CHHIARTUTE HUANG
Kan sawi tam ta, Chhiartute Huang hi kan hman dan tur hi, mahse beng a rawngah kan thun lo nge, a ngai te bawk hi kan dawn a ni leh thin. Tun hnai-ah a bikin Vengthar lam chungchang tam tak kan hmu a mahse heng te hi a seltu pawhin thil tha duh vang a ti a nih a rinawm. Chutih rualin kan nihna dik tak tar lang lovin hming lem kan in vuah a, kan Phone number te kan tih lan loh bawk vang nge kan sawi huai thin khawp mai. Mahse heng kan insawiselna ringawt hi chuan thil tha a thlen lo tih chu a lang mek reng a nih hi. Tunah Phone Number kan han tarlang a thu thawh kan tlem ta pharh mai!! Heta tanga thil lang thei chu ‘YMA News’ hmang a hming lem invuah chunga‘Rul Kaw zen tum’ kan ang khawp mai. Thil pawi tak a ni.
Tunhnaiah kan sawi mawlh mawlh chungin Mimal emaw, Section emaw, Kohhran emaw lai pawh zah zo lovin thu chhuahtur kan thawn thin. Hei hi Thil tha kan duh tak tak vang anih chuan kan sawi phak a awm hauh lova, ma’rawh chu ‘Thil tha duh vang pawh ni lem lo’ midang, pawl dang Section dang hmuhmawhna rilru ‘Thliarkar Rilru’a tanga chhuak anih a, chutiang rilru putute kan lo ni a nih hlauh phei chuan kan inen let vat a ngai tih hi kan hriat a tha hle. Tin, Kohhran lam( Eng Kohhran pawh) nena kan inkarah pawh YMA leh Kohhran chu inngheng reng a kal dun, hun ruat chungchangah pawh inzah sak thin kan ni fo tih kan hriat thar a tha khawp mai. YMA chuan mi tumah a tilui ngai lo mai nilovin a tawlh theih chhung chu tlawmngaihna changchawi chunga tawlh mai zawk tur kan ni tih te pawh kan hriat thar leh a tha ang. Kan ‘Thliarkar Rilru’ put thin hian khawimah min thlen dawn si lova.
