Kumthar-ah YMA News tangkai lehzual zawkin aw.....
Kumthar kan lo chuangkai ta reng mai...YMA News pawh tluangtein a kal ngaiin a kal ve bek bek a, enkawltute han inthlak bawk thin mah se chatlak lovin kum 1987 atang khan kumin thlengin, Kum 22 chuang zet hmel chu a lo hmu ve ta reng mai. He a hlawhtlinna hi he chanchin phek lo enkawl tawhtu Editorial Board hrang hrangte inpekna leh rim taka hna an lo thawh tawhna te a nih rual rualin YMA News hlut taka chhiartu, Vengchhung Mipuite vang a ni kan ti lo thei lovang.
Kan Vengchhung Chanchinphek, YMA News hian kan hmuh angin hma pawh a sawn ve hle a, a Layout hrim hrim pawh Veng dang te Chanchinphek nena khaikhin pawhin a zahpuiawm tawh bik lo a. Tin, thuchhuah chungchangah pawh ziaktu lam te hian hma kan sawn bawk e. Han tang zel rawh u.
Tichuan, tunah Editorial Board tharin tha tharin kan han enkawl tan ve dawn a ni a, YMA News tana sul lo su hmasa tawhtute hniakhnung kan zui zo lovang tih kan hlau hle mai. Kan hlawhtlin leh hlawhchham chu sawi tawh angin Editorial Board-te inpeknaah leh chhiartute-ah thui tak a innghah leh dawn avangin chhiartuten min hlutsak a pawimawh em em dawn a, thu leh hla ziak, kan tana sawt tlanna tur leh tangkai tur kan neih phawt chuan tumah inthlahrung hauh lova rawn thawh / thehlut zel turin chhiartute ka han sawm duh che u a ni.
Tin, YMA News hi Vengchhung Information tak tak a nih avangin Vengchhung thuthar kan neih ang angte pawh Editorial Board-te hriattir zel thei ila a lawmawm hle ang. Tichuan, Zoram pumah a thaber ni mah suh se, a hma aiin Vengchhung Mipuite pawhin kan sawtpui tlang leh zual ngei beisei ang.
