Article

Good Morning - ITI Veng.
- Sharon R. Lallawmsanga
Jt. Editor
Dar 12:05 chiah ani a, kum 2010 ani ta. Hetih lai hian chung khuanu rorelna hnuai he khawvel-ah hian rorelna ni nghakhlel lo taka duhthawh taka hmangaihna par tlan dun mi engemaw zat an awm ang a, thiante nena hlim taka kumhlui thlah pawh chhiar sen loh an awm ngei ang. Chutih lai chuan he hunpui mi tam zawkin lungngaihna zawng zawng theihnghilh tuma hlim taka kan hman lai hian lungngaihna leh beidawnna ruama kun ngawih ngawih pawh an awm ngei ang..... Kum 2010-a ka hun hman dan hmasa ber ni turin ka suangtuahna dawhkan lam ka pan a, he thu hi ka ziak ta a ni.....
Harsatna, beidawnna, lungngaihna, hlimna leh lawmna nena ka tana inchawhpawlh kum 2009 chu a her liam ta, Khawvel mawina leh ropuina, malsawmna ka dawnte pawh a her liampui rualin, lungngaihna leh beidawnna ruama mittui nena ka hun hman zawng zawng te pawh a her liampui ta. Koh din rual a ni tawh lova, chutihlai chuan ka sualna leh tlin lohna te zawng zawng min theihnghilh sak a kum 2010 nung dama ka thlen ve avangin ka van lawm em!. Mahse, heng zawng zawng piah lamah hian, he kum 2010 min hruai thlen rual hian, hmasawnna kawng rahbi rap ve tawh turin ka nihna ang ang hian Lalpa i hma-ah ka lo tlu lut-a, i zahngaihna avang chauhin khawngaih takin min lo hria ang che....
" A hmasa ber-ah chuan Lalpa, he hringnun khawvel-a ka cham chhung hian mi dangte tana malsawmna ni thei turin min zirtir la, ka phal chin chauhva mi dangte tana malsawmna ni lovin, kei aia harsa leh pachhe zawkte mamawh ang zelin ka neih zawng zawnga mi dangte tana malsawmna nih min zirtir ang che. Khawtlang leh Kohhran-a khawngaih rawngbawl hna min pek-ah mi zawng zawng huap hruaitu ni thei turin thlei bik leh duhsak bik nei hauh lova thutlukna siam thei turin rilru zau min neih tir la, chu pawh ka ti thei lo a nih chuan Ram hruaitute leh Sawrkar Officer lian te eiruk hi min dem tir tawh suh ang che.
Khawtlang hruaitu ni tura thutiam ka lak ni atangin mipuite chunga roreltu ni lovin mipui te chhiahhlawh tur atana Pathian ruat ka nihna min hriatchhuah tir thin la, chutih rual chuan Kohhran-a rawngbawlna hna hi a tum-a tum chhuah chi a ni lo tih min hrilhfiah la, Kohhran Upa leh rawngbawltu ni tur chuan sawm a pakhat leh thawhlawm chhiar, ruai theh dan tur leh Biak In sak dan tur ruahmantu ringawt ni lovin, a la hre lote hnena Chanchin Tha hril a, thlarau bo pakhat tal Krista hnena hruai thlen hi kan tih tur kan nihna in a phut chu a ni tih min hrilhfiah bawk ang che.
