Lei Lam Inlarna - C.Lalhmingliana (Dt.11/8/2013)
Tuk khat chu Zing ni chhuah sarah khua chuanin ka hawi ruai ruai mai a, beisei nei si, engnge lo thleng tur hre bawk silo chuan ka rilruah mawlhtu a awm tlat a, thil lo thleng tur min rawn dek dawttu awm dawn tlata ka hriatna chu a lian tual tual a, ka beisei ber pawh ka hriatlohna chu a chhah tawlh tawlh thung.
Chutia a ngaihna hre lova ka indawm kun reng lai chuan mihlimte inlarna hmuh ang maia chiang chuan ka thinlungah thu a lo thleng ta. Mahse, Pathian chawimawina leh a hnung zui tlat tur kan nihna lam reng a nih loh vang leh sawi chhuak ta ila mî nuih tiza tam mai a chang thei dawn a ka hriat tlatna chuan sawilan loh law law thain min hriattir ta zawk a. Tichuan, hun a lo kal leh deuh a, ka rilru chu thlakin a awm ta a, he thu, ‘Leilam inlarna’ tih chu ka han chhawpchhuak ve ta rawih mai a ni.
Ni chu a sa vâwl vâwl mai a, a lum hûlh hûlh mai bawk a. Kum khat chhûnga a lum ber ni a thleng ta emaw tih turin thlasik khua-ah chuan ka khur ta zawih zawih mai a. Ka tlu der mai a, ka lo muhil zui ta mai a. Tichuan, kawngpui zau leh nuam tak maiah chuan ka tei ka tei a, nula pakhat hi a lokal a, “Ka pu, tlanchhe rawh, tlanchhe rawh, he zoramah hian Nula thalaite hûrna hrî alo leng dawn a, i tuar ve palh hlauh ange.’ a ti mai a. Ka mit neih zawng zawng chu a phawk thei ang berin ka meng niin ka hria. “Nula, a chhan engnge,” ka tih chuan, “Tunlai nula te lakah hian hurna hri a leng mek a, a then an in zuar a, a then chu inzuar anga lang duh silovin, an Mobile-ah biaka, inbiakrem pui hnuah hmun intiamin an kawp theih a, chung ho chu an vengah chuan Nula pangngai ang takin an lang tlat a, an nun ruk dan leh an awmdan chu inang lo tak ani.” a ti a.
Chu nula vêk chuan, “Ka pu, ka thusawi kha a dik chiah a nia. Hemi dawtah hian Uirena hri aleng dawn bawk. chu chuan mitin a huap dawn a, i himna turin inveng \ha rawh.” a ti leh a. Chu hlei hlei chu a ngaihna ka hrelo zual a. Nula chuan, “Ka pu, kan hrilhfiah law law ang che. Nupa inkawp rem deuhte inkarah intentawnna a thleng a, an kawppuite aia midang beiseina a hring a, chu chuan ngaihzawng a neihtir a, Minu in mipa leh Tlangval an ngai zawng a, Mipa lahin Minu leh Nula an ngaizawng a, mipa leh mi pa, hmeichhia mahni anpui an ngaizawng a, Uirena sualin kan ram a tuam ta. I himna turin tlanchhe rawh” tiin a au tuarh tuarh a.
Kei chuan Nula, ka inven nan thil dang sawi tur ila nei em? ka ti a, ani chuan, “Nei e, a hlawmin kan sawi tawh mai ange. Ngawlveina hri a leng \an a, Naupang lam chuan aia upate ngaih pawimawh lohna leh Zah hauh lohna hri an vei a, chu chuan an aia upate chu tiatpui enin a entir a, Zah a hnekin an han tirhte pawhin an melh rum khâ khâ tawh a ni. A dawtah chuan, Tlawmngaihlohna hri chu nula tlangval ten an vei teuh mai bawk a, chhiatni-ah hmuh tur an vang ta pharh mai a, mitthi lumenna lamah an lang ta lova, zan lama nula thingpui sem tur kan ramin a nei ta meuh lova, tlangval thlanlai tur pawh he hri avang hian an vang ta pharh mai a, Mizo tlawmngaihna chu an kephah hnuaiah an rapbet zota a ni ber mai. Khawtlang huapa thil\ha tih tur a awmin auh khawm an har ta em em a, a thawk lo chu pawisa chawitir (Run) hial an ngai ta a ni. Mizo khawtlang nun a chhe zo ta a, inhmangaih tawnna te, mite chawimawi phu chawimawi duh lohna hri leh mite rel chin em em na chuan a tuam tal leh zel bawk nen hetiang chuan khawtlang tha, chhungkaw tha, thawhhona tha hi kan ramah a awm thei ngai lovang.” tiin a ang ta phiar phiar mai a. Ka han ngaihtuah zawm a, kei teh lul pawh ka lairil a na vawng vawng mai a ni.
Chu nula thusawi mak tak mai chuan min barakhaih chiang em em mai a, hetiang hri hi chu kan vengah hian lo leng velo hram sela, keini chu veng lungrual leh inpumkhat nih kan zir mek a, kawng hrang hrangin kan inpumkhat sawt ta viau a, khawlaiah rui deuh deuh, len ti nuam lo khawp a rak leh vakvel a, mi awm mai mai cho ngawt ching pawhin zahna chang an hre tawh a, ualau taka zu lo in thin pawhin hmun biru zawka in thiar fihlimna chang an hre tawh si a. Mitthi Inah ruihtheih rim nam teng vung vunga lo thlek bûr ching pawh kan nei ta meuh lo a ni si a. ITI veng, veng changkang leh hmasawn chak em em, tlawmngaihna par ang vultirna hmun a nih zel theihna tur leh Veng thianghlim a nihna tura theih tawpa kan thawh tlanna chuan rah tha a chhuah zel niin alang. Chu nula thu min hrilh, ka lei inlarna laka kan inven chu ava tha dawn em tih ka ngaihtuah lai chuan ka thangharh ta hlawl mai a.
