringnun kai harh a, kaitho tu hmanraw pawimawh tawpkhawk a ni hlauh thung lawi si. Tunah lah khawtlang hruaitute duhsakna azarah tlinglo tak chungin chanchinbu fatu te zingah min han telh ve a, la khawr viau mahila, VIVE nei tupa ka nih phak miau avang hian khawtlang mipui hriat ka ni chho mek a, kei & ka thian thenkhat te tan hian kan 'generation'- a ni mai awm mange' a tih theih. Thu ngaihnawm & chhiar hlawh tur chhawp chhuah fo ringawt hi a tawk em? Tiin ka pu ka bula thu chuan zawhna min zawt ta phawng a, ngun takin ka mut hmunah tlaivar thelhin chu zawhna chu ka chhui chiang ta a, a lo Tawk mawlh lo tih ka ka hrechhuak. Ka thu-hla min an ngaihhlutna tur chuan tih tur hmabak ka nei. Chu chu enge??

Kohhran & khawtlang rawngbawlna ah mi tangkai tak ka nih avangin mi hriat hlawh tak ka ni a, ziak mai ni lovi'n a sawi pawh hi ka thiam viau. Hnatlang nise a thawk chhuak peih ber pawl ka ni a, ka fel zia & ka inpekna san zia te chu an sawi huai huai a, khawkhata a langsar pawl tak han nih te chu nuam ve tak zawng a ni. Pawl eng engah emaw hruaitu ka ni a member te hma a han in pholan a, inleklam vel te chu a nuam ka ti a, mi lawm tur ka hria a, hruaitu tha tak zawng ka ni ve hrim hrim. Mahse maw tunah chuan ka harh chhuak ta, mahni mi mal nun ka ngaihpawimawh loh avangin thenrual tha te ka umpha lova, hmana an fak rawn thin kha tunah chuan mi hmuhsit & nuihzat ka lo ni ta. khawtlang tana inhman hi ka sawisel reng reng lo, mahse a kul ataia kan inhman rual chiah hian kan mimal nun a hlawhtling ve tur a ni dawn lawm ni?. chhungkaw tana hnemhnanna tur eizawnna sum-pai thawh chhuah kawngah kan failed- miau si chuan tumah hian min zah tak tak ngai lo a, a ruk hian hnunglam atangin min nuihzat ru hle thin a lo ni. Thawmhnaw nalh & man to pui pui in bel te, hruaitu langsar & thiamthil neih that vanga lar a, hming thang tak nih ngawt hi zahawmna, zahawma min siamtu a ni ngawt lo, mahni kutkawih ngei a, kan phaktawk eizawnna kawng zawh hi zahawma min siamtu, mi te'n min zahna tur a hmanraw pawimawh ber a ni mai awm mange..

Article

An Ben-buak sak
lovang che..!!

By - Lalchhanhlua. T.Sec.

Dt. 25, July zing a ni a, YMA HALL- bul kawng chhuka ka kal lai chuan, khawchhak lam thli chhia awh! thli hlu tak mai chuan kan veng Y.M.A.NEWS Editorial board hovin chanchinbu an chhutna hmunah chuan min len lut hlawl mai a. Editorial board hovin chanchinbu an lo chhut lai chu ka va nang fuh hlauh a. Tah chuan a ni kan veng tlangval te zinga ka mi ngaihsan ber te zing a mi Pu.Vanneihtluanga. Oh khaih! Vive neitupa Pu Charles Dickens-a zawk mawle, a bula thu tura min sawm ang chuan ka’n thu a, karleh(next issue) lam chu thu leh hla rawn nei ve ta che` tia sawmna ka’n dawng thut mai chu(h) `Heti ema min hmangaihna hi Lalpa a va ropui em`ti a zah pawh dawn lova han auchuah thawt mai hi ka va nap em! A, lo au chuak ta pawh lo ni ila ka inmawh love, rinloh lam atanga sa barh thut ang mai hi ka ni in ka inhria.

Amaherawhchu he chanchinbu ti mualpho tu mai hi ka ni ang tih chu ka va hlau si em! Sailo lunglian lawina huang chu kei Ralte tlangval hian ka luah lum zo hauh lovang tih chu ka chiang e, mipui lam atangin zawhna a awm anih paw ‘n chhanna a awm lo, kei tehlul hian engtin nge bul ka tan anga, engtin nge ka tawp ang tih pawh ngaihtuah chuanglo chuan, ziak loh puan chu kan inchhawp ve chawt mai ah!!

Engtin tak ni ang maw ti a ka inngaihtuah lai chuan thil pakhat hi ka rilruah hian a rawn lut hlawl mai le.

