Special Report

YMA KUMPUAN HAWN ANI
- H. Lalbiakkima
Br. Executive Committee Member
Kum 2010 chhunga YMA kumpuan Khawtlang Nun Siamthat tih chu ni 27th January 2010 (Nilaini) khan Vanapa Hall-ah Home Minister Pu R. Lalzirliana’n a hawng.
Kumpuan hawnna mi 500 chuang kalkhawm hma-a thusawia hawngtu Home Minister chuan, ‘Mi thenkhatin min sawiselin min hek mahse, hnam himna atan sawrkarin a tul angin tha a thawh zel ang’ a tih chuan thla a timuang hle. ‘Baal hmaa thingthi ngai lo,’ khawtlang nun siamthat tum thalai zinga tamtak an awm tih han hriat hian a thlamuan thlak a. Tin, tum ram thleng ngei turin YMA member kalkhawm te a fuih bawk a ni.
Kumpuan hawnna Inkhawm hi Central Y.M.A President Pu Lalchungnunga’n a kaihruai a, thupui ‘Khawtlang Nun Siamthat’ tih hmangin chawhma lamah Pu J.H. Zoremthanga, CEC Member Paper leh chawhnu lamah Pu C. Zoramliana, Vice-President, Central YMA ziak ‘Nunpui tur leh Inzirtir ngaite’ tih hmanga Paper present zirho a niin, kalkhawmten sawihona hun hman a ni bawk.
Heng karah hian Ramhlun South leh Kulikawn Branch YMA Zaipawlte thiam takin an zai a. Kan Branch YMA zaipawl te kha..... rilru ah a lo lang ve asin..!. Pu JH Zoremthanga Paper a, ‘Mite mitmei venna chang hre lo apiangte hi mi dangte ngaithei lo hlei hlei an ni’ a han tih te, kut tling lova sum lakluh te hi sual a ni a, kan dodal tur a ni’ tih a’n thailang te, Home hrang hranga naupang nu leh pa nei lo tak tak chu 20% vel chauh an nih thu han hriat te, YMA member nuai li (4 lakhs) lai, Mizoram mihring 40% zet hian tihtak zeta siamthat hna kan thawh chuan kan hlawhtling thei a ni tih hria ang u, tia sawmna aw te khan chona minpe ve se a va hlawk dawn em..?
Ram neitu thalai inthlahdah avang leh dawngdah avanga - Kachari khawpui Silchar-ah Cachari hmuh tur an awm ta meuh lo te, Tripura ram nei hmasatu Tipera te pawhin an ram chhungah District Council an dil mek te, Red Indian (Native of American) hnam huaisen leh ral rel thiam tak te chu sap ho nuamtawlna Casino a inhlawhfa in an inhnangfak a ni ta ber e. Ram hmangaihtu dik tak te chuan hnam dang hma a bawkkhup a, dam ve reng ai chuan mahni ke-a din a thih an thlang zawk thin, tia min fuihtu Pu Ropuia te mitthla a chan reng chungin Kumpuan hawnna hlawk tak kan hmang ve thei ta hi lawmawm ka ti hle a ni.