He Hringnun zinkawng-ah hian ngaihsan tur dik ka hriat theih nan, Nu leh Pa te neih chuang liam chen-a, tihluihna avanga nuamsa taka lehkha zir-a hlawhtlinna par tlante aiin, harsatna, retheihna, manganna leh mittui nena hringnun rawn sual chhuaka, lei rem rawn rap ve te ngaihsanna thinlung min pe la, urlawk zan leh kumhlui thlah zan hmanna tur litre 10, khum hnuaia ka dah avanga engthawl leh thlamuang taka nun ka hman thin hian ram ropui min thlen lo a ni tih min hriatchhuah tir la, kei ka chhungte thlamuanna tham zawk buaipui a nei ve tawh turin hringnun zinkawng-ah hian mite thlan a tlak ruala tla ve tawh turin ka thinlung khauh tak hi min tihnem sak ang che. Chu nun kawng ka zawhnaah chuan nitin-a ka thawhchhuah erawh a man a to zia leh khawvel harsatzia min hriattir reng la. Ni khata Rs. 150/- ka hlawhin, Rs. 100/- a zu fun lei a, Rs. 40/- a meizial leh kuhva ka lei zawh hnu-a chapo taka ‘ka hlawhin alawm ka ruih’ kalo tih thinna hi min bansan tir bawk ang che. Khawvela mi ropuite leh hlawhtlingte hi an thawhrimna min hmuh hmaih tir hauh suh la. Mahse heng zawng zawng ai hian nangmah avanga hmun raltitna leh hun khirhkhan-ah pawh i hming tlangaupui a, i hming avanga tuartute ngaihsan awmzia leh an ropuizia min hriattir reng bawk ang che.
Vengchhung-ah lusun khawhar an awmin YMA member ka nih avangin khawhar inah min kal tir tawh lo la, Mizo ka nih avang zawkin lusun khawharte hnem tur ka ni tih hi min hrilhfiah la, chumi piah lamah chuan lusun khawhar kan neih reng rengin ka Nu leh Pa emaw Nupui/Pasal-ah min ngaihruat tir la, inleng nei lo ila ka khawhar turzia hi min dawntir fo ang che. Biak In ka ngainat ve tulh tulh theihna turin mihringte min tehtir reng lo la, nangmah avang zawka I Biakbuk thleng tur ka nihzia min hriattir bawk la, khawiah pawh hian nang chu i awm a, khawi hmunah pawh i biak theih reng a ni tih hre reng mah ila, i Biakbuk inchhung ngeia nangmah biak erawh a danglamna hre ve tawh turin Biak In ngainatna thinlung min pe ve ang che.
I malsawmna ka dawn chang te hian i hming leh nangmah theihnghilhin ka mihring ropuina leh theihna ka chhuang thin a, khawvel thlirna atang chuan nuam pawh ka ti ve hle thin. Mahse, Lalpa hmun raltitna leh beidawnna ruama ka thut lai a nangmah chauh lo chu belh tur ka neilo tih ka hriatchhuah leh si te hian i tanpuina dil pawh zahthlak ti chung takin i malsawmna ka dawn laia ka hlatzia che ngaihtuahin inthlahrunna in ka khat a, mahse chutihlai pawha i khawngaihna ropuizia leh makzia erawh hi chu sawidan ka thiam lo...! Tunah chuan Lalpa i thu avang chauhin engmah sawi tur ka hre tawh lova, nitin-a i bula awm a, nangmah belh che hi ka duh a ni.
Heng ka sawi zawng zawng te hi Lalpa a tak ram a thlen si loh chuan mumang nen a ropuina a dang chuang lo a ni tih ka hria. Mahse Lalpa mihring hma-a intiam ka nih loh avangin ka zam lova, ka theihnghilh chang apiangin ka thinlung kaiharh thin ang che. Chu avang chuan i bula heng nun zawng zawng hi ka zira ka neih ve theih nan a hmasa berah chuan tlawmna nun min pe ang che......."
Zing Dar 4:30 a.m a ri ta, Zawlkhawpui pawh a reh ta thuap mai...., mu tura ka insiamfel chhung chuan tukverh atangin khaw vawt tak kar-a kawl lo eng tan tir chu ka hmu a, 2010 a khawvar ka hmuh hmasak ber a ni tiin Camera ka la chhuak a, thla ka lak zawh hnu chuan Good Morning - ITI Veng ti chungin ka mut hmun lam ka pan ta a......