Hman a naupang satliah ve tak mai khan tunah engvangin nge kan veng chanchinbu lian ber Column hran nei thei
khawpa chanpual pawimawh a neih theih ? Charles Dickens hming in phuah ngam tur khawpa huaisenna nei tur hian eng ang in nge a thawh rim ang ? Tih te chu ka rilruah chuan arawn lut uai uai a. Heng hlawhtlinna leh huaisenna te hi ka chan phak rualah ka dah ngailo, amaherawhchu, mi chuan an nei tlat bawk si. Hmana thingtlang naupang bakberhdaikil kara vawkte nen e ho mai mai thin kha, engtin nge tunah ram hruaitu lu ber ber te an nih theih? Engtin nge hman a Missionary chaw chhum mai mai te kha tunah U.S President- ah a in hlan kai theih? Mi hian khawi atangin nge hlawhtlinna an hmuh? Hlawhtlinna chu khawiah nge a awm, tu ta ber nge ni ta ang le?? E le, nangmah ngei kha mawle. Vanneihna chang tur a i thawhrim a mi bik tan a siam hlawhtlinna chu i phu ve reng a nih chuan, Khuanu chuan i tan liau liauin chu hlawhtlinna sa bel chu a rawn chhawp chhuah sak ngei ang che, tuman an ben buak sak tawp lo ang che.

Abraham Lincoln- a khan U.S President a nih dawn khan eng ang in nge a beih ? Vawi engzat nge a hlawhchham? A tawp a tawpah mai pawh ni lo, a tawp khawkah chauh a nih kha a hlawhtlin. Mi hlawhtlingte chanchin hi chhiar la, Vive neitupa tawngkam takin side `A` lamah chuan hlawhchhamna thawnthu hlir a ni awm thin. Amaherawh chu danglam bikna an nei tlat, chu chu hei hi a ni, ‘hlawhchhamna an tawh a piangin an bei let a, hmalam chauh thlir chungin an lo hlawhtling thin a ni.’ Mi hlawhtling tur chuan a chaklohna lai hre reng chungin a chakna lai leh a thiltihtheihna lai chauh thlirin a bei tang tang thin a. Mi hlawhchham tur chuan a chakna leh a thiltihtheihna lai hre reng chungin a chak lohna lai ngawt a lungkham buai thin a, a hlawhchham phah nge nge thin.

Mi hlawhtlingte reng reng hi mi chungchuang an ni ngai lo va, hlawhtlinna hian mi chungchuang a zawng hek lo. Hlawhtlinna hi thil tihtheihnaah a in nghat hek lo. Mi hlawhtlingte hi mi naran ve mai, an mahni leh an thil tih te a rinna nghat tlat mi an ni zawk. “Hlawtlina leh hlawhchhamna te hi hringnun peng pakhat ve mai an ni a, lungkhawkrawk leh suarah pawh lui tui chu a luang tlang tho ang hian harsatna eng ang pawh rawn fuan khawm mahse hlawhtlin tumin kan kal zel tur a ni dawn lawm ni??.

(Hetianga beisei ngamloh lam atanga thu tha tak mai kan hmu hi a lawmawm hle mai. Inthlahrung hauh lovin rawn thawh zel rawh u. -Editor)

Editorial

VENG CHHUNG VAWN THIANGHLIM

Zu khap burna dan kan hmang mek, nikum lam leh kum hmasa lamah te kha chuan SRS te leh vengchhung tlawmngai te hma lakna a zarah kan vengchhungah zu rui leh ualau taka zu in hmuh tur an awm meuh lo. Tunah erawh kum em pawh a la vei lo, SRS an awm tawhlo tiin kan ngampa ta deuh nge kan ‘Kawn’ lun lai ber leh ualau lai takah te hial pawh zu kan in ngam leh ta mai. Zu inmi kan awm a inkhap sak theih a ni hauh lo nachungin a inna hmun erawh tun ai a kan thlan fimkhur deuh chu a ngai a ni. A chhan chu kan aia naupang ve leh chhawng te hian kan chet zia engkim hi min thlithlai ru reng a, a tha lo lai phei chu in entawn a awl leh zual si. Tin, in thin te bawk hian zu hnathawh chu kan hre chiang ang.‘The Imp and the peasant’s Bread’ tih thawn thu a mi ang khan, no khatah chuan intawng siakin kan in fak mawi tawn a, no hnihah awki a lo sang chho a, chutiang zelin no thumnaah ‘kei chuh’ tih a nih tawh chuan a bul vel a ruilo hai lo a ti ti hre phaka awm te tan chuan bengchheng a nih piah lamah eng tikah nge an intihbuai ang tih hlau reng reng a thinphu depdep-a lo ngaihchan a tul thin. Chuvangin heng hmun lun lai GSA Volley ball court chheh vel ( bawngsa zawrhna leh taxi stand Waiting shed vel) a zu in thin te hian, kan in-na hmun sawn ran chu kan tih makmawh a ni ngei ang.
Engpawh nise Zu khap burna dan hman lai a ualau tak leh intithei ni awm fahran a sumkar nei hauh lova kan in thin leh kan ri lung lung thin hi chu sim hmak chi a ni.Tin, Sorkar dan ualau taka bawh chhiatna a nih mai bakah Zu funna paih darh mai mai te kan la ching zui leh ta nghal bawk nen a changkanglo zia deuh lo maw ???
Tin, heng ti thin te ho hi khawtlang hruaitu te leh VDP te pawh hian an la sim lo cheu a nih chuan thlithlai deuh a chiang fek fawk a zilh chu thil sawt tak a ni thei ang em?? Hman lai pawh khan zu rui buaipuiawm deuh te chu Phung an keuh tir thin kha maw.

