Kawka Patea
Amah chu ka pu a ni.Ka thian a ni a, ka unaupa leh farnu a ni bawk.Rappers ho tawngkam takin ka ‘hommies’- a la ni lehzel bawk. Tuemaw tihdan takah amah han en mai hi chuan buh 5kg ei zo va, 4kg e chhuak leh nghal mai thei hmel hi a pu roh a. Chanchin a ngah em avang hian tun tumah hi chuan akip akawiin ka hrilh hman dawn lo che a, tlem azawng amah i hriatchian lehzual theih nan ka han hrilh ‘ru’ dawn che a ni.Nula mi a ni: Nula mi a ni ka han ti ngawt tak nain, a hmel hian a zir em avang zawk hian ‘nula duhzawng mi tak’ a ni zawk awm e.Vengchhak nula senior, nuih insum thei tawpkhawk U ding...i pawh hi ka pu bula a awm chuan a kiai ve leh suk zel, an ti.A khabe a han sep tak tak hi chu(h), awiiii... tu tan maha han nep phal chi hi a ni mawlh lo!Mahse nula hnahkhat mai duhtawk lova, hnahhnih lehzel chunga a zei zia a han show leh kher thin hi chu,kei... ve mai mai pawh hian ka dem ve lek lek thin.Nula tlawntlai tha deuh deuh a hmuh hnem tehlul nen( ama insawi danin).A cell phone te lah hi company-te hian ri reng tur hian an siamsak bik emaw tih turin a ri reng lehnghal a.A phone directory- a hming lang zawng zawng ka hmuh ang hi Tetea of ITI kawn,te chuan hmu ve se zawng Aizawl nula directory- an tih sak ngei ang.Mahse kei chu keimah ka ni miau a, ka ti ve lo.Amaherawhchu, mihring hi chhang chauhva kan nun loh ang bawk hian, ka pu pawh hi zei elhkhen mahse tum khat chu hmangaihna pialtlepah a lo tlu silawng ve zan tawh a nia aw.A hmel leh pumrua han en a, kahpathir rilru ang mai pu awma lang si hian lapaw hlawm rilru a lo pu ve teh mial a!Chhim lama a bialnu Mara nula ngaia a han tap zet zawng thlem chi hi a ni mawlh lo. Ka thlem leh a tap zual zel a, ka thlem loh leh i pu hi min va ngaihsak lo ve tiin tap chungin mi ankhum zel bawk si. Ka tan chuan awmdan thiam har tak a ni.A hmuh apiang mai hi a hmelma an ni vek mai a.Chemtum leh Silai a bul hnaia alo awmlo hlauh kha chu ka tan malsawmna a va ni chiang em!Tun thleng hian Pathian hnenah ka nunna min zuah sak avang hian lawmthu ka la sawi.
Miril a ni : Mi tam tak chu thusawi an thiam viau laiin a ziak lamah erawh an hnufual hle a,ziak lama u takte pawh hi a sawi lamah erawh chuan eng teh ual an ni bik lo.Amaherawhchu,keima pu zet hi zawngin zuk nei phir thawt a!Thuziak lamah hian a confi em em a.”Pathianni tuk khat lek pawh VIVE column- a awm loh chuan khawtlang mipui lung a leng hman thin,”a ti.A Lawina kohhrana programme- lian tham deuh hlek a awm nikhuaa item a neih dawn phawt chuan, “I.T.I Vengchhak KTP member a zaa za rual hi an rawnin pangaw zial tup tup zel,” zuk ti lehzel bawk a! A rilzia tilang chiangtu ber ni a ka hriat chu, milar tupawh thuziak mi emaw,sawi mi emaw ho reng reng hian a sawi tawh thin leh ziah hnu vek a ni an rawn tlangau pui ve leh mai mai thin ni!(hei poh hi ama min hrilh a nia).’Saipui kal lai ui chalin a bauh ding ngai lo’ tih hi a thupui a nih miau avangin a thuziak kawngah kher hi chuan i ring lo rawlh tum ve lo la, mi vannei i ni mai. A pu Sailo Lal huaisen, Bengkhuaia tuchhuan kal zel a nih vang nge mawni,a rilru hi a lian pung pung khawp mai, a thianten an ti.Mahse kei chuan ka hre chiang ve hauh lo mai.Ka hriatchian em em zawk a chu miril a ni,tih hi.Amaherawhchu heti khawpa thuziak leh sawi lama mi hratkhawkheng,miril nia ka lo ngaih ai hian intihsiakna(competition)lampanga rin aia a han che duap leh tlat mai thin hi chu a pawi ka lo ti vawng vawng thin.A hmingin lawmman chhete tal hi chu han dawng ve se chu,kan putu hian kan lawm akim tur a nia......