Tual Chhung

Branch YMA Ngenna

Pathian rawngbawlna leh Khawtlang rawngbawlna kawng a hma kan sawn zel theih nan hun remchang hmasaber ah in kawm ho / sawi ho hun Branch YMA chuan a buatsaih dawn a, kohhran tin leh khawtlang rawngbawltu thalai OB-te lo inkau lawk turin Branch YMA in a ngen a ni.

Rul Chuk enkawlna

Chawngthuama (Ch.T-a) V.Sec chuan rul tur fawh chhuahna a kawl (nei) a, hrechiang duh chuan amah abiak theih reng e. (Ph : 2317876)

Young Star Hriattirna

Young star hnuaia Affiliation ti ho Pu K.Lalremmawia (Pa Puia) te In-ah tlai dar 2:30 ah inhmuh khawm tur a ni e.

LIBRARY Duty

15th.Augt.2009 ( Inrinni) - Lalbuatsaihi & Zoramsangi

Naute nei thar

Pu George Rodingliana V.Sec te nupa chuan fapa duhawm tak an nei thar. Editorial Board ten kan lawmpui e.

Army Pensioner Hriattirna

Army Ex-Servicemen Pensioner leh a thi tawh nupui ten arang lamin passport copy Pu R.Lalengmawia T.Sec hnenah thehluh tur a ni e.

Branch Executive Hnatlang

Ni 14.8.09 (Zirtawpni) hian Branch YMA Executive member ten Thlanmual Step siamrem a, seng hawi fel leh Piller lung phun hnatlang nileng a neih tur a ni a, member te kim taka kal turin kan inngenin kanin hriattir a ni.

Luiral ramah

H.LALTHANGPUIA

(Secvetary, Vanapa Section YMA)
1980 - 2009
(Khawtlang tana i thawhna leh tlawmngaihna te kan
theihnghilh tawh lovang)

Pu Lalthangpuia, Secvetary, Vanapa Section YMA s/o H.Lalduhawma chuan Ni 7.8.2009 (Zirtawpni)
khan Chatuan ram min pansan ta. A tuk, nimin (Inrinni) khan ropui takin Pawn-dum nen YMA Member ten ITI Veng thlanmualah an thlah liam. Khawhar chhungte kan tawrhpui a, Pathianin awmpuiin thlamuan zel rawh se.

Games & Sports Association. (G.S.A) News

Affiliation a tih theih

MABA a GSA in affiliation a renew a, Boxing a tui mi zawng zawng te GSA a affiliation ti turin kanin sawm a. Player pakhat tan Rs.10/- kengin 4 Brothers YMA Hall chung ah mahni hming leh address kim chang ziaka theh luh theih a ni.

G.S.A VOLLEYBALL SQUAD (Latest)

1) Pu. H.Lalhruaitluanga (Coach)
2) Pu Lalniliana Hauhnar (Asst. Coach)
3) Pu Anthony Lawmnasangzuala (Manager)
4) Pu. R.Lalkohbika (Team Medical i/c)
5) Tv. Lalhriatpuia (Player i/c)
6) Tv. Lalthlengkima (Captain)

7) Tv. Lalhuapzaua
8) Tv. Lalrinngheta
9) Tv. R.Lallawmsanga
10) Tv. PC.Lalthazuala
11) Tv. Lalruatliana
12) Tv. Lalmuanpuia

Veng chhung damlo kan hriat theih te

· Pu H.Lalthanmawia s/o H.Lalrinpuia V.Sec (UHC)
· Pi Chhuanpuii w/o C.Lianzama V.Sec (UHC)
· Pi Juliet Lalnunhlimi w/o Rosangzuala Ch.Sec (In lamah)
· Pu Lalrohlua (Tevala) h/o Lalthankimi T.Sec (UHC)
· Lalhruaitluanga (naute) s/o C.Lalramnghaka T.Sec (UHC)
· Pi Vanhmingliani m/o Lalfakhlena T.Sec (Aizawl Hospt)
· Pu R.Lalrinmawia h/o Vanlalhluni T.Sec (Nazareth)

Chhiartute Huang

@@ Hnatlang khawharin kal etc kan vei a, thalai te kal tha tura kan duh tak meuh a nih chuan, Khawhar inah sawi mai lovin , Kohhran thalai ho hriat turin an inkhawmnaah YMA hruaitu te hian sawi sela a tha viau law’ng maw ?? Khawhar ina kal taima te tan infuihna hi a ninawm deuh tlat tawh. Kristian Missionary te din YMA in activity a neih te hi kan tih ve tur a nih hriain Kohhran thalai te paw’n tun aia nasa leh zual hian YMA thil tih hi i tawiawm zel ang u.

- RH. Thanga

@@ Pu Editor, tunlai hian vengchhung thalaite hian Damdawi an va rui leh nasa tawh ve!!
A mak a na! Khawtlang hruaitute hian a vawrh darh tu mi tlem te, pahnih khat lek hi chu chingfel vat teh se. Zu pawh tih tawh nak alaia damdawi leh
zel hi zawng....kan kal pel tawh emaw 'tia, lo
lawm tawh vei nan.

- Mr. Falkland

@@ Kan Damdawi In inenkawlna chungchangah mipui lam diklohna kan sawi thin a, a dik khawp mai. Mahse a thawktute pawh hi in enfiah a ngai lo maw?? Sorkar mi rawih te a Hotuber atanga a hnuaiber thleng hian taimakna chungchangah te, mi an biak dan chungchangah te, an mahni ngei pawh hian dan tam tak hmuh theihin an bawhchhe ve tho si a, Chakai nufa kal in zirtir hi kan ang dawn tlatin ka hria keizawng. A reng reng thu ah damdawi In hi a thawktute leh mipui te ta bik a ni lo, KAN INTAWM A NI.

- Thlirtu.

@@ Thangthar te zinga kan khawtlang tana mi tangkai ber pawl Vanapa ang maia mi tlawmngai Pu Lalthangpuia Secretary, Vanapa Section kan khawtlangin a chan ta mai hi tawrh thiam har ka ti a, thianpa Thangpui ka ui tak zet che a ni.

- Mr. Tk.Sailo.

@@ SAY Leader Tv.Lalhriatpuia you are the greatest.! GSA Volleyball players ten kan chhuang tak zet che. I inpekna a ropui kan ti. I zarah Jersey thar pawh kan neih ngei kan ring.
i zar ah U Thlengkima te pawh an phur hle. Ngal fimin dam ang che.

-Lalhmelthaa

@@ Zonun ze mawi tak chhawm nung tlat tu kan chan leh ta.! Thangthar te hian U Thangpui i sulhnu kan theihnghilh lova, kan thinlungah i cham
reng ang. Van mipui te chuan ‘Zonunmawia’
tiin an lo hmuak mawlh ang che. Mangtha,
May your soul rest in Peace.

-South Kid

@@ GSA Volleyball court sir, sa sahna a Zan lama zu in thin te hian sim vat teh u. In la naupang si a in-tan pawh a tha lo. Zu in kan inkhap thei lova, ahmun erawh i thlang fimkhur ang u. Ualau taka vengchhung mite zahna nei lova hetianga zu in in ngam mai hian aia upa zahna leh in nu leh pa te zahawmna in ti bawrhbang a ni.

- Rawnkhaptur-a.

@@ Kan veng chhungah hian ruihhlo, intihbuai, rukruk etc. hluarna bik hi chu a awm mawle. chuanhnuai huam chhunga cheng nu leh pa leh thalaite inenfiah teh ang u. Veng hmai kan ti bal tlat.

- Mein Kampf.

Chhiatute hnena ngenna

Tunah hian 'NUNHLUI CHANG HNU NGAIHAWM' tih column kan siam belh a, hetah hian a duh duh tan thu (sei lutuk lo) , picture thlengin nunhlui changhnu te... engtik lai pawh a thawh theih reng e.

tin, Article emaw, chhiattute huang emaw, vei zawng, medical thil pawh, eng pawh.. Advetisement thlengin, Column hrang hrang kan neih bik atan, thu thawh duh nei kan awm a nih chuan Editorial Board te hnenah emaw, YMA Hall Library kawngka bulah emaw a dah theih a, Tin, E-maila thawn duh tan pawh ymanews_iti@rediffmail.com ah a thawn theih reng